റിയാദ്: ടി.പി.എം ഗ്രൂപ്പ് ചെയര്മാനും റിയാദിലെ സാമൂഹിക-സാംസ്കാരിക രംഗത്തെ നിറസാന്നിധ്യവുമായ ഡോ. ടി.പി. മുഹമ്മദ് രചിച്ച 'ഒരു പ്രവാസിയുടെ ലോകസഞ്ചാരങ്ങള്: അമേരിക്ക മുതല് തുര്ക്കിവരെ' എന്ന ഗ്രന്ഥം, സാമ്പത്തിക-സാമൂഹിക-സാംസ്കാരിക-വിദ്യാഭ്യാസ രംഗത്തെ പ്രമുഖരുടെ സാന്നിധ്യത്തില് റിയാദില് പ്രകാശിതമായി.
വായനക്കാരെ അകത്തേക്ക് മാത്രം തുറക്കുന്ന വാതില് പോലെ, തന്നോടൊപ്പം കാണാത്ത ലോകത്തേക്കും ദേശങ്ങളിലേക്കും കൈപിടിച്ച് നടത്തുന്ന ശൈലിയാണ് ടി.പി. മുഹമ്മദ് തന്റെ പുസ്തകത്തില് സ്വീകരിച്ചിരിക്കുന്നതെന്ന്, പുസ്തകം പ്രകാശനം ചെയ്ത എഴുത്തുകാരനും സാമൂഹിക പ്രവര്ത്തകനുമായ ജോസഫ് അതിരുങ്കല് അഭിപ്രായപ്പെട്ടു. വാക്ചാരുത കൊണ്ട് ശില്പനിര്മ്മിതമാകുന്ന ദേശസഞ്ചാരമാണ് എഴുത്തുകാരന് തന്റെ പുസ്തകത്തില് പുലര്ത്തുന്ന ശൈലീഭാവമെന്ന് പ്രമുഖ എഴുത്തുകാരി സബീന സലി പുസ്തകം പരിചയപ്പെടുത്തിക്കൊണ്ട് പറഞ്ഞു.
ഷഹബാസ് ബഷീര് ഹുദവി പ്രാര്ത്ഥന നിര്വഹിച്ചു. മോഡേണ് ഇന്റര്നാഷണല് സ്കൂള് പ്രിന്സിപ്പല് ഡോ. അബ്ദുല് അസീസ് വി.പി. സ്വാഗതം ആശംസിച്ചു. സാംസ്കാരിക നേതാവ് വി.കെ. മുഹമ്മദ് അധ്യക്ഷത വഹിച്ച പരിപാടി അല്മുന ഇന്റര്നാഷണല് സ്കൂള് (ദമാം) പ്രിന്സിപ്പല് നൗഫല് മാസ്റ്റര് ഉദ്ഘാടനം ചെയ്തു. അബൂബക്കര് ഹാജി ബ്ലാത്തൂര് പുസ്തകം ഏറ്റുവാങ്ങി. ഡോ. ടി.പി. മുഹമ്മദ് രചിച്ച കവിതാസമാഹാരമായ 'കാവ്യനിലാവു' എന്ന പുസ്തകത്തിന്റെ കവര് പ്രകാശനത്തിനും ഈ വേദി സാക്ഷിയായി. കവിതാസമാഹാരത്തിന്റെ കവര് പ്രകാശനം മാധ്യമം റിപ്പോര്ട്ടര് നജീം കൊച്ചുകലുങ്ക് നിര്വഹിക്കുകയും ബിസിനസ് ട്രെയിനര് ഇബ്രാഹിം സുബ്ഹാന് ഏറ്റുവാങ്ങുകയും ചെയ്തു.
കെ.എം.സി.സി നേതാവ് ശുഐബ് പനങ്ങാങ്ങര, നാസര് കാരക്കുന്ന് (കേളി), സനൂബ് (കിയോസ്), ഖാദര് (മാനേജര്, അല്മുന സ്കൂള് ദമാം), ജയന് കൊടുങ്ങല്ലൂര് (മീഡിയ ഫോറം) എന്നിവര് ആശംസകള് നേര്ന്നു. സദസ്സില് എഴുത്തുകാരന് ഡോ. ടി.പി. മുഹമ്മദിനെ സമൂഹത്തിന്റെ വിവിധ തുറകളിലുള്ളവര് ഉപഹാരങ്ങള് നല്കി ആദരിച്ചു. എഴുത്തുകാരായ സുബൈദ, ഖമര് ബാനു, അനിത്ര, നിഖില തുടങ്ങിയ പ്രമുഖരും ചടങ്ങില് സംബന്ധിച്ചു. മുക്താര് കണ്ണൂര് നന്ദി പറഞ്ഞു.
