ദുബായ്: നാല് പതിറ്റാണ്ടിലേറെയായി യുഎഇയിലെ റാസല്ഖൈമയില് പ്രവാസികളായ കൊല്ലം കടയ്ക്കല് അഞ്ചുമുക്ക് 'ഉഷസ്സി'ല് എസ്. സുഗതന് (67), ഭാര്യ ലത (55) എന്നിവരെ നാട്ടിലെ വീട്ടിനുള്ളില് മരിച്ച നിലയില് കണ്ടെത്തി. ഷാര്ജയില് മലയാളി യുവതി മകളെ കെട്ടിടത്തില്നിന്ന് താഴേക്കെറിഞ്ഞ് കൊലപ്പെടുത്തിയ ശേഷം സ്വയം ചാടി മരിച്ചതിന്റെ നടുക്കം മാറും മുന്പേയാണ് പ്രവാസി സമൂഹത്തെ വീണ്ടും ദുഖത്തിലാഴ്ത്തി ഈ ദാരുണ സംഭവം ഉണ്ടായത്.
മൂന്ന് ദിവസം മുന്പാണ് ഇരുവരും നാട്ടിലെത്തിയത്. ശനിയാഴ്ച രാവിലെ ദുബായിലേക്ക് തിരികെ പോകാന് ടിക്കറ്റും ബുക്ക് ചെയ്തിരുന്നു. എന്നാല്, യാത്രയ്ക്കായി കൊടുത്തുവിടാന് അച്ചാറുമായി എത്തിയ ബന്ധുക്കള് വിളിച്ചിട്ടും വാതില് തുറക്കാത്തതിനെ തുടര്ന്ന് നടത്തിയ പരിശോധനയിലാണ് കിടപ്പുമുറിയില് മൃതദേഹങ്ങള് കണ്ടെത്തിയത്. അകത്തുനിന്ന് പൂട്ടിയ നിലയിലായിരുന്നു മുറി.
അധികൃതരെത്തി മുറി തുറന്ന് പരിശോധിച്ചപ്പോള് സുഗതനെ തൂങ്ങിമരിച്ച നിലയിലും ലതയെ കട്ടിലില് മരിച്ച നിലയിലുമാണ് കണ്ടെത്തിയത്. ലതയെ ശ്വാസംമുട്ടിച്ചു കൊലപ്പെടുത്തിയ ശേഷം സുഗതന് ജീവനൊടുക്കിയതാകാമെന്നാണ് പൊലീസിന്റെ പ്രാഥമിക നിഗമനം. സംഭവസ്ഥലത്തുനിന്ന് ആത്മഹത്യാക്കുറിപ്പുകളൊന്നും ലഭിച്ചിട്ടില്ല. ഈ സമയം സുഗതന്റെ പ്രായമായ അമ്മയും വീട്ടിലുണ്ടായിരുന്നു.
1979 മുതല് റാസല്ഖൈമയിലുള്ള സുഗതന് അവിടെ സ്വന്തമായി കണ്സ്ട്രക്ഷന് കമ്പനിയും റസ്റ്ററന്റും നടത്തിവരികയായിരുന്നു. നാട്ടില് ആറ്റിങ്ങലില് ഒരു ബാര് ഏറ്റെടുത്ത് നടത്തിയിരുന്നെങ്കിലും പിന്നീട് മകന് ഷാനിത്തിന് ഇതിന്റെ ചുമതല കൈമാറി. മികച്ച നിലയില് ബിസിനസ് മുന്നോട്ടുകൊണ്ടുപോയിരുന്ന ഇവര്ക്ക് കോവിഡ് കാലത്ത് ചില പ്രയാസങ്ങള് നേരിട്ടെങ്കിലും അത് തരണം ചെയ്തിരുന്നു. ആറ്റിങ്ങലിലെ ബാറുമായി ബന്ധപ്പെട്ട് ചില സാമ്പത്തിക ഇടപാട് തര്ക്കങ്ങള് ഉണ്ടായിരുന്നതായി പറയപ്പെടുന്നുണ്ടെങ്കിലും, റാസല്ഖൈമയിലും നാട്ടിലുമായി ഒട്ടേറെ സമ്പത്തുള്ളതിനാല് മരണകാരണം വെറും സാമ്പത്തിക ബാധ്യതയാണെന്ന് കരുതാനാകില്ലെന്ന് സുഹൃത്തുക്കള് പറയുന്നു.
റാസല്ഖൈമയിലെ മലയാളി പ്രവാസികള്ക്കിടയില് ഏറെ പ്രിയപ്പെട്ടവനായിരുന്നു സുഗതന്. അവിടുത്തെ സാമൂഹിക സാംസ്കാരിക പരിപാടികളില് സജീവ സാന്നിധ്യമായിരുന്ന അദ്ദേഹം എസ്എന്ഡിപി യോഗം 'സേവനം' സംഘടനയുടെ സജീവ പ്രവര്ത്തകന് കൂടിയായിരുന്നു. 'പണം ജീവിതത്തില് സമാധാനം നല്കില്ല എന്നതാണ് ഇത്തരം സംഭവങ്ങള് നല്കുന്ന സന്ദേശം,' സുഗതന്റെ വിയോഗത്തില് നടുക്കം രേഖപ്പെടുത്തിക്കൊണ്ട് സുഹൃത്തുക്കള് പറഞ്ഞു.
മാതാപിതാക്കളുടെ മരണവിവരമറിഞ്ഞ് യുഎഇയിലുള്ള മക്കളായ ഷാനിത്തും അശ്വതിയും നാട്ടിലെത്തിയിട്ടുണ്ട്. മരുമകള്: വിദ്യ. കടയ്ക്കല് പൊലീസ് കേസ് രജിസ്റ്റര് ചെയ്ത് വിശദമായ അന്വേഷണം നടത്തിവരികയാണ്.
Related News
