കാഠ്മണ്ഡു: നേപ്പാളിലെ പ്രധാന വിമാനത്താവളമായ ത്രിഭുവന് അന്താരാഷ്ട്ര വിമാനത്താവളത്തില് ഇറങ്ങുന്നതിനിടെ ടര്ക്കിഷ് എയര്ലൈന്സ് വിമാനത്തിന് തീപിടിച്ചു. ഇന്നു രാവിലെ നടന്ന അപകടത്തില് ആര്ക്കും പരിക്കേറ്റതായി റിപ്പോര്ട്ടില്ല. വിമാനത്തിലുണ്ടായിരുന്ന 278 യാത്രക്കാരെയും 11 ജീവനക്കാരെയും സുരക്ഷിതമായി ഒഴിപ്പിച്ചു. അപകടത്തെത്തുടര്ന്ന് വിമാനത്താവളം താല്ക്കാലികമായി അടച്ചു.
ഇസ്താംബൂളില് നിന്നുള്ള വിമാനം കാഠ്മണ്ഡുവില് ഇറങ്ങുന്നതിനിടെ വലതുവശത്തെ ലാന്ഡിംഗ് ഗിയറില് നിന്ന് തീയും പുകയും ഉയരുകയായിരുന്നു. ഉടന്തന്നെ വിമാനത്താവളത്തിലെ എമര്ജന്സി ക്രൂ സ്ഥലത്തെത്തി തീ നിയന്ത്രണവിധേയമാക്കി. അടിയന്തര വാതിലുകള് വഴിയാണ് യാത്രക്കാരെ പുറത്തെത്തിച്ചത്. യാത്രക്കാരില് ചില ഐക്യരാഷ്ട്രസഭ ഉദ്യോഗസ്ഥരും ഉള്പ്പെടുന്നു.
വിമാനത്തിന്റെ വലതുവശത്തെ ടയറുകള്ക്ക് തീപിടിച്ചതായും എന്നാല് ഉടന്തന്നെ സ്ഥിതിഗതികള് ശാന്തമാക്കിയെന്നും വിമാനത്താവള സുരക്ഷാ ചുമതലയുള്ള എസ്.പി രാജ്കുമാര് സിലാവല് പറഞ്ഞു. ലാന്ഡിംഗ് ഗിയറില് നിന്ന് ചാരനിറത്തിലുള്ള പുക ഉയരുന്നത് സോഷ്യല് മീഡിയയില് പ്രചരിക്കുന്ന വീഡിയോകളില് വ്യക്തമാണ്. അപകടത്തിന്റെ കൃത്യമായ കാരണം ഇതുവരെ വ്യക്തമായിട്ടില്ല. സംഭവത്തില് അന്വേഷണം ആരംഭിച്ചതായി വിമാനത്താവള അധികൃതര് അറിയിച്ചു.
Related News
