ദമ്മാം: പ്രവാസി വെല്ഫെയര് സൗദി അറേബ്യ, ദമ്മാം കണ്ണൂര് കാസര്കോട് വനിതാ വിഭാഗത്തിന്റെ ആഭിമുഖ്യത്തില് വനിതാ ശാക്തീകരണ പരിപാടി സംഘടിപ്പിച്ചു. വനിതകളുടെ വ്യക്തിത്വ വികസനം, സംരംഭകത്വം, ആശയവിനിമയ മികവ് എന്നിവ ലക്ഷ്യമിട്ടായിരുന്നു പരിപാടി.
റജ്ന അസ്ലം അവതാരകയായ പരിപാടിയില് ഖദീജ സജ്റാസ് സ്വാഗതം ആശംസിച്ചു. പ്രവാസി വെല്ഫെയര് ദമ്മാം കണ്ണൂര് കാസര്കോട് വൈസ് പ്രസിഡന്റ് ഫാത്തിമ ഹാഷിം സംഘടനയുടെ പ്രവര്ത്തനങ്ങളും ലക്ഷ്യങ്ങളും പരിചയപ്പെടുത്തി. പൊതുപ്രസംഗ പരിശീലകയായ മജ്ബൂറ നൗഫല് നയിച്ച ആദ്യ സെഷനില്, ആത്മവിശ്വാസം വര്ധിപ്പിക്കുന്നതിനും ആശയങ്ങള് ഫലപ്രദമായി അവതരിപ്പിക്കുന്നതിനും ആവശ്യമായ പൊതുപ്രസംഗ നൈപുണ്യങ്ങളെക്കുറിച്ച് അവര് വിശദീകരിച്ചു.
തുടര്ന്ന് സംരംഭകയും കോര്പ്പറേറ്റ് സൈക്കോളജിസ്റ്റുമായ റുഷ്ന പി. ''വനിതാ സംരംഭകത്വം'' എന്ന വിഷയത്തില് ക്ലാസ് എടുത്തു. സ്വന്തമായി സംരംഭങ്ങള് ആരംഭിക്കുന്നതിനുള്ള സാധ്യതകള്, സാമ്പത്തിക സ്വാതന്ത്ര്യത്തിന്റെ പ്രാധാന്യം, തൊഴില് മേഖലയില് സ്ത്രീകള്ക്ക് മുന്നിലുള്ള അവസരങ്ങള് തുടങ്ങിയ വിഷയങ്ങള് അവര് ലളിതമായി അവതരിപ്പിച്ചു. സ്വപ്നങ്ങള് സാക്ഷാത്കരിക്കാന് ആദ്യ ചുവടുവെപ്പ് ധൈര്യത്തോടെ നടത്തണമെന്നും, ചെറിയ തുടക്കങ്ങള് പോലും വലിയ വിജയങ്ങളിലേക്ക് നയിക്കാമെന്നും അവര് വനിതകളെ പ്രചോദിപ്പിച്ചു.
ചടങ്ങില് അതിഥികള്ക്ക് സംഘടനയുടെ സ്നേഹോപഹാരങ്ങള് സമര്പ്പിച്ചു. സ്ത്രീകള്ക്ക് സൗഹൃദപരവും പ്രോത്സാഹനപരവുമായ അന്തരീക്ഷത്തില് പഠിക്കാനും ആശയങ്ങള് പങ്കുവെക്കാനും അവസരമൊരുക്കിയ പരിപാടി ഏറെ ശ്രദ്ധേയമായി. ഭാവിയിലും ഇത്തരത്തിലുള്ള പരിപാടികള് സംഘടിപ്പിക്കണമെന്ന് പങ്കെടുത്തവര് അഭിപ്രായപ്പെട്ടു.
സജ്ന ഷക്കീര് നന്ദി പ്രറഞ്ഞു. വനിതാ ശാക്തീകരണത്തിനും വ്യക്തിത്വ വികസനത്തിനും സാമൂഹിക മുന്നേറ്റത്തിനുമുള്ള സംഘടനയുടെ പ്രതിബദ്ധത ഒരിക്കല്ക്കൂടി ഉറപ്പിക്കുന്നതായിരുന്നു ഈ പരിപാടി. ജുമാന റഹീം, ജസീറ അയ്മന്, അമല് അഷ്റഫ് എന്നിവര് നേതൃത്വം നല്കി.
Related News
