പെരുമ്പാവൂര്‍/ദമ്മാം: ജോലിസ്ഥലത്ത് കെട്ടിടത്തിന് മുകളില്‍ നിന്ന് വീണ് മരണപ്പെട്ട വളയന്‍ചിറങ്ങര കൊട്ടനാട്ടുപാറ മുസ്തഫ അഹമ്മദിന്റെ മൃതദേഹം നാളെ വെള്ളിയാഴ്ച നാട്ടില്‍ ഖബറടക്കും. 12 വര്‍ഷമായി സൗദി അറേബ്യയില്‍ പ്രവാസിയായിരുന്ന മുസ്തഫ, കഴിഞ്ഞ മൂന്ന് വര്‍ഷമായി ദമ്മാം ഗൗവ്വൂം കോണ്‍ക്രീറ്റ് റെഡിമിക്‌സ് കമ്പനിയില്‍ ട്രക്ക് ഡ്രൈവറായി ജോലി ചെയ്തു വരികയായിരുന്നു. ജൂണ്‍ ഒന്നിന് വര്‍ക്ക് സൈറ്റിലുണ്ടായ അപകടത്തിലാണ് മരണപ്പെട്ടത്.

സൗദി അല്‍ഖോബാര്‍ കെ.എം.സി.സി. പ്രസിഡന്റും കിഴക്കന്‍ പ്രവിശ്യാ കെ.എം.സി.സി. വെല്‍ഫെയര്‍ വിംഗ് അംഗവുമായ ഇക്ബാല്‍ ആനമങ്ങാടിന്റെ നേതൃത്വത്തില്‍ നിയമനടപടികള്‍ പൂര്‍ത്തിയാക്കിയാണ് മൃതദേഹം നാട്ടിലെത്തിക്കുന്നത്. ദമ്മാം കിംഗ് ഫഹദ് അന്താരാഷ്ട്ര വിമാനത്താവളത്തില്‍ നിന്ന് വ്യാഴാഴ്ച അര്‍ദ്ധരാത്രി പുറപ്പെടുന്ന വിമാനത്തിലെ മൃതദേഹം വെള്ളിയാഴ്ച രാവിലെ 10 മണിക്ക് നെടുമ്പാശ്ശേരി വിമാനത്താവളത്തില്‍ എത്തിക്കും. തുടര്‍ന്ന് 11.30-ന് വളയന്‍ചിറങ്ങര കുര്യതോള്‍ ജുമാ മസ്ജിദില്‍ ഖബറടക്കും.

ഒരു കുടുംബത്തിന്റെ അത്താണി മാത്രമല്ല, നാട്ടിലെ നിരവധി ആളുകളുമായി ഹൃദയബന്ധം സൂക്ഷിച്ച വ്യക്തി കൂടിയായിരുന്നു മുസ്തഫ. അദ്ദേഹത്തിന്റെ വിയോഗം വളയന്‍ചിറങ്ങര എന്ന നാടിന്റെയാകെ വേദനയാവുകയാണ്. പിതാവ്: അഹമ്മദ്, മാതാവ്: പാത്തുമ്മ, ഭാര്യ: ലുബാബ, മക്കള്‍: ദിയ, ഹൈദര്‍, ആദം.