കാരാക്കസ്: വെനിസ്വേലയെ നടുക്കിയ രണ്ട് ശക്തമായ ഭൂചലനങ്ങളില്‍ നിന്ന് ആയിരക്കണക്കിന് ആളുകളെ മരണത്തിന്റെ വക്കില്‍ നിന്നും ജീവിതത്തിലേക്ക് തിരിച്ചുകൊണ്ടുവന്നത് ഗൂഗിളിന്റെ അത്ഭുതകരമായ സാങ്കേതികവിദ്യ. റിക്ടര്‍ സ്‌കെയിലില്‍ യഥാക്രമം 7.2, 7.5 തീവ്രത രേഖപ്പെടുത്തിയ രണ്ട് തുടര്‍ചലനങ്ങള്‍ രാജ്യത്ത് കനത്ത നാശം വിതച്ചെങ്കിലും, ഗൂഗിളിന്റെ ഭൂകമ്പ മുന്നറിയിപ്പ് സംവിധാനം (Earthquake Alert System) നല്‍കിയ കൃത്യസമയത്തെ ഇടപെടല്‍ വലിയൊരു ദുരന്തത്തെയാണ് ഒഴിവാക്കിയത്.

ഭൂചലനത്തിന്റെ ആദ്യ പ്രകമ്പനങ്ങള്‍ അനുഭവപ്പെടുന്നതിന് നിമിഷങ്ങള്‍ക്ക് മുമ്പുതന്നെ വെനിസ്വേലയിലെ ലക്ഷക്കണക്കിന് ആന്‍ഡ്രോയിഡ് ഉപഭോക്താക്കള്‍ക്ക് ഗൂഗിളിന്റെ മുന്നറിയിപ്പ് സന്ദേശം ലഭിച്ചു. ഭൂകമ്പത്തിന്റെ തീവ്രത എത്രയാണെന്നും, ഉപഭോക്താവ് നില്‍ക്കുന്ന സ്ഥലത്തുനിന്നും അത് എത്ര അകലെയാണെന്നും വ്യക്തമാക്കുന്ന സന്ദേശം ഫോണില്‍ വലിയ ശബ്ദത്തോടെ അലാറമായി മുഴങ്ങി. മുന്നറിയിപ്പ് ലഭിച്ച ഉടന്‍ തന്നെ ആളുകള്‍ കെട്ടിടങ്ങളില്‍ നിന്നും വീടുകളില്‍ നിന്നും സുരക്ഷിതമായ തുറസ്സായ സ്ഥലങ്ങളിലേക്ക് ഓടിമാറി. ഈ ഏതാനും സെക്കന്‍ഡുകളുടെ മുന്‍കരുതലാണ് ആയിരങ്ങളുടെ ജീവന്‍ രക്ഷിച്ചത്.

എങ്ങനെയാണ് ഗൂഗിളിന് ഭൂചലനം ഇത്ര കൃത്യമായി മുന്‍കൂട്ടി അറിയാന്‍ കഴിയുന്നത്? ഇതിനു പിന്നില്‍ ആന്‍ഡ്രോയിഡ് ഫോണുകളിലെ 'ആക്സിലറോമീറ്റര്‍' എന്ന ചെറിയ സെന്‍സറുകളാണ്. ഫോണിന്റെ സ്‌ക്രീന്‍ റൊട്ടേഷനും ചലനങ്ങളും തിരിച്ചറിയാന്‍ ഉപയോഗിക്കുന്ന ഈ സെന്‍സറുകള്‍ക്ക് ഭൂകമ്പത്തിന്റെ ആദ്യ തരംഗങ്ങളെ കണ്ടെത്താനുള്ള കഴിവുണ്ട്.

ഒരു പ്രദേശത്തെ നിരവധി ഫോണുകള്‍ ഒരേസമയം ഭൂചലനത്തിന്റെ ചലനങ്ങള്‍ രേഖപ്പെടുത്തുമ്പോള്‍, ഗൂഗിളിന്റെ അത്യാധുനിക കമ്പ്യൂട്ടര്‍ അല്‍ഗോരിതങ്ങള്‍ ഈ വിവരങ്ങള്‍ സെക്കന്‍ഡുകള്‍ക്കുള്ളില്‍ വിശകലനം ചെയ്യുന്നു. ഭൂകമ്പത്തിന്റെ പ്രഭവകേന്ദ്രവും തീവ്രതയും കണക്കാക്കി, അപകടസാധ്യതയുള്ള പ്രദേശങ്ങളിലെ ഫോണുകളിലേക്ക് ഉടന്‍ തന്നെ മുന്നറിയിപ്പ് സന്ദേശങ്ങള്‍ അയക്കുകയാണ് ഗൂഗിളിന്റെ സംവിധാനം ചെയ്യുന്നത്.

ദുരന്തസമയത്ത് സാങ്കേതികവിദ്യ എങ്ങനെ ഒരു രക്ഷകനായി മാറുന്നു എന്നതിന്റെ ഏറ്റവും വലിയ ഉദാഹരണമായി മാറിയിരിക്കുകയാണ് വെനിസ്വേലയിലെ ഈ സംഭവം. സോഷ്യല്‍ മീഡിയയിലാകെ ഗൂഗിളിന്റെ ഈ കരുതലാണ് ഇപ്പോള്‍ ചര്‍ച്ചാവിഷയം. എങ്കിലും, ഈ വലിയ ദുരന്തത്തില്‍ 164 പേര്‍ മരണപ്പെട്ടതും ആയിരത്തോളം പേര്‍ക്ക് പരിക്കേറ്റതും വന്‍ നാഷനഷ്ടങ്ങളുണ്ടായതും വലിയൊരാഘാതമായി തന്നെ തുടരുന്നു.