റിയാദ്- നാഷണല് ഗാര്ഡ് ഹെല്ത്ത് അഫയേഴ്സിന് കീഴിലുള്ള കിംഗ് അബ്ദുല് അസീസ് മെഡിക്കല് സിറ്റിയില് വൈദ്യുതി തടസ്സപ്പെട്ടതായി പ്രചരിക്കുന്ന വാര്ത്തകള് സൗദി എനര്ജി കമ്പനി നിഷേധിച്ചു. മെഡിക്കല് സിറ്റിയിലെയും അതിനോട് ചേര്ന്നുള്ള സര്വ്വകലാശാലയിലെയും വൈദ്യുതി വിതരണം പൂര്ണ്ണമായും സുസ്ഥിരമാണെന്ന് ഇലക്ട്രിക്കല് നെറ്റ്വര്ക്ക് പരിശോധിച്ച ശേഷം കമ്പനി സ്ഥിരീകരിച്ചു. കമ്പനിയുടെ ഭാഗത്തുനിന്ന് യാതൊരുവിധ പവര് കട്ടുകളും രേഖപ്പെടുത്തിയിട്ടില്ലെന്നും വിതരണം സാധാരണ നിലയിലാണ് തുടരുന്നതെന്നും അധികൃതര് വ്യക്തമാക്കി.
അതേസമയം, മെഡിക്കല് സിറ്റിയിലെ ചില വിഭാഗങ്ങളില് എയര് കണ്ടീഷനിംഗ്, കൂളിംഗ് സംവിധാനങ്ങള് തകരാറിലായതിന്റെ യഥാര്ത്ഥ കാരണം വൈദ്യുതി മുടക്കമല്ലെന്ന് കിംഗ് അബ്ദുല് അസീസ് മെഡിക്കല് സിറ്റി അധികൃതര് വിശദീകരിച്ചു. സെന്ട്രല് കൂളിംഗ് സ്റ്റേഷനിലേക്ക് വെള്ളമെത്തിക്കുന്ന പ്രധാന വാട്ടര് ലൈനുകളില് ഒന്നിലുണ്ടായ അപ്രതീക്ഷിതമായ പൊട്ടലാണ് എസി സംവിധാനങ്ങളെ ബാധിച്ചതെന്ന് അവര് വ്യക്തമാക്കി. തങ്ങളുടെ നിയന്ത്രണത്തിന് അതീതമായ സാഹചര്യത്തിലാണ് ഈ അടിയന്തിര തകരാര് സംഭവിച്ചതെന്നും മെഡിക്കല് സിറ്റി അധികൃതര് കൂട്ടിച്ചേര്ത്തു.
തകരാര