ജിസാന്‍- സൗദി അറേബ്യയിലെ ജിസാന്‍, അസീര്‍ പ്രവിശ്യകളില്‍ ശക്തമായ കാറ്റോടും ആലിപ്പഴ വര്‍ഷത്തോടും കൂടിയ ഇടത്തരം മുതല്‍ കനത്തതുമായ ഇടിമിന്നലുള്ള മഴയ്ക്ക് സാധ്യതയുണ്ടെന്ന് ദേശീയ കാലാവസ്ഥാ നിരീക്ഷണ കേന്ദ്രം അറിയിച്ചു. ഈ കാലാവസ്ഥ അല്‍-ബാഹ പ്രവിശ്യയുടെ തെക്കന്‍ ഭാഗങ്ങളിലേക്കും വ്യാപിച്ചേക്കാം. അതേസമയം കിഴക്കന്‍ പ്രവിശ്യയുടെ തെക്കന്‍ പ്രദേശങ്ങളില്‍ നേരിയ മഴയ്ക്കുള്ള സാധ്യതയും പ്രവചിക്കപ്പെട്ടിട്ടുണ്ട്.

ജിസാന്‍, അസീര്‍, അല്‍-ബാഹ, കിഴക്കന്‍ പ്രവിശ്യ, റിയാദ്, മദീന, തബൂക്ക് എന്നീ പ്രദേശങ്ങളിലും കൂടാതെ ജിദ്ദയെയും ജിസാനെയും ബന്ധിപ്പിക്കുന്ന തീരദേശ റോഡിലും ശക്തമായ കാറ്റും മണല്‍ക്കാറ്റും തുടരാന്‍ സാധ്യതയുണ്ടെന്ന് മന്ത്രാലയം വ്യക്തമാക്കി. ചെങ്കടലില്‍ മണിക്കൂറില്‍ 15 മുതല്‍ 45 കിലോമീറ്റര്‍ വരെ വേഗത്തില്‍ കാറ്റടിക്കാന്‍ സാധ്യതയുണ്ട്. തെക്കന്‍ ഭാഗങ്ങളില്‍ ഇടിമിന്നലുള്ള സമയങ്ങളില്‍ കാറ്റിന്റെ വേഗം 50 കിലോമീറ്ററിലധികം ഉയര്‍ന്നേക്കാം. കടല്‍ പ്രക്ഷുബ്ധമാകാന്‍ സാധ്യതയുള്ളതിനാല്‍ തിരമാലകള്‍ 2.5 മീറ്റര്‍ വരെ ഉയര്‍ന്നേക്കാമെന്നും മുന്നറിയിപ്പില്‍ പറയുന്നു.

കിഴക്കന്‍ പ്രവിശ്യയിലെ ദമ്മാം, ദഹ്‌റാന്‍, ഹഫര്‍ അല്‍-ബാത്തിന്‍, അല്‍-ഖഫ്ജി, ജുബൈല്‍, അല്‍-ഖത്തീഫ്, അല്‍-ഖോബാര്‍, അല്‍-അഹ്‌സ ഉള്‍പ്പെടെയുള്ള വിവിധ നഗരങ്ങളിലും ഗവര്‍ണറേറ്റുകളിലും കടുത്ത ചൂട് തുടരും. ഇവിടങ്ങളില്‍ താപനില 49 മുതല്‍ 50 ഡിഗ്രി സെല്‍ഷ്യസ് വരെ ഉയര്‍ന്നേക്കാം. മണിക്കൂറില്‍ 40 മുതല്‍ 49 കിലോമീറ്റര്‍ വേഗമുള്ള കാറ്റ് വീശാന്‍ സാധ്യതയുള്ളതിനാല്‍ ഹൈവേകളിലും തുറസ്സായ സ്ഥലങ്ങളിലും കാഴ്ചപരിധി 3 മുതല്‍ 5 കിലോമീറ്റര്‍ വരെയായി കുറയാന്‍ സാധ്യതയുണ്ട്. ഈ പ്രത്യേക കാലാവസ്ഥാ സാഹചര്യം പകല്‍മുഴുവന്‍ നീണ്ടുനില്‍ക്കുമെന്നും അധികൃതര്‍ വ്യക്തമാക്കി.