സിംഗപ്പൂര്: ഇറാനുമായുള്ള സമാധാന ചര്ച്ചകള് പരാജയപ്പെടുകയാണെങ്കില് രാജ്യാന്തര തലത്തില് വീണ്ടും ആക്രമണം ആരംഭിക്കാന് അമേരിക്ക പൂര്ണ്ണ സജ്ജമാണെന്ന് യുഎസ് പ്രതിരോധ സെക്രട്ടറി പീറ്റ് ഹെഗ്സെത്ത്. സിംഗപ്പൂരില് നടക്കുന്ന ഏഷ്യയിലെ പ്രമുഖ പ്രതിരോധ ഉച്ചകോടിയായ 'ഷാംഗ്രി-ലാ ഡയലോഗില്' സംസാരിക്കുകയായിരുന്നു അദ്ദേഹം. യുദ്ധം അവസാനിപ്പിക്കുന്നത് സംബന്ധിച്ച് വാഷിംഗ്ടണും ടെഹ്റാനും തമ്മിലുള്ള ഭിന്നതകള് പരിഹരിക്കാന് ഇരുവിഭാഗവും തീവ്രശ്രമം നടത്തുന്നതിനിടയിലാണ് ഹെഗ്സെത്തിന്റെ ഈ മുന്നറിയിപ്പ്.
'ആവശ്യമെങ്കില് ആക്രമണം പുനരാരംഭിക്കാന് ഞങ്ങള്ക്ക് സാധിക്കും. അതിനുള്ള എല്ലാ ശേഷിയും അമേരിക്കയ്ക്കുണ്ട്. ഇതിനായി ലോകമെമ്പാടുമുള്ള ഞങ്ങളുടെ ആയുധശേഖരം പൂര്ണ്ണ സജ്ജമാണ്,' ഹെഗ്സെത്ത് വ്യക്തമാക്കി. ഇറാനുമായുള്ള സംഘര്ഷങ്ങളില് ഏര്പ്പെട്ടിരിക്കുകയാണെങ്കിലും, ഏഷ്യാ-പസഫിക് മേഖലയില് നിന്നുള്ള ശ്രദ്ധ അമേരിക്ക മാറ്റിയിട്ടില്ലെന്നും അദ്ദേഹം കൂട്ടിച്ചേര്ത്തു. പ്രതിരോധ മേഖലയിലെ ഉത്പാദനം രണ്ട് മുതല് നാലിരട്ടി വരെയായി വര്ദ്ധിപ്പിക്കാനുള്ള നടപടികളിലാണ് അമേരിക്കയെന്നും അദ്ദേഹം പറഞ്ഞു.
ഇറാന് ഒരു തരത്തിലും ആണവായുധം കൈക്കലാക്കില്ലെന്ന് ഉറപ്പുവരുത്തുന്ന ഒരു 'മികച്ച കരാറാണ്' പ്രസിഡന്റ് ഡൊണാള്ഡ് ട്രംപ് ആഗ്രഹിക്കുന്നതെന്നും ഇതിനായി അദ്ദേഹം ക്ഷമയോടെ കാത്തിരിക്കുകയാണെന്നും ഹെഗ്സെത്ത് അറിയിച്ചു. ഏപ്രില് ആദ്യം നിലവില് വന്ന താല്ക്കാലിക വെടിനിര്ത്തല് 60 ദിവസത്തേക്ക് കൂടി നീട്ടുന്നതിനുള്ള നിര്ദ്ദേശത്തില് അന്തിമ തീരുമാനമെടുക്കാന് വൈറ്റ് ഹൗസില് യോഗം ചേരുമെന്ന് ട്രംപും വ്യക്തമാക്കിയിരുന്നു.
