ജിസാന്‍: ഉത്തര്‍പ്രദേശ് ചന്ദ്പുര്‍ സ്വദേശി മുഹമ്മദ് വസീഫ് (34) ജിസാന്‍ ജനറല്‍ ആശുപത്രിയില്‍ മരിച്ചു. കഴിഞ്ഞ 12 വര്‍ഷമായി ജിസാനില്‍ ഡ്രൈവറായി ജോലി ചെയ്തുവരികയായിരുന്നു. ക്യാന്‍സര്‍ ബാധിതനായി ചികിത്സയിലിരിക്കെയാണ് മരണം.

ഇദ്ദേഹത്തിന്റെ സഹോദരന്‍ ഷാരിഖ് നഫീസ് അഹമ്മദിന്റെ പേരില്‍ പവര്‍ ഓഫ് അറ്റോര്‍ണി ലഭ്യമാക്കി, മൃതദേഹം ജിസാനില്‍ തന്നെ ഖബറടക്കുന്നതിനുള്ള നടപടികളുമായി കെഎംസിസി വെല്‍ഫെയര്‍ വിങ് രംഗത്തുണ്ട്. സി.സി.ഡബ്ല്യു.എ അംഗവും ജിസാന്‍ കെഎംസിസി പ്രസിഡണ്ടുമായ ഷംസു പൂക്കോട്ടൂര്‍, സിറാജ് പുല്ലൂരാംപാറ എന്നിവരുടെ നേതൃത്വത്തില്‍ തുടര്‍നടപടികള്‍ പുരോഗമിക്കുന്നു.

പരേതന്റെ മാതാപിതാക്കള്‍ നേരത്തെ മരണപ്പെട്ടിരുന്നു. സഹോദരന്‍ ഷാരിഖിനെ കൂടാതെ ഷീന പര്‍വീണ്‍, ഷൈമ പര്‍വീണ്‍ എന്നിങ്ങനെ രണ്ട് സഹോദരിമാരുമുണ്ട്.