പാരിസ്: മാതാവിന്റെ മരണത്തെത്തുടര്‍ന്ന് ഫ്രഞ്ച് ഫുട്‌ബോള്‍ ടീം പരിശീലകന്‍ ദിദിയര്‍ ദെഷാംപ്സ് ടീമിനൊപ്പം ചേരില്ല. വെള്ളിയാഴ്ച നടക്കുന്ന നോര്‍വേയ്ക്കെതിരായ നിര്‍ണായക ഗ്രൂപ്പ് മത്സരത്തില്‍ അദ്ദേഹം ടീമിനെ പരിശീലിപ്പിക്കില്ലെന്ന് ഫ്രഞ്ച് ഫുട്‌ബോള്‍ ഫെഡറേഷന്‍ ഔദ്യോഗികമായി അറിയിച്ചു. മാതാവിന്റെ സംസ്‌കാരച്ചടങ്ങില്‍ പങ്കെടുക്കുന്നതിനായി അദ്ദേഹം ഫ്രാന്‍സിലേക്ക് മടങ്ങുകയാണ്.

'ഇന്നാണ് മാതാവിന്റെ മരണവാര്‍ത്ത പരിശീലകന്‍ അറിയുന്നത്. സംസ്‌കാരച്ചടങ്ങില്‍ പങ്കെടുക്കുന്നതിനായി അദ്ദേഹം നാട്ടിലേക്ക് മടങ്ങുന്നു. നോര്‍വേയ്ക്കെതിരായ മത്സരത്തിന് മുന്നോടിയായുള്ള പരിശീലന സെഷനുകളിലും വെള്ളിയാഴ്ചത്തെ ഗ്രൂപ്പ് ഐ മത്സരത്തിലും ദെഷാംപ്സ് സാന്നിധ്യമുണ്ടാകില്ല,' ഫെഡറേഷന്‍ പ്രസ്താവനയില്‍ വ്യക്തമാക്കി. ദെഷാംപ്സിന്റെ അഭാവത്തില്‍ അസിസ്റ്റന്റ് കോച്ച് ഗയ് സ്റ്റീഫന്‍ ടീമിനെ നയിക്കുമെന്ന് ഫെഡറേഷന്‍ പ്രസിഡന്റ് ഫിലിപ്പ് ഡയാലോ അറിയിച്ചു.

ലോകകപ്പ് ഫേവറിറ്റുകളായ ഫ്രാന്‍സ്, ഗ്രൂപ്പിലെ ആദ്യ രണ്ട് മത്സരങ്ങളില്‍ സെനഗലിനെയും (3-1) ഇറാഖിനെയും (3-0) തോല്‍പ്പിച്ച് ഇതിനകം തന്നെ നോക്കൗട്ട് റൗണ്ടില്‍ ഇടംപിടിച്ചിട്ടുണ്ട്. എങ്കിലും, ആദ്യ രണ്ട് മത്സരങ്ങള്‍ വിജയിച്ച നോര്‍വേയ്ക്കെതിരായ വെള്ളിയാഴ്ചത്തെ മത്സരം ഗ്രൂപ്പ് ചാമ്പ്യന്മാരെ തീരുമാനിക്കുന്നതില്‍ നിര്‍ണായകമാണ്. അമേരിക്കയിലെ ഫോക്‌സ്ബറോയില്‍ വെച്ചാണ് മത്സരം നടക്കുന്നത്.

2012 മുതല്‍ ഫ്രഞ്ച് ടീമിന്റെ പരിശീലകനായ 57-കാരന്‍ ദെഷാംപ്സ്, 2018-ല്‍ ഫ്രാന്‍സിനെ ലോകകപ്പ് ജേതാക്കളാക്കുന്നതില്‍ നിര്‍ണായക പങ്ക് വഹിച്ചിട്ടുണ്ട്. 2022 ലോകകപ്പ് ഫൈനലില്‍ അര്‍ജന്റീനയോട് തോല്‍വി വഴങ്ങിയെങ്കിലും ടീമിനെ മികച്ച നിലയിലെത്തിക്കാന്‍ അദ്ദേഹത്തിന് സാധിച്ചു. 1998-ല്‍ ഫ്രാന്‍സ് ലോകകപ്പ് കിരീടം നേടുമ്പോള്‍ ടീമിനെ നയിച്ച ക്യാപ്റ്റന്‍ കൂടിയായിരുന്നു ദെഷാംപ്സ്.