കഴിഞ്ഞ ഫെബ്രുവരി 28-ന് അമേരിക്കയും ഇസ്രായേലും ചേര്ന്ന് ആരംഭിച്ച യുദ്ധത്തില് ഇറാനിലും ലെബനനിലുമായി ഇതിനകം ആയിരക്കണക്കിന് ആളുകളാണ് കൊല്ലപ്പെട്ടത്. ഇറാന് ഹോര്മുസ് കടലിടുക്ക് അടച്ചതിനെ തുടര്ന്ന് ആഗോളതലത്തില് ഇന്ധനവില കുതിച്ചുയരുകയും ഇത് വന് സാമ്പത്തിക പ്രതിസന്ധിക്ക് കാരണമാവുകയും ചെയ്തിരുന്നു.
ചൈനയുടെ വര്ദ്ധിച്ചുവരുന്ന സൈനിക ശക്തിയെ പ്രതിരോധിക്കാന് ഏഷ്യന് സഖ്യകക്ഷികള് പ്രതിരോധ ചെലവുകള് ഉയര്ത്തണമെന്ന് പീറ്റ് ഹെഗ്സെത്ത് ആവശ്യപ്പെട്ടു. ചൈനയുടെ അതിവേഗത്തിലുള്ള സൈനിക വളര്ച്ച ആശങ്കാജനകമാണ്. പസഫിക് മേഖലയില് ഏതെങ്കിലും ഒരു രാജ്യം മേധാവിത്വം സ്ഥാപിക്കുന്നത് പ്രാദേശിക സന്തുലിതാവസ്ഥയെ തകര്ക്കും. ചൈന ഉള്പ്പെടെയുള്ള ഒരു രാജ്യത്തിനും തങ്ങളുടെയോ സഖ്യകക്ഷികളുടെയോ സുരക്ഷ ചോദ്യം ചെയ്യാന് അനുവാദമില്ലെന്നും അദ്ദേഹം ഓര്മ്മിപ്പിച്ചു.
സഖ്യകക്ഷികള് തങ്ങളുടെ പ്രതിരോധ ചെലവുകള് സ്വന്തമായി വഹിക്കണമെന്ന പ്രസിഡന്റ് ഡൊണാള്ഡ് ട്രംപിന്റെ നിലപാട് ഹെഗ്സെത്ത് വീണ്ടും ഊന്നിപ്പറഞ്ഞു. 'സമ്പന്ന രാജ്യങ്ങളുടെ പ്രതിരോധത്തിനായി അമേരിക്ക സബ്സിഡി നല്കുന്ന കാലം കഴിഞ്ഞു. ഞങ്ങള്ക്ക് പങ്കാളികളെയാണ് വേണ്ടത്, അല്ലാതെ ഞങ്ങളുടെ സംരക്ഷണത്തില് കഴിയുന്നവരെയല്ല. എല്ലാവര്ക്കും പങ്കാളിത്തമില്ലെങ്കില് ആ സഖ്യത്തിന് ശക്തിയുണ്ടാകില്ല. ഇനി സൗജന്യ സംരക്ഷണം ഉണ്ടാകില്ല,' ഹെഗ്സെത്ത് കര്ശനമായി പറഞ്ഞു.
ദക്ഷിണ കൊറിയ, ഫിലിപ്പീന്സ്, ഓസ്ട്രേലിയ, സിംഗപ്പൂര്, മലേഷ്യ, തായ്ലന്ഡ് എന്നീ രാജ്യങ്ങളുടെ പങ്കാളിത്തത്തെ അദ്ദേഹം പ്രശംസിച്ചു. ഒപ്പം പ്രതിരോധം ശക്തമാക്കാന് ജപ്പാന് സ്വീകരിക്കുന്ന നടപടികളെ സ്വാഗതം ചെയ്ത അദ്ദേഹം, യുഎസ്-ജപ്പാന് സഖ്യം കൂടുതല് ശക്തമാക്കാന് ഇരുരാജ്യങ്ങളും ഒരുപോലെ ഉത്തരവാദിത്തം കാണിക്കണമെന്നും ആവശ്യപ്പെട്ടു.
Related News
