ടുലൂസ്: മധ്യപൂര്‍വേഷ്യയിലെയും ആഫ്രിക്കയിലെയും ആദ്യത്തെ എയര്‍ബസ് A321XLR വിമാനം സൗദി അറേബ്യയുടെ ദേശീയ വിമാനക്കമ്പനിയായ സൗദിയ ഏറ്റുവാങ്ങി. ടുലൂസില്‍ നടന്ന ചടങ്ങിലാണ് അത്യാധുനിക സൗകര്യങ്ങളുള്ള ഈ എക്‌സ്ട്രാ ലോംഗ്-റേഞ്ച് വിമാനം സൗദിയയുടെ ഭാഗമായത്. വിമാനക്കമ്പനിയുടെ വിപുലീകരണ പദ്ധതികളിലെ നിര്‍ണ്ണായക നാഴികക്കല്ലാണിത്.

8,700 കിലോമീറ്റര്‍ വരെ സഞ്ചരിക്കാന്‍ ശേഷിയുള്ളതാണ് ഈ വിമാനം. ഒന്‍പത് മണിക്കൂര്‍ വരെ തുടര്‍ച്ചയായി പറക്കാന്‍ കഴിയുന്നതിനാല്‍, ദീര്‍ഘദൂര അന്താരാഷ്ട്ര സര്‍വീസുകള്‍ കൂടുതല്‍ കാര്യക്ഷമമായി നടത്താന്‍ ഈ നാരോ-ബോഡി വിമാനം സഹായിക്കും. 'ദി ന്യൂ സൗദിയ എക്‌സ്പീരിയന്‍സ്' എന്ന പേരിലുള്ള പുതിയ ക്യാബിന്‍ സൗകര്യങ്ങള്‍ ഉള്‍പ്പെടുത്തിയ ആദ്യ വിമാനം കൂടിയാണിത്.

സ്വകാര്യതയ്ക്കും ആഡംബരത്തിനുമായി 24 ബിസിനസ് ക്ലാസ് സ്യൂട്ടുകള്‍. ഗസ്റ്റ് ക്ലാസ്: മെച്ചപ്പെടുത്തിയ സീറ്റുകള്‍, 13 ഇഞ്ച് വിനോദ സ്‌ക്രീനുകള്‍, ചാര്‍ജിംഗ് പോര്‍ട്ടുകള്‍ എന്നിവ സഹിതം 120 സീറ്റുകള്‍. ഹൈ-സ്പീഡ് ഇന്‍-ഫ്‌ലൈറ്റ് ഇന്റര്‍നെറ്റ് സൗകര്യം, ബിസിനസ് ക്ലാസില്‍ ഇന്‍-ഫ്‌ലൈറ്റ് ഷെഫ് സേവനം തുടങ്ങിയവ ഇതിന്റെ പ്രത്യേകതകളാണ്.

സൗദി വിഷന്‍ 2030-ന്റെ ഭാഗമായി വിനോദസഞ്ചാരം, ബിസിനസ് യാത്രകള്‍, തീര്‍ത്ഥാടകര്‍ക്ക് വേണ്ടിയുള്ള സര്‍വീസുകള്‍ എന്നിവ വര്‍ധിപ്പിക്കുന്നതിന്റെ ഭാഗമായാണ് പുതിയ വിമാനങ്ങള്‍ ഉള്‍പ്പെടുത്തുന്നത്. 2027-ഓടെ ഇത്തരത്തില്‍ 15 എയര്‍ബസ് A321XLR വിമാനങ്ങള്‍ സൗദിയയുടെ ഭാഗമാകും. എയര്‍ബസുമായി സൗദിയ നേരത്തെ ഒപ്പിട്ട 105 വിമാനങ്ങള്‍ വാങ്ങാനുള്ള കരാര്‍, സൗദിയിലെ വ്യവസായ മേഖലയ്ക്കും വിമാന നിര്‍മ്മാണ മേഖലയ്ക്കും വലിയ ഉത്തേജനം നല്‍കുമെന്ന് അധികൃതര്‍ അറിയിച്ചു.

ഏഷ്യന്‍ കപ്പ് 2027, എക്‌സ്‌പോ 2030, 2034 ഫിഫ വേള്‍ഡ് കപ്പ് തുടങ്ങി വരാനിരിക്കുന്ന വമ്പന്‍ രാജ്യാന്തര പരിപാടികള്‍ കണക്കിലെടുത്ത് സൗദിയുടെ വ്യോമയാന മേഖലയെ കൂടുതല്‍ ശക്തമാക്കുകയാണ് ഈ നീക്കത്തിലൂടെ ലക്ഷ്യമിടുന്നത്. സൗദിയയുടെ സേവനങ്ങള്‍ കൂടുതല്‍ മികവുറ്റതാക്കാനും ആഗോളതലത്തില്‍ മത്സരക്ഷമത വര്‍ധിപ്പിക്കാനും പുതിയ വിമാനങ്ങളുടെ വരവ് സഹായിക്കുമെന്ന് സൗദിയ ഗ്രൂപ്പ് ഡയറക്ടര്‍ ജനറല്‍ ഇബ്രാഹിം അല്‍-ഒമര്‍ പറഞ്ഞു.