ക്വറ്റ- തെക്കുപടിഞ്ഞാറന് പാകിസ്ഥാനിലെ ക്വറ്റയില് റെയില്വേ ട്രാക്കിന് സമീപമുണ്ടായ ശക്തമായ ബോംബ് സ്ഫോടനത്തില് 24-ലധികം ആളുകള് കൊല്ലപ്പെടുകയും അന്പതോളം പേര്ക്ക് പരിക്കേല്ക്കുകയും ചെയ്തതായി റിപ്പോര്ട്ട്. ബലൂചിസ്ഥാനിലെ സൈനിക ഉദ്യോഗസ്ഥരുമായി സഞ്ചരിച്ചിരുന്ന തീവണ്ടി ലക്ഷ്യമിട്ടായിരുന്നു ആക്രമണമെന്ന് വാര്ത്താ ഏജന്സിയായ എഎഫ്പി റിപ്പോര്ട്ട് ചെയ്യുന്നു. കൊല്ലപ്പെട്ടവരില് പാക് സൈനികരും ഉള്പ്പെടുന്നുണ്ടെന്നാണ് പ്രാഥമിക വിവരം.
സ്ഫോടനത്തെക്കുറിച്ചുള്ള കൂടുതല് വിവരങ്ങള് പുറത്തുവരുന്നതേയുള്ളൂ. റെയില്വേ ട്രാക്കിലാണ് സ്ഫോടനം നടന്നതെന്ന് ചില റിപ്പോര്ട്ടുകള് സൂചിപ്പിക്കുമ്പോള്, ട്രാക്കിന് തൊട്ടടുത്താണ് സ്ഫോടനമുണ്ടായതെന്നാണ് മറ്റ് ചില മാധ്യമങ്ങള് റിപ്പോര്ട്ട് ചെയ്യുന്നത്. തീവണ്ടി അതിന്റെ ലക്ഷ്യസ്ഥാനത്ത് എത്തുന്നതിന് വെറും ഒരു കിലോമീറ്റര് മാത്രം അകലെ വെച്ചാണ് സ്ഫോടകവസ്തു പൊട്ടിത്തെറിച്ചത്.
ശക്തമായ സ്ഫോടനത്തെത്തുടര്ന്ന് തീവണ്ടിയുടെ രണ്ട് ബോഗികള് മറിയുകയും ഇവയ്ക്ക് തീപിടിക്കുകയും ചെയ്തു. ദുരന്തസ്ഥലത്ത് നിന്നും കനത്ത കറുത്ത പുക ഉയരുന്ന ദൃശ്യങ്ങള് പുറത്തുവന്നിട്ടുണ്ട്. സ്ഫോടനം നടന്ന സ്ഥലത്തിന് സമീപം നിര്ത്തിയിട്ടിരുന്ന ചില വാഹനങ്ങള്ക്കും കേടുപാടുകള് സംഭവിച്ചതായി ദൃക്ഷാക്ഷികളെ ഉദ്ധരിച്ച് വാര്ത്താ ഏജന്സിയായ എപി റിപ്പോര്ട്ട് ചെയ്തു.
ആക്രമണത്തെക്കുറിച്ച് സുരക്ഷാ ഉദ്യോഗസ്ഥര് വിശദമായ അന്വേഷണം ആരംഭിച്ചതായി ബലൂചിസ്ഥാന് സര്ക്കാര് പ്രതിനിധി ബാബര് യൂസഫ്സായ് അറിയിച്ചു. എന്നാല് സംഭവത്തിന്റെ കൂടുതല് വിശദാംശങ്ങള് പുറത്തുവിടാന് അധികൃതര് തയ്യാറായിട്ടില്ല. ആക്രമണത്തിന്റെ ഉത്തരവാദിത്തം ഇതുവരെ ആരും ഏറ്റെടുത്തിട്ടില്ല.
Related News
