ചെന്നൈ: തമിഴ്നാട്ടില് പുതിയ സര്ക്കാര് രൂപീകരണവുമായി ബന്ധപ്പെട്ട അനിശ്ചിതത്വങ്ങള്ക്കൊടുവില് നിര്ണ്ണായക വഴിത്തിരിവ്. മൂന്ന് ദിവസത്തിനിടെ മൂന്നാം തവണയും ഗവര്ണര് ആര്.വി. അര്ലേക്കറെ സന്ദര്ശിച്ച തമിഴക വെട്രി കഴകം (ടിവികെ) അധ്യക്ഷനും നടനുമായ വിജയ്, സര്ക്കാര് രൂപീകരിക്കാന് അവകാശവാദം ഉന്നയിച്ചു. വിസികെ (വിടുതലൈ ചിരുതൈകള് കക്ഷി) വിജയ്ക്ക് നിരുപാധിക പിന്തുണ പ്രഖ്യാപിച്ചതോടെ തമിഴ്നാട് രാഷ്ട്രീയത്തിലെ 'നമ്പര് ഗെയിമിന്' അറുതിയാവുകയാണ്.
വെള്ളിയാഴ്ച രാജ്ഭവനിലെത്തിയാണ് വിജയ് ഗവര്ണറെ കണ്ടത്. ഭൂരിപക്ഷം തെളിയിക്കുന്ന 118 എംഎല്എമാരുടെ പിന്തുണ ഹാജരാക്കാന് കഴിയാത്തതിനാലാണ് വിജയ്യെ സത്യപ്രതിജ്ഞയ്ക്ക് ക്ഷണിക്കാത്തതെന്ന് ഗവര്ണറുടെ ഓഫീസ് നേരത്തെ വ്യക്തമാക്കിയിരുന്നു. ഐയുഎംഎല്, എഎംഎംകെ തുടങ്ങിയ കക്ഷികള് വിജയുടെ മുന്നണിക്ക് പിന്തുണ നല്കില്ലെന്ന് ഉറപ്പിച്ചു പറഞ്ഞതോടെ പ്രതിസന്ധി രൂക്ഷമായിരുന്നു. ബുധന്, വ്യാഴം ദിവസങ്ങളിലും വിജയ് ഗവര്ണറെ കണ്ടിരുന്നെങ്കിലും ഭൂരിപക്ഷം തെളിയിക്കാന് കഴിയാത്തതിനാല് അവകാശവാദം തള്ളുകയായിരുന്നു.
രണ്ട് എംഎല്എമാരുള്ള തിരുമാളവന്റെ വിസികെ വിജയ്ക്ക് നിരുപാധിക പിന്തുണ പ്രഖ്യാപിച്ചതാണ് ടിവികെയ്ക്ക് തുണയായത്. ഇതോടെ മാന്ത്രികസംഖ്യയായ 118 തികയ്ക്കാനും സര്ക്കാര് രൂപീകരിക്കാനുമുള്ള വഴി തെളിഞ്ഞതായി റിപ്പോര്ട്ടുകള് സൂചിപ്പിക്കുന്നു. ടിവികെ ജനറല് സെക്രട്ടറി ആദവ് അര്ജുന ഇന്ന് ഗവര്ണറെ കണ്ട് എംഎല്എമാരുടെ പിന്തുണ അറിയിക്കുന്ന കത്ത് കൈമാറുമെന്നാണ് സൂചന.
ഡിഎംകെ-എഐഎഡിഎംകെ സഖ്യമുണ്ടായാല് വിസികെ അധ്യക്ഷന് തോള് തിരുമാളവനെ മുഖ്യമന്ത്രിയാക്കുമെന്ന വാര്ത്തകള് എഐഎഡിഎംകെ തള്ളി. വെറും രണ്ട് സീറ്റുകള് മാത്രമുള്ള വിസികെയുടെ നേതാവിനെ മുഖ്യമന്ത്രി സ്ഥാനത്തേക്ക് പരിഗണിക്കുന്നില്ലെന്ന് പാര്ട്ടി വൃത്തങ്ങള് അറിയിച്ചു. ഇതോടെയാണ് വിസികെ വിജയ് ക്യാമ്പിലേക്ക് നീങ്ങിയതെന്നാണ് രാഷ്ട്രീയ നിരീക്ഷകര് വിലയിരുത്തുന്നത്.
ടിവികെ ജനറല് സെക്രട്ടറി ഇന്ന് ഗവര്ണറെ സന്ദര്ശിക്കുന്നതോടെ തമിഴ്നാട്ടിലെ പുതിയ ഭരണമാറ്റത്തിന് ഔദ്യോഗിക സ്ഥിരീകരണമുണ്ടായേക്കും.
Related News
