മുംബൈ- തുടര്‍ച്ചയായി മൂന്നാം ദിനവും എണ്ണ വില വര്‍ധിപ്പിച്ച് എണ്ണ കമ്പനികള്‍. മെയ് മാസം മാത്രം മൂന്നു തവണ പെട്രോളിനും ഡീസലിനും സിഎന്‍ജിക്കും വില കൂട്ടി. ശനിയാഴ്ച പെട്രോളിന് 87 പൈസയും ഡീസലിന് 91 പൈസയും കൂട്ടിയതോടെ മൊത്തം വില വര്‍ധന അഞ്ച് രൂപയായി. ഇത് 10 രൂപ വരെ ഉയരുമെന്നും പല ഘട്ടങ്ങളിലായിട്ടാകും വര്‍ധനവെന്നുമാണ് കരുതുന്നത്. എണ്ണ വിപണന കമ്പനികള്‍ വന്‍ നഷ്ടം നേരിടുന്നുണ്ടന്നും ഈ നഷ്ടം നികത്താന്‍ പത്തുരൂപ വരെ ഇനിയും വര്‍ധിപ്പിക്കേണ്ടിവരുമെന്നുമാണ് വിലയിരുത്തല്‍.
പെട്രോളിന് മെയ് 15ന് ലിറ്ററിന് 3 രൂപയും മെയ് 19ന് ലിറ്ററിന് 90 പൈസയും മെയ് 23ന് ലിറ്ററിന് 91 പൈസയുമാണ് കൂട്ടിയത്.

നിലവിലെ വിലവര്‍ധനവിന് ശേഷവും ഡീസല്‍ ലിറ്ററിന് 25 മുതല്‍ 30 രൂപ വരെയും പെട്രോളിന് 10 മുതല്‍ 14 രൂപ വരെയും നഷ്ടമുണ്ടെന്ന് ബിപിസിഎല്‍ ചെയര്‍മാന്‍ പറയുന്നു.
ഈ പാദത്തില്‍ എണ്ണ കമ്പനികളുടെ ആകെ നഷ്ടം 57,000 കോടി മുതല്‍ 58,000 കോടി രൂപ വരെയാകുമെന്ന് കണക്കാക്കപ്പെടുന്നു. കേന്ദ്ര സര്‍ക്കാര്‍ ഇറക്കുമതി നികുതി കുറച്ചിട്ടും കമ്പനികള്‍ ഓരോ ലിറ്ററിലും 17-18 രൂപയുടെ നഷ്ടം നേരിടുന്നുണ്ട്.

എണ്ണ കമ്പനികളുടെ നഷ്ടത്തിന്റെ പകുതിയെങ്കിലും നികത്താന്‍ ലിറ്ററിന് 10 രൂപ വരെ വര്‍ധിപ്പിക്കേണ്ടി വരും. ഒറ്റയടിക്കല്ലാതെ വരും ആഴ്ചകളില്‍ ചെറിയ തോതില്‍ വില കൂട്ടാനാണ് സാധ്യത.