കണ്ണൂര്: കുട്ടികളിലെ പാലിയേറ്റീവ് കെയര് ചികിത്സാ സംവിധാനങ്ങളെ പിന്തുണയ്ക്കുന്നതിനായി ഇന്ത്യന് മെഡിക്കല് അസോസിയേഷന് (ഐ.എം.എ) പേഷ്യന്റ് കെയര് സ്കീമിന്റെ ആഭിമുഖ്യത്തില് സംസ്ഥാനവ്യാപകമായി സംഘടിപ്പിക്കുന്ന 'ലിറ്റില് സ്റ്റാര്' പദ്ധതിക്ക് തുടക്കമായി. പദ്ധതിയുടെ മേഖലാതല ഉദ്ഘാടനം ഐ.എം.എ ദേശീയ വൈസ് പ്രസിഡന്റ് ഡോ. ആര്. രമേശ് നിര്വഹിച്ചു.
തലശ്ശേരി മലബാര് ക്യാന്സര് സെന്റര് ഡയറക്ടര് ഡോ. സതീശന് ബാലസുബ്രഹ്മണ്യന് മുഖ്യാതിഥിയായിരുന്നു. ഐ.എം.എ ജില്ലാ ചെയര്പേഴ്സണ് ഡോ. മിനി ബാലകൃഷ്ണന്, ഐ.എം.എ പേഷ്യന്റ് കെയര് സ്കീം കോഡിനേറ്റര് ഡോ. സുല്ഫിക്കര് അലി, ഡിസ്ട്രിക്റ്റ് ക്യാന്സര് കണ്ട്രോള് കണ്സോര്ഷ്യം പ്രസിഡന്റ് നാരായണന് പുതുക്കോടി, പീഡിയാട്രിക് ഓങ്കോളജി ഡോക്ടര്മാരായ ഗോപകുമാര്, ജിതിന് എന്നിവര് ചടങ്ങില് സംബന്ധിച്ചു.
ഇന്ത്യന് അക്കാദമി ഓഫ് പീഡിയാട്രിക്സ് (ഐ.എ.പി), കണ്ണൂര് ഒബ്സ്റ്റട്രിക്സ് ആന്ഡ് ഗൈനക്കോളജി സൊസൈറ്റി എന്നിവയുടെ സഹകരണത്തോടെയാണ് പ്രൊജക്റ്റ് നടപ്പാക്കുന്നത്. തിരുവനന്തപുരം റീജിയണല് ക്യാന്സര് സെന്റര് മുതല് തലശ്ശേരി മലബാര് ക്യാന്സര് സെന്റര് വരെയുള്ള പ്രമുഖ ഇന്സ്റ്റിറ്റ്യൂട്ടുകളിലും സര്ക്കാര്, ഇതര ഏജന്സികള് നടത്തുന്ന പാലിയേറ്റീവ് കെയര് സെന്ററുകളിലും പദ്ധതിയുടെ സേവനം ലഭ്യമാകും. കാന്സര് ബാധിതരായ കുട്ടികള്ക്ക് ചികിത്സാസഹായത്തോടൊപ്പം പഠനസഹായവും സാന്ത്വന സഹായവും ഐ.എം.എയുടെ ചാരിറ്റി വിഭാഗമായ പേഷ്യന്റ് കെയര് സ്കീം ഉറപ്പാക്കുന്നുണ്ട്.
ഫോട്ടോ അടിക്കുറിപ്പ്: ഐ.എം.എ ലിറ്റില് സ്റ്റാര് പദ്ധതിയുടെ മേഖലാതല ഉദ്ഘാടനം ദേശീയ വൈസ് പ്രസിഡന്റ് ഡോ. ആര്. രമേശ് തലശ്ശേരി മലബാര് ക്യാന്സര് സെന്ററില് വെച്ച് നിര്വഹിക്കുന്നു.
Related News
