പുണെയില് വ്യാജമദ്യം കഴിച്ച് 15 പേര് മരിച്ചു
പുണെ: മഹാരാഷ്ട്രയിലെ പുണെയില് വ്യാജമദ്യം കഴിച്ച് കഴിഞ്ഞ രണ്ട് ദിവസത്തിനിടെ 15 പേര് മരിച്ചു. പിംപ്രി-ചിഞ്ച്വാഡിലെ ഫുഗേവാഡ് പുണെ നഗരത്തിലെ ഹദപ്സര് എന്നിവിടങ്ങളില് നിന്നുള്ളവരാണ് മരിച്ചത്. സംഭവവുമായി ബന്ധപ്പെട്ട് വ്യാജമദ്യ വിപണന ശൃംഖലയിലെ ഒരാളെ പോലീസ് അറസ്റ്റ് ചെയ്തിട്ടുണ്ട്. പ്രദേശത്ത് അനധികൃതമായി മദ്യവില്പന നടത്തുന്ന കേന്ദ്രങ്ങള് കേന്ദ്രീകരിച്ച് പോലീസ് അന്വേഷണം ഊര്ജിതമാക്കി.
ഉത്തര്പ്രദേശില് നിര്മാണത്തിലിരുന്ന പാലം തകര്ന്ന് ആറ് മരണം
ലഖ്നോ: ഉത്തര്പ്രദേശിലെ ഹാമിര്പൂര് ജില്ലയില് ബെത്വ നദിക്ക് കുറുകെ നിര്മാണത്തിലിരുന്ന പാലത്തിന്റെ ഒരു ഭാഗം തകര്ന്ന് വീണ് ആറ് നിര്മാണ തൊഴിലാളികള് മരണപ്പെട്ടു. വ്യാഴാഴ്ച രാത്രി വൈകി പ്രദേശത്തുണ്ടായ ശക്തമായ ഇടിയോടു കൂടിയ കൊടുങ്കാറ്റിലും കനത്ത മഴയിലുമാണ് അപകടം സംഭവിച്ചത്. മഴ പെയ്തപ്പോള് തൊഴിലാളികള് ക്രെയിനിന് താഴെ അഭയം പ്രാപിച്ച സമയത്താണ് കോണ്ക്രീറ്റ് തൂണുകളും സ്ലാബും തകര്ന്ന് ഇവരുടെ മേലേക്ക് വീണത്. അവശിഷ്ടങ്ങള്ക്കിടയില് കുടുങ്ങിക്കിടക്കുന്ന മറ്റ് തൊഴിലാളികള്ക്കായുള്ള തിരച്ചില് തുടരുകയാണ്.
മണ്സൂണ് മഴയില് കുറവുണ്ടാകുമെന്ന് കാലാവസ്ഥാ വകുപ്പ്
ന്യൂദല്ഹി: രാജ്യത്ത് ഈ വര്ഷത്തെ തെക്കുപടിഞ്ഞാറന് മണ്സൂണ് കാലയളവില് ലഭിക്കുന്ന മഴയുടെ അളവ് സാധാരണ നിലയേക്കാള് കുറവായിരിക്കുമെന്ന് കേന്ദ്ര കാലാവസ്ഥാ വകുപ്പ് മുന്നറിയിപ്പ് നല്കി. മുന്പ് ഏപ്രില് മാസത്തില് പ്രവചിച്ചിരുന്ന 92 ശതമാനത്തില് നിന്നും ദീര്ഘകാല ശരാശരിയുടെ 90 ശതമാനമായി ഐഎംഡി മഴയുടെ സാധ്യത കുറച്ചു. സമീപകാലത്ത് മണ്സൂണ് പ്രവചനത്തില് ഉണ്ടാകുന്ന ഏറ്റവും കുറഞ്ഞ നിരക്കാണിത്. ജൂണ് ആദ്യവാരത്തോടെ മണ്സൂണ് സജീവമാകുമെങ്കിലും കര്ഷകര്ക്കും കാര്ഷിക മേഖലയ്ക്കും ആശങ്ക നല്കുന്നതാണ് പുതിയ പ്രവചനം.
രാജ്യവ്യാപകമായി എന്.ഐ.എ റെയ്ഡ്; പാക് ബന്ധമുള്ള ആയുധ ഗൂഢാലോചന
പഞ്ചാബിലും ഡല്ഹിയിലും ഉള്പ്പെടെ രാജ്യത്തിന്റെ വിവിധ ഭാഗങ്ങളില് സ്ഫോടനങ്ങള് നടത്താന് പാകിസ്ഥാന് കേന്ദ്രീകരിച്ച് നടന്ന ആയുധ, ഐ.ഇ.ഡി കടത്ത് ഗൂഢാലോചനയുമായി ബന്ധപ്പെട്ട് ദേശീയ അന്വേഷണ ഏജന്സി പരിശോധന നടത്തി. ജാസ്വിര് ചൗധരി എന്ന പാക് ഏജന്റുമായി ബന്ധപ്പെട്ട കേസില് ഉത്തര്പ്രദേശ്, രാജസ്ഥാന്, ബീഹാര്, മഹാരാഷ്ട്ര എന്നീ നാല് സംസ്ഥാനങ്ങളിലെ 12 കേന്ദ്രങ്ങളിലാണ് ഒരേസമയം റെയ്ഡ് നടന്നത്. രാജ്യസുരക്ഷയെ ബാധിക്കുന്ന നിരവധി നിര്ണായക വിവരങ്ങളും രേഖകളും പരിശോധനയില് കണ്ടെത്തിയതായാണ് വിവരം.
Related News
