അബുദാബി: മേഖലയില്‍ നിലനില്‍ക്കുന്ന രാഷ്ട്രീയ അസ്ഥിരതയും സുരക്ഷാ ഭീഷണിയും കണക്കിലെടുത്ത് തങ്ങളുടെ പൗരന്മാര്‍ക്ക് മൂന്ന് രാജ്യങ്ങളിലേക്ക് യുഎഇ വിദേശകാര്യ മന്ത്രാലയം യാത്രാവിലക്ക് ഏര്‍പ്പെടുത്തി. ഇറാന്‍, ഇറാഖ്, ലെബനന്‍ എന്നീ രാജ്യങ്ങളിലേക്കാണ് പൗരന്മാര്‍ യാത്ര ചെയ്യരുതെന്ന് കര്‍ശന നിര്‍ദ്ദേശം നല്‍കിയിരിക്കുന്നത്. പശ്ചിമേഷ്യയില്‍ വര്‍ദ്ധിച്ചുവരുന്ന സംഘര്‍ഷ സാധ്യതകളും സുരക്ഷാ വെല്ലുവിളികളും മുന്‍നിര്‍ത്തിയാണ് ഈ നടപടി. പൗരന്മാരുടെ ജീവനും സുരക്ഷയ്ക്കും പ്രഥമ പരിഗണന നല്‍കുന്നതിന്റെ ഭാഗമായാണ് മന്ത്രാലയത്തിന്റെ നീക്കം. ഈ രാജ്യങ്ങളില്‍ നിലവില്‍ തുടരുന്ന സംഘര്‍ഷങ്ങള്‍ പൗരന്മാരെ അപകടത്തിലാക്കിയേക്കാമെന്ന വിലയിരുത്തലിലാണ് അധികൃതര്‍.

യുഎഇ പൗരന്മാര്‍ ഈ രാജ്യങ്ങളിലേക്ക് യാത്ര ചെയ്യുന്നത് ഒഴിവാക്കണമെന്നും നിലവില്‍ ഈ രാജ്യങ്ങളില്‍ തങ്ങുന്ന പൗരന്മാര്‍ അതീവ ജാഗ്രത പാലിക്കണമെന്നും സുരക്ഷാ ഉദ്യോഗസ്ഥരുടെ നിര്‍ദ്ദേശങ്ങള്‍ പിന്തുടരണമെന്നും മന്ത്രാലയം ആവശ്യപ്പെട്ടു. അടിയന്തര സാഹചര്യങ്ങളില്‍ സഹായത്തിനായി എംബസികളുമായോ മന്ത്രാലയത്തിന്റെ ഹോട്ട്ലൈന്‍ നമ്പറുമായോ ബന്ധപ്പെടണം.

മേഖലയിലെ മാറുന്ന സാഹചര്യങ്ങള്‍ നിരീക്ഷിച്ചു വരികയാണെന്നും പൗരന്മാര്‍ക്ക് ആവശ്യമായ സേവനങ്ങളും വിവരങ്ങളും സമയബന്ധിതമായി നല്‍കുമെന്നും വിദേശകാര്യ മന്ത്രാലയം അറിയിച്ചു. നേരത്തെയും സമാനമായ സാഹചര്യങ്ങളില്‍ യുഎഇ ഇത്തരത്തില്‍ യാത്രാ നിയന്ത്രണങ്ങള്‍ ഏര്‍പ്പെടുത്തിയിട്ടുണ്ട്.