റിയാദ്- സൗദി അറേബ്യയുടെ സമഗ്ര ദേശീയ ഡിജിറ്റല് ആപ്ലിക്കേഷനായ 'തവക്കല്നാ' ജൂണില് മാത്രം 160 പുതിയ സേവനങ്ങള്കൂടി ഉള്പ്പെടുത്തി വിപുലീകരിച്ചു. സര്ക്കാര്, സ്വകാര്യ, ലാഭരഹിത മേഖലകളിലെ 40 ഓളം പ്രമുഖ സ്ഥാപനങ്ങളുമായി സഹകരിച്ചാണ് ഈ പുതിയ മുന്നേറ്റം. സ്വദേശികള്ക്കും വിദേശികള്ക്കും ഒരുപോലെ പ്രയോജനപ്പെടുന്ന രീതിയില് ഡിജിറ്റല് സേവന സംവിധാനങ്ങള് മെച്ചപ്പെടുത്തുന്നതിന്റെ ഭാഗമായാണ് ഈ നടപടി. തവക്കല്നാ സിസ്റ്റവും രാജ്യത്തെ മറ്റ് പ്രമുഖ സ്ഥാപനങ്ങളും തമ്മിലുള്ള ഡിജിറ്റല് സംയോജനത്തിന്റെ ദ്രുതഗതിയിലുള്ള വളര്ച്ചയാണ് ഈ നീക്കം വ്യക്തമാക്കുന്നത്.
ഒറ്റ ദേശീയ പ്ലാറ്റ്ഫോമിലൂടെ കൂടുതല് ഡിജിറ്റല് സേവനങ്ങള് ലഭ്യമാക്കാനും ഗുണഭോക്താക്കളുടെ അനുഭവം കൂടുതല് ലളിതമാക്കാനുമുള്ള തവക്കല്നാ ആപ്ലിക്കേഷന്റെ നിരന്തരമായ ശ്രമങ്ങളുടെ തുടര്ച്ചയാണിത്. സര്ക്കാര്-സ്വകാര്യ സേവനങ്ങള് ജനങ്ങളിലേക്ക് എളുപ്പത്തില് എത്തിക്കുന്നതിലൂടെ സമയവും അധ്വാനവും ലാഭിക്കാന് ഇത് സഹായിക്കുന്നു. ജീവിതനിലവാരം ഉയര്ത്തുന്നതിനൊപ്പം ഡിജിറ്റല് പരിവര്ത്തനത്തിനും സര്ക്കാര് സേവനങ്ങളുടെ കാര്യക്ഷമത വര്ദ്ധിപ്പിക്കുന്നതിനുമുള്ള സൗദി അറേബ്യയുടെ വിഷന് 2030 ലക്ഷ്യങ്ങള്ക്ക് ഇത് വലിയ രീതിയില് കരുത്തുപകരുന്നു.
വിവിധ മന്ത്രാലയങ്ങള്, ഏജന്സികള്, സര്വ്വകലാശാലകള് എന്നിവയുള്പ്പെടെയുള്ള സ്ഥാപനങ്ങളുമായി പങ്കാളിത്തം സ്ഥാപിച്ചാണ് ഈ പുതിയ സംവിധാനങ്ങള് ഒരുക്കിയിരിക്കുന്നത്. വിദ്യാഭ്യാസം, ആരോഗ്യം, മുനിസിപ്പാലിറ്റി-ഭവനനിര്മ്മാണം, നീതിന്യായം, പരിസ്ഥിതി, ഗതാഗതം, സാമ്പത്തികം, തൊഴില്, സാമൂഹിക സുരക്ഷ, ടൂറിസം തുടങ്ങിയ വൈവിധ്യമാര്ന്ന മേഖലകളില് വ്യക്തികളുടെ ദൈനംദിന ആവശ്യങ്ങള് നിറവേറ്റാന് ഉതകുന്നതാണ് പുതുതായി കൂട്ടിച്ചേര്ത്ത എല്ലാ സേവനങ്ങളും.
.jpg)
Related News
