ജിദ്ദ- 2026 ഏപ്രില്‍ 26 മുതല്‍ മെയ് 2 വരെയുള്ള കാലയളവില്‍ സൗദി അറേബ്യയിലെ സിനിമാ തിയേറ്ററുകള്‍ മികച്ച പ്രകടനം കാഴ്ചവെച്ചു. ഫിലിം അതോറിറ്റിയുടെ കണക്കുകള്‍ പ്രകാരം 2.61 കോടി റിയാലിന്റെ ടിക്കറ്റ് വരുമാനമാണ് ഈ ഒരാഴ്ച കൊണ്ട് നേടിയത്. മലയാളം സിനിമ പാട്രിയറ്റും മികച്ച പ്രകടനം കാഴ്ചവെച്ചതായി കണക്കുകള്‍ വ്യക്തമാക്കുന്നു. പ്രദര്‍ശിപ്പിച്ച 43 ചിത്രങ്ങള്‍ക്കായി ഏകദേശം 4,75,800 ടിക്കറ്റുകളാണ് വിറ്റഴിഞ്ഞത്. സൗദിയിലെ വിനോദ മേഖലയുടെ വളര്‍ച്ചയും സിനിമാ സംസ്‌കാരത്തോടുള്ള ജനങ്ങളുടെ താല്‍പ്പര്യവുമാണ് ഈ കണക്കുകള്‍ സൂചിപ്പിക്കുന്നത്.

പ്രദര്‍ശിപ്പിച്ച ചിത്രങ്ങളില്‍ 'മൈക്കല്‍' എന്ന സിനിമയാണ് ബോക്‌സ് ഓഫീസില്‍ ഒന്നാമതെത്തിയത്. ഒരാഴ്ചയ്ക്കുള്ളില്‍ 1.32 കോടി റിയാല്‍ വരുമാനം നേടിയ ചിത്രം 2,05,000 ടിക്കറ്റുകളാണ് വിറ്റഴിച്ചത്. രണ്ടാം സ്ഥാനത്തുള്ള 'ദ ഡെവിള്‍ വിയേഴ്‌സ് പ്രാഡ 2' 65 ലക്ഷം റിയാല്‍ വരുമാനം നേടി. മൂന്നാം സ്ഥാനത്തുള്ള ഈജിപ്ഷ്യന്‍ ചിത്രം 'ബര്‍ഷാമ' റിലീസ് ചെയ്തത് മുതല്‍ ഇതുവരെ 3.29 കോടി റിയാല്‍ സമാഹരിച്ചു; ഇതില്‍ 35 ലക്ഷം റിയാല്‍ കഴിഞ്ഞ ഒരാഴ്ചത്തെ മാത്രം വരുമാനമാണ്.

പ്രാദേശികവും അന്തര്‍ദ്ദേശീയവുമായ ചിത്രങ്ങളുടെ ശക്തമായ സാന്നിധ്യമാണ് സൗദി തിയേറ്ററുകളില്‍ ദൃശ്യമായത്. അറബിക് ചിത്രങ്ങളായ 'സഫാ അല്‍ തഗമോ', 'ഷബാബ് അല്‍ ബോംബ് 3' എന്നിവ മികച്ച പ്രകടനം തുടരുമ്പോള്‍, 'ഡീപ് വാട്ടര്‍', 'ദ മമ്മി' തുടങ്ങിയ ഹോളിവുഡ് ചിത്രങ്ങളും കാണികളെ ആകര്‍ഷിക്കുന്നു. കൂടാതെ 'സൂപ്പര്‍ മാരിയോ ഗാലക്‌സി മൂവി', 'പേട്രിയറ്റ്', 'ഗോട്ട്' എന്നീ ചിത്രങ്ങളും കഴിഞ്ഞ ആഴ്ചയിലെ മികച്ച കളക്ഷന്‍ നേടിയ സിനിമകളുടെ പട്ടികയില്‍ ഇടംപിടിച്ചു.