മോണ്ടെറി: 2026 ഫിഫ ലോകകപ്പിലെ പ്രീ-ക്വാര്‍ട്ടര്‍ പോരാട്ടത്തില്‍ നെതര്‍ലന്‍ഡ്സിനെ പെനാല്‍റ്റി ഷൂട്ടൗട്ടില്‍ തോല്‍പ്പിച്ച് മൊറോക്കോ. നിശ്ചിത സമയത്തും അധികസമയത്തും ഇരു ടീമുകളും 1-1 എന്ന നിലയില്‍ സമനില പാലിച്ചതോടെ മത്സരം ഷൂട്ടൗട്ടിലേക്ക് നീങ്ങുകയായിരുന്നു. ഷൂട്ടൗട്ടില്‍ 3-2 എന്ന സ്‌കോറിനാണ് മൊറോക്കോ വിജയം ഉറപ്പിച്ചത്. ജൂലൈ നാലിന് ഹൂസ്റ്റണില്‍ നടക്കുന്ന ക്വാര്‍ട്ടര്‍ ഫൈനലില്‍ കാനഡയാണ് മൊറോക്കോയുടെ എതിരാളികള്‍.

മത്സരത്തിന്റെ ആദ്യ മിനിറ്റ് മുതല്‍ ഇരു ടീമുകളും ആക്രമണോത്സുകമായ ഫുട്‌ബോളാണ് പുറത്തെടുത്തത്. ഗോള്‍ രഹിതമായ ആദ്യ പകുതിയില്‍ ഇരുടീമുകള്‍ക്കും മികച്ച അവസരങ്ങള്‍ ലഭിച്ചെങ്കിലും ഫിനിഷിംഗിലെ പോരായ്മ തിരിച്ചടിയായി. മൊറോക്കോയുടെ അഷ്‌റഫ് ഹക്കിമിയുടെയും നെതര്‍ലന്‍ഡ്സിന്റെ മിിക്കി വാന്‍ ഡി വെന്നിന്റെയും ശ്രമങ്ങള്‍ ഗോള്‍കീപ്പര്‍മാര്‍ വിഫലമാക്കി.

രണ്ടാം പകുതിയില്‍ കളി മാറി. 72-ാം മിനിറ്റില്‍ കോഡി ഗാക്‌പോയിലൂടെ നെതര്‍ലന്‍ഡ്സ് ലീഡ് നേടി. ഗോളടിച്ച് അല്പസമയത്തിനുള്ളില്‍ത്തന്നെ തിരിച്ചടിക്കാനുള്ള മൊറോക്കോയുടെ ശ്രമങ്ങള്‍ ഒടുവില്‍ ഫലം കണ്ടു. ഇഞ്ചുറി ടൈമില്‍ ചെംസ്ഡിന്‍ തല്‍ബിയുടെ ക്രോസില്‍ നിന്ന് ഇസ്സ ഡിയോപ്പ് ഹെഡറിലൂടെ സമനില പിടിച്ചതോടെ സ്റ്റേഡിയം ആവേശത്തിലായി.

ഷൂട്ടൗട്ടിലെ വീരഗാഥ
അധികസമയത്തും ഗോള്‍ പിറക്കാതെ വന്നതോടെ മത്സരം പെനാല്‍റ്റി ഷൂട്ടൗട്ടിലേക്ക് നീങ്ങി. നെതര്‍ലന്‍ഡ്സിനായി കോപ്മീനേഴ്‌സും വെഗോഴ്സ്റ്റും ലക്ഷ്യം കണ്ടെങ്കിലും ക്വെന്റിന്‍ ടിംബറും സമ്മര്‍വില്ലും പരാജയപ്പെട്ടു. മൊറോക്കോയ്ക്കായി റഹിമിയും തല്‍ബിയും വല കുലുക്കി. ഒടുവില്‍ നിര്‍ണായകമായ പെനാല്‍റ്റിയിലൂടെ ഇസ്മായില്‍ സായിബാരി മൊറോക്കോയ്ക്ക് ഐതിഹാസിക വിജയം സമ്മാനിച്ചു. ഗോള്‍കീപ്പര്‍ യാസീന്‍ ബൗണുവിന്റെ തകര്‍പ്പന്‍ സേവുകളാണ് മൊറോക്കോയുടെ വിജയത്തില്‍ നിര്‍ണായകമായത്.