​
​നെടുമ്പാശ്ശേരി: ഓസ്ട്രേലിയയിലെ ബ്രിസ്ബനിൽ നിന്ന് കൊച്ചിയിലേക്ക് നേരിട്ട് വിമാന സർവീസ് ആരംഭിക്കണമെന്ന് ആവശ്യപ്പെട്ട് ഇന്ത്യൻ ഓവർസീസ് കൾച്ചറൽ കോൺഗ്രസ് (IOCC) ബ്രിസ്ബൻ സെൻട്രൽ കമ്മിറ്റി മുഖ്യമന്ത്രി വി. ഡി. സതീശന് നിവേദനം നൽകി. കേരളത്തിലേക്ക് നേരിട്ട് വിമാന സർവീസ് ഇല്ലാത്തതുകൊണ്ട് പല രാജ്യങ്ങൾ ചുറ്റി, മണിക്കൂറുകൾ വൈകിയാണ് പ്രവാസി മലയാളികൾ നാട്ടിലെത്തുന്നത്.
​എയർ ഇന്ത്യ, വിദേശ വിമാന കമ്പനികൾ, സ്വകാര്യ വിമാന കമ്പനികൾ എന്നിവയുമായി ചർച്ച നടത്തി നേരിട്ട് സർവീസ് ആരംഭിക്കുന്നതിന് അടിയന്തര നടപടി സ്വീകരിക്കണമെന്നും, വിമാനക്കമ്പനികളുടെ അടിക്കടിയുള്ള ചാർജ് വർദ്ധനവ് നിയന്ത്രിക്കാൻ ഇടപെടണമെന്നും നിവേദനത്തിൽ ആവശ്യപ്പെട്ടു.

പാസ്പോർട്ടിന്റെ അമിത ഫീസ് വർദ്ധനവ് പിൻവലിക്കാൻ കേന്ദ്ര സർക്കാരിൽ സമ്മർദ്ദം ചെലുത്തണമെന്നും പ്രവാസി വകുപ്പിന്റെ ചുമതല കൂടിയുള്ള മുഖ്യമന്ത്രിക്ക് നൽകിയ നിവേദനത്തിൽ ചൂണ്ടിക്കാട്ടിയിട്ടുണ്ട്.

​കേരള പ്രദേശ് പ്രവാസി കോൺഗ്രസ് സംസ്ഥാന സെക്രട്ടറി ബിജു കെ. മുണ്ടാടൻ, ഐ.ഒ.സി.സി ബ്രിസ്ബൻ സെൻട്രൽ കമ്മിറ്റി ഭാരവാഹികളായ സ്റ്റിനോ സ്റ്റീഫൻ, ജോയ്സൺ വർഗീസ്, സ്റ്റിജോ സ്റ്റീഫൻ, സിജു തോമസ്, ഷൈജോ മോൻ എന്നിവരുടെ നേതൃത്വത്തിലാണ് മുഖ്യമന്ത്രിക്ക് നിവേദനം കൈമാറിയത്.