സിയാറ്റില്: ലോകകപ്പ് ഫുട്ബോള് ചരിത്രത്തില് ആദ്യമായി നോക്കൗട്ട് റൗണ്ട് സ്വപ്നം കാണുന്ന ബോസ്നിയ-ഹെര്സെഗോവിനയ്ക്ക് നിര്ണായക വിജയം. ഗ്രൂപ്പ് ബിയിലെ അവസാന മത്സരത്തില് ഖത്തറിനെ ഒന്നിനെതിരെ മൂന്ന് ഗോളുകള്ക്ക് പരാജയപ്പെടുത്തിയതോടെയാണ് ബോസ്നിയ തങ്ങളുടെ നോക്കൗട്ട് സാധ്യതകള് സജീവമാക്കിയത്.
സഹ-ആതിഥേയരായ കാനഡയ്ക്കൊപ്പം നാല് പോയിന്റുകള് വീതം നേടിയെങ്കിലും, ഹെഡ്-ടു-ഹെഡ് റെക്കോര്ഡിലെ പിന്നാക്കാവസ്ഥ കാരണം ബോസ്നിയയ്ക്ക് ഗ്രൂപ്പില് മൂന്നാം സ്ഥാനത്ത് തൃപ്തിപ്പെടേണ്ടി വന്നു. ഇതോടെ നേരിട്ടുള്ള യോഗ്യത നഷ്ടമായെങ്കിലും, മികച്ച മൂന്നാം സ്ഥാനക്കാരുടെ പട്ടികയില് ഇടംപിടിച്ച് നോക്കൗട്ടിലെത്താമെന്ന പ്രതീക്ഷയിലാണ് ബോസ്നിയ.
സിയാറ്റിലിലെ 29 ഡിഗ്രി ചൂടില് നടന്ന മത്സരത്തിന്റെ തുടക്കം മുതല് ബോസ്നിയ ആക്രമണത്തിന് മുന്തൂക്കം നല്കി. 29-ാം മിനിറ്റില് 18-കാരന് കരീം അലജ്ബെഗോവിച്ചിലൂടെ ബോസ്നിയ ആദ്യ ഗോള് നേടി. ആറ് മിനിറ്റിനുള്ളില് ഖത്തര് താരം സുല്ത്താന് അല് ബ്രേക്കിന്റെ സെല്ഫ് ഗോളിലൂടെ ബോസ്നിയ ലീഡ് രണ്ടാക്കി ഉയര്ത്തി. 150-ാം അന്താരാഷ്ട്ര മത്സരം കളിക്കുന്ന ക്യാപ്റ്റന് എഡിന് സെക്കോയുടെ ഇടപെടലാണ് ഈ ഗോളിന് വഴിയൊരുക്കിയത്.
ആദ്യ പകുതി അവസാനിക്കുന്നതിന് തൊട്ടുമുമ്പ് എഡ്മില്സണ് ജൂനിയറിന്റെ ക്രോസില് നിന്ന് ഹസന് അല് ഹൈദോസ് ഒരു ഗോള് മടക്കി ഖത്തറിന് പ്രതീക്ഷ നല്കി. എന്നാല്, രണ്ടാം പകുതിയില് പകരക്കാരനായി ഇറങ്ങിയ എര്മിന് മഹ്മിച്ച് 80-ാം മിനിറ്റില് ബോസ്നിയയുടെ മൂന്നാം ഗോള് കൂടി നേടിയതോടെ ജയം ഉറപ്പിച്ചു. 2014-ല് ഇറാനെതിരായ വിജയത്തിന് ശേഷം ലോകകപ്പില് ബോസ്നിയ നേടുന്ന രണ്ടാമത്തെ വിജയമാണിത്. ഗ്രൂപ്പില് ഒരു പോയിന്റ് മാത്രമുള്ള ഖത്തര് ടൂര്ണമെന്റില് നിന്ന് പുറത്തായി.
