റിയാദ്: ചക്കയുടെ വൈവിധ്യങ്ങളെല്ലാം ഒരു കുടക്കീഴില്‍ അണിനിരത്തി സൗദിയിലെ ലുലു ഹൈപ്പര്‍മാര്‍ക്കറ്റുകളില്‍ ചക്കവിരുന്നിന് തുടക്കമായി. മുമ്പ് കാണാത്ത വിധത്തിലുള്ള വൈവിധ്യമാര്‍ന്ന ചക്കയിനങ്ങളും ചക്ക വിഭവങ്ങളുമായി ഒരാഴ്ച നീണ്ടുനില്‍ക്കുന്ന വിരുന്നാണ് ലുലു ഒരുക്കിയിരിക്കുന്നത്.

കേരളത്തിന്റെ സ്വന്തം സിന്ദൂര്‍ വരിക്ക, കംബോഡിയ റെഡ്, തേന്‍ വരിക്ക, ദുരിയന്‍, മുള്ളന്‍ ചക്ക, ആഞ്ഞിലി ചക്ക, മഹാബലി, താമര ചക്ക, മലേഷ്യന്‍ യെല്ലോ, ജെയ്പാല്‍ യെല്ലോ, മുട്ടം വരിക്ക എന്നിവയ്ക്കൊപ്പം ശ്രീലങ്കന്‍ ചക്ക ഇനങ്ങളും ശ്രീലങ്കന്‍ ബ്രഡ് ഫ്രൂട്ടും (കടച്ചക്ക) ഉള്‍പ്പെടെ 21 വ്യത്യസ്ത തരം ഇനങ്ങളാണ് പ്രദര്‍ശനത്തിലുള്ളത്. ഇവയ്ക്ക് പുറമെ ചക്ക കൊണ്ടുണ്ടാക്കിയ വിവിധ രുചിക്കൂട്ടുകളും വിരുന്നിന്റെ ഭാഗമായി ഒരുക്കിയിട്ടുണ്ട്.

ലോകത്തിലെ ഏറ്റവും വലിയ പഴമെന്നറിയപ്പെടുന്ന ചക്ക, പോഷകഗുണങ്ങളുടെ കാര്യത്തിലും മുന്‍പന്തിയിലാണ്. ചക്കയുടെ എല്ലാ ഭാഗങ്ങളും ഭക്ഷ്യയോഗ്യമാണെന്നത് ഇതിന്റെ പ്രത്യേകതയാണ്. നാരുകള്‍, വിറ്റാമിനുകള്‍ എന്നിവയാല്‍ സമ്പുഷ്ടമായ ചക്ക ആരോഗ്യകരമായ ഭക്ഷണശൈലിയില്‍ ഉള്‍പ്പെടുത്തേണ്ട ഒന്നാണ്. പുതിയ ജീവിതശൈലിയില്‍ ചക്കയുടെ പ്രാധാന്യം എല്ലാവരിലേക്കും എത്തിക്കുക എന്ന ലക്ഷ്യത്തോടെയാണ് ലുലു ഈ പരിപാടി സംഘടിപ്പിക്കുന്നത്.

മെയ് 12 വരെ സൗദി അറേബ്യയിലെ എല്ലാ ലുലു ഹൈപ്പര്‍മാര്‍ക്കറ്റുകളിലും ചക്കവിരുന്ന് ഉണ്ടായിരിക്കും.