അല്-ഉല: ജ്യോതിശാസ്ത്ര ഗവേഷണ രംഗത്തും സുസ്ഥിര വിനോദസഞ്ചാര മേഖലയിലും സൗദി അറേബ്യയുടെ സ്ഥാനം ആഗോളതലത്തില് ഉയര്ത്തുന്ന 'അല്-ഉല ലൈറ്റ്ഹൗസ്' പദ്ധതിയുടെ രൂപരേഖയ്ക്ക് റോയല് കമ്മിഷന് ഫോര് അല്-ഉല ഗവേണറേറ്റ് ബോര്ഡ് അംഗീകാരം നല്കി. അത്യാധുനിക അസ്ട്രോണമിക്കല് ഒബ്സര്വേറ്ററി, റിസര്ച്ച് സെന്റര്, സന്ദര്ശകര്ക്കായുള്ള പ്രത്യേക പ്രദര്ശന നഗരി എന്നിവയടങ്ങുന്നതാണ് ഈ ബൃഹത്തായ പദ്ധതി.
അല്-ഉലയുടെ പ്രകൃതിദത്തമായ ഭൂപ്രകൃതിയോടും ചരിത്ര പൈതൃകത്തോടും പൂര്ണ്ണമായി ഇണങ്ങിചേരുന്ന രീതിയിലാണ് ഇതിന്റെ തനതായ ഡിസൈന് തയ്യാറാക്കിയിരിക്കുന്നത്. നിര്മ്മാണത്തിന്റെ പുറംപാളിക്ക് പ്രാദേശികമായി ലഭ്യമായ മണല്ക്കല്ലുകളാണ് ഉപയോഗിക്കുന്നത്.
പദ്ധതിയുടെ പ്രധാന സവിശേഷതകള്:
വമ്പന് ദൂരദര്ശിനികള്: അന്താരാഷ്ട്ര തലത്തില് ശ്രദ്ധേയമാകുന്ന ഈ കേന്ദ്രത്തില് 4 മീറ്റര് വ്യാസമുള്ള ഒരു പ്രധാന ടെലിസ്കോപ്പും, 2 മീറ്റര് വ്യാസമുള്ള മറ്റ് രണ്ട് ടെലിസ്കോപ്പുകളും സ്ഥാപിക്കും. ഇതോടെ ലോകത്തിലെ തന്നെ ഏറ്റവും വലിയ ജ്യോതിശാസ്ത്ര നിരീക്ഷണാലയങ്ങളില് ഒന്നായി ഇത് മാറും.
അനുയോജ്യമായ ഭൂമിശാസ്ത്രം: അല്-ഉല നഗരത്തില് നിന്നും 70 കിലോമീറ്റര് വടക്ക് മാറി 'ഹര്റത്ത് ഉവൈരിദ്' സംരക്ഷിത മേഖലയ്ക്കും 'അല്-ഗരാമീല്' പ്രദേശത്തിനും ഇടയിലാണ് ഈ പ്രൊജക്റ്റ് സ്ഥാപിക്കുന്നത്. കൃത്രിമ വെളിച്ച മലിനീകരണം ഏറ്റവും കുറഞ്ഞതും എപ്പോഴും തെളിഞ്ഞ ആകാശവുമുള്ള ഈ പ്രദേശം നക്ഷത്ര നിരീക്ഷണത്തിന് ഏറ്റവും അനുയോജ്യമാണ്.
ആഗോള പങ്കാളിത്തം: സൗദി സ്പേസ് ഏജന്സി, കിംഗ് അബ്ദുല് അസീസ് സിറ്റി ഫോര് സയന്സ് ആന്ഡ് ടെക്നോളജി, അന്താരാഷ്ട്ര പ്രശസ്തമായ എസ്ഇടിഐ ഇന്സ്റ്റിറ്റ്യൂട്ട് എന്നിവരുമായി സഹകരിച്ചാണ് റോയല് കമ്മിഷന് ഈ പദ്ധതി നടപ്പിലാക്കുന്നത്.
പരിസ്ഥിതി സൗഹൃദ സമീപനം: ഈ പ്രദേശത്തെ ഇരുണ്ട ആകാശത്തിന്റെ സ്വാഭാവികത നിലനിര്ത്താന് കടുത്ത ലൈറ്റിംഗ് നിയന്ത്രണങ്ങള് പ്രദേശത്ത് ഏര്പ്പെടുത്തും. ഇത് രാത്രികാല ആകാശത്തിന്റെ വ്യക്തത കൂട്ടാനും വന്യജീവികളുടെ സ്വാഭാവിക ആവാസവ്യവസ്ഥ സംരക്ഷിക്കാനും സഹായിക്കും.ശാസ്ത്രജ്ഞര്ക്കും ഗവേഷകര്ക്കും പുറമെ ബഹിരാകാശ കൗതുകങ്ങള് അടുത്തറിയാന് താല്പര്യപ്പെടുന്ന ആഗോള വിനോദസഞ്ചാരികളെയും ലക്ഷ്യമിട്ടാണ് അല്-ഉല ലൈറ്റ്ഹൗസ് ഒരുങ്ങുന്നത്.
.jpg)
Related News
