ദുബായ്: യുഎഇയുടെ വിവിധ മേഖലകളെ ലക്ഷ്യമാക്കി തിങ്കളാഴ്ച ഇറാന്‍ നടത്തിയ വന്‍ മിസൈല്‍-ഡ്രോണ്‍ ആക്രമണങ്ങളെ എമിറാത്തി പ്രതിരോധ സേന പ്രതിരോധിച്ചു. 12 ബാലിസ്റ്റിക് മിസൈലുകള്‍, മൂന്ന് ക്രൂയിസ് മിസൈലുകള്‍, നാല് ഡ്രോണുകള്‍ എന്നിവ വ്യോമപ്രതിരോധ സംവിധാനം ഉപയോഗിച്ച് ആകാശത്തുവെച്ച് തന്നെ തകര്‍ത്തു. ആക്രമണങ്ങളില്‍ മൂന്ന് ഇന്ത്യക്കാര്‍ക്ക് പരിക്കേറ്റതായാണ് റിപ്പോര്‍ട്ട്.

യുഎഇയുടെ കിഴക്കന്‍ എമിറേറ്റായ ഫുജൈറയിലെ എണ്ണനിലയത്തില്‍ ഇറാന്റെ ഡ്രോണ്‍ പതിച്ചതിനെത്തുടര്‍ന്ന് തീപിടുത്തമുണ്ടായി. ഇറാന്‍ യുദ്ധത്തിന്റെ പശ്ചാത്തലത്തില്‍ പേര്‍ഷ്യന്‍ കടലിടുക്ക് ഒഴിവാക്കി എണ്ണനീക്കം നടത്താന്‍ യുഎഇ ഉപയോഗിക്കുന്ന പ്രധാന പൈപ്പ് ലൈനിന്റെ അവസാന പോയിന്റാണ് ഫുജൈറ. ഇവിടെയുണ്ടായ ആക്രമണത്തിലാണ് മൂന്ന് ഇന്ത്യന്‍ സ്വദേശികള്‍ക്ക് നിസാര പരിക്കേറ്റതെന്ന് അധികൃതര്‍ സ്ഥിരീകരിച്ചു.

ഇറാന്റെ നടപടി മേഖലയില്‍ സ്ഥിതിഗതികള്‍ സങ്കീര്‍ണ്ണമാക്കുന്ന 'ഗുരുതരമായ പ്രകോപന'മാണെന്ന് യുഎഇ വിദേശകാര്യ മന്ത്രാലയം പ്രസ്താവനയില്‍ പറഞ്ഞു. രാജ്യത്തിന്റെ സുരക്ഷയ്ക്ക് നേരിട്ടുള്ള ഭീഷണിയുയര്‍ത്തുന്ന ഇത്തരം നീക്കങ്ങള്‍ക്കെതിരെ ശക്തമായി പ്രതികരിക്കാന്‍ യുഎഇക്ക് പൂര്‍ണ്ണ അവകാശമുണ്ടെന്നും മന്ത്രാലയം വ്യക്തമാക്കി.

അതേസമയം, യുഎഇയെ ലക്ഷ്യം വെക്കാന്‍ തങ്ങള്‍ക്ക് പദ്ധതിയില്ലെന്നാണ് ഇറാന്റെ ഔദ്യോഗിക നിലപാട്. ഇതിനിടെ, യുഎഇ തീരത്ത് നങ്കൂരമിട്ടിരുന്ന ഒരു ചരക്കുകപ്പലിന്റെ എന്‍ജിന്‍ റൂമില്‍ തീപിടുത്തമുണ്ടായതായി ബ്രിട്ടീഷ് മാരിടൈം ട്രേഡ് ഓപ്പറേഷന്‍സ് അറിയിച്ചു. കപ്പലിലെ ജീവനക്കാരെല്ലാം സുരക്ഷിതരാണെന്ന് അധികൃതര്‍ വ്യക്തമാക്കിയിട്ടുണ്ട്.

തിങ്കളാഴ്ച ഉച്ചയോടെ മിസൈല്‍ ഭീഷണി നിലനില്‍ക്കുന്നതായി കാണിച്ച് അധികൃതര്‍ ജനങ്ങള്‍ക്ക് മൊബൈല്‍ അലേര്‍ട്ടുകള്‍ നല്‍കിയിരുന്നു. സുരക്ഷിതമായ കെട്ടിടങ്ങളിലേക്ക് ഉടന്‍ മാറാനായിരുന്നു നിര്‍ദ്ദേശം. രാജ്യത്തിന്റെ വിവിധ ഭാഗങ്ങളില്‍ കേട്ട വലിയ ശബ്ദങ്ങള്‍ മിസൈലുകള്‍ വിജയകരമായി തകര്‍ത്തതിന്റെ ഭാഗമാണെന്ന് പ്രതിരോധ മന്ത്രാലയം അറിയിച്ചു. യുഎസ്-ഇറാന്‍ യുദ്ധം ആരംഭിച്ച ഫെബ്രുവരി 28 മുതല്‍ ഇതുവരെ 2,800-ലധികം തവണയാണ് യുഎഇക്ക് നേരെ ഇറാന്റെ ആക്രമണമുണ്ടാകുന്നത്.

ഇറാന്റെ നടപടിയെ ഗള്‍ഫ് സഹകരണ കൗണ്‍സില്‍ (ജിസിസി) സെക്രട്ടറി ജനറല്‍ ജാസെം അല്‍ ബുദൈവി ശക്തമായി അപലപിച്ചു. മേഖലയിലെ സൈനിക നീക്കങ്ങളില്‍ സൗദി അറേബ്യയും ആശങ്ക രേഖപ്പെടുത്തി. സമാധാനം പുനഃസ്ഥാപിക്കാന്‍ നയതന്ത്ര ശ്രമങ്ങള്‍ ഊര്‍ജിതമാക്കണമെന്ന് സൗദി വിദേശകാര്യ മന്ത്രാലയം ആവശ്യപ്പെട്ടു.

ഫോട്ടോ: വ്യോമപ്രതിരോധ സംവിധാനം ഡ്രോണ്‍ തകര്‍ത്തതിനെത്തുടര്‍ന്നുണ്ടായ അവശിഷ്ടങ്ങള്‍ വീണ് ഫുജൈറ എണ്ണ വ്യവസായ മേഖലയില്‍ തീപിടുത്തവും പുകയും ഉയരുന്നു.