മദീന: വിശുദ്ധ ഹജ്ജ് കര്മ്മങ്ങളുടെ സുരക്ഷിതമായ പൂര്ത്തീകരണത്തിന് ശേഷം, കേരളത്തില് നിന്നുള്ള അവസാനത്തെ തീര്ത്ഥാടക സംഘവും നാട്ടിലേക്ക് തിരിച്ചു. മദീനയിലെ പ്രിന്സ് മുഹമ്മദ് ബിന് അബ്ദുല് അസീസ് അന്താരാഷ്ട്ര വിമാനത്താവളത്തില് നിന്ന് കണ്ണൂരിലേക്കായിരുന്നു ഈ വര്ഷത്തെ അവസാന വിമാന സര്വീസ്. 318 തീര്ത്ഥാടകര് അടങ്ങുന്ന സംഘത്തിന് മദീന കെ.എം.സി.സി പ്രവര്ത്തകര് താമസസ്ഥലത്ത് വെച്ച് പ്രൗഢമായ യാത്രയയപ്പ് നല്കി. കഴിഞ്ഞ രണ്ട് മാസക്കാലമായി വിശുദ്ധ നഗരികളില് ഹാജിമാര്ക്ക് തണലായി നിന്ന കെ.എം.സി.സി വളണ്ടിയര്മാരുടെ സ്നേഹനിര്ഭരമായ യാത്രയയപ്പ് തീര്ത്ഥാടകര്ക്ക് വികാരനിര്ഭരമായ അനുഭവമായി.
മദീന കെ.എം.സി.സി സെന്ട്രല് കമ്മിറ്റി ഭാരവാഹികള് യാത്രയയപ്പ് ചടങ്ങുകള്ക്ക് നേതൃത്വം നല്കി. പ്രസിഡന്റ് ശരീഫ് കാസര്ഗോഡ്, സെക്രട്ടറി അഷ്റഫ് അഴിഞ്ഞിലം, മദീന കെ.എം.സി.സി ഹജ്ജ് സെല് ചെയര്മാന് അഹമ്മദ് മുനമ്പം, കണ്വീനര് മജീദ് അരിബ്ര, കോര്ഡിനേറ്റര് നാസര് തടത്തില്, ട്രഷറര് ഷംസു മലബാര് എന്നിവരും വിവിധ വിങ്ങുകളിലെ കോര്ഡിനേറ്റര്മാരും വനിതാ വിങ് നേതാക്കളും ചടങ്ങില് സംബന്ധിച്ചു. ഹാജിമാരുടെ യാത്രാ രേഖകളുടെ പരിശോധനകള്ക്കും ലഗേജ് നീക്കങ്ങള്ക്കും വനിതകള് ഉള്പ്പെടെയുള്ള വളണ്ടിയര്മാര് സജീവമായി രംഗത്തുണ്ടായിരുന്നു.
'ജിദ്ദയിലും മക്കയിലും മദീനയിലുമായി രണ്ട് മാസത്തോളം നീണ്ടുനിന്ന ഹജ്ജ് സന്നദ്ധ സേവന പ്രവര്ത്തനങ്ങള്ക്കാണ് ഈ വിമാന സര്വീസോടെ താല്ക്കാലിക വിരാമമാകുന്നത്. ലോകത്തിന്റെ വിവിധ ഭാഗങ്ങളില് നിന്നെത്തിയ തീര്ത്ഥാടകര്ക്ക്, പ്രത്യേകിച്ച് മലയാളി ഹാജിമാര്ക്ക് സേവനം ചെയ്യാന് കഴിഞ്ഞത് വലിയൊരു പുണ്യമായാണ് കരുതുന്നത്,' കെ.എം.സി.സി നേതാക്കള് പറഞ്ഞു.
തീര്ത്ഥാടകര്ക്ക് ആവശ്യമായ വൈദ്യസഹായം, താമസം, വഴിതെറ്റിയവര്ക്ക് വഴികാട്ടല്, ലഗേജ് മാനേജ്മെന്റ്, ഗതാഗത സൗകര്യം എന്നിവ ഉറപ്പാക്കാന് കെ.എം.സി.സി വളണ്ടിയര്മാര്ക്ക് സാധിച്ചു. പ്രായമായ ഹാജിമാരെ വീല്ചെയറുകളില് വിശുദ്ധ ഹറമുകളില് എത്തിക്കാനും പ്രത്യേക ശ്രദ്ധ പുലര്ത്തിയിരുന്നു. സേവനരംഗത്ത് സജീവമായി പങ്കെടുത്ത മുഴുവന് പ്രവര്ത്തകരെയും സെന്ട്രല് കമ്മിറ്റി പ്രത്യേകം അഭിനന്ദിച്ചു.
തങ്ങള്ക്ക് ലഭിച്ച സമാനതകളില്ലാത്ത സേവനങ്ങള്ക്ക് കെ.എം.സി.സിയോടും സൗദി ഭരണകൂടത്തോടും നന്ദി അറിയിച്ചും, നാടിന്റെ നന്മയ്ക്കായി പ്രാര്ത്ഥിച്ചുമാണ് ഹാജിമാരുടെ അവസാന സംഘം വിമാനം കയറിയത്.
