തൃശൂര്‍- ഏറെ ആഗ്രഹിച്ച് ലഭിച്ച വീട്ടില്‍ താമസം തുടങ്ങും മുന്‍പ് യുവാവ് കാറ്റില്‍ മരംവീണ് മരിച്ചു. പണിതീരാത്ത വീട്ടിലുറങ്ങിയ അമ്മ രക്ഷപ്പെട്ടു. മണലൂര്‍ രണ്ടാം വാര്‍ഡിലെ ഗോതമ്പ് റോഡില്‍ താമസിക്കുന്ന മരംമുറിത്തൊഴിലാളി തൃപ്രണത്ത് വിഷ്ണു (28) ആണ് മരിച്ചത്. വീടുപണിയുടെ ഭാഗമായി വീടിനോടുചേര്‍ന്ന് കെട്ടിയ ഓലഷെഡ്ഡിലാണ് വിഷ്ണു ഉറങ്ങിയിരുന്നത്. ശനിയാഴ്ച പുലര്‍ച്ചെ ഉണ്ടായ ശക്തമായ കാറ്റില്‍ കശുമാവ് കടപുഴകി ഷെഡ്ഡിലേക്ക് വീഴുകയായിരുന്നു. രാവിലെയാണ് വിഷ്ണുവിനെ മരത്തിനടിയില്‍ കുടുങ്ങിയ നിലയില്‍ കണ്ടെത്തിയത്.

ലൈഫ് പദ്ധതിയില്‍ അനുവദിച്ച വീടിന്റെ വാര്‍പ്പുപണി മാത്രം കഴിഞ്ഞിരുന്നു. അതുകൊണ്ട് ഈ വീട്ടിലാണ് അമ്മ വള്ളിയമ്മ കിടന്നത്. സാധാരണ ഇവിടെയാണ് വിഷ്ണുവും ഉറങ്ങാറുള്ളത്. എന്നാല്‍, ഫുട്‌ബോള്‍ ലോകകപ്പ് സന്നാഹമത്സരങ്ങള്‍ തുടങ്ങിയതോടെ രാത്രി ഷെഡ്ഡിലിരുന്ന് മൊബൈല്‍ ഫോണില്‍ മുടങ്ങാതെ കളി ാണുമായിരുന്നു.

അമ്മ തന്നെയാണ് രാവിലെ മരം വീണുകിടക്കുന്നത് ആദ്യം കണ്ടത്. മരം മുറിച്ചുമാറ്റിയെങ്കിലും മരണം സംഭവിച്ചിരുന്നു. തൊഴിലുറപ്പ് തൊഴിലാളിയാണ് വള്ളിയമ്മ. അച്ഛന്‍ സുബ്രന്‍ നേരത്തേ മരിച്ചു. മണലൂര്‍ എം.എല്‍.എ. സി. രവീന്ദ്രനാഥ്, മുന്‍ എം.പി. ടി.എന്‍. പ്രതാപന്‍ എന്നിവര്‍ വിഷ്ണുവിന്റെ വീട് സന്ദര്‍ശിച്ചു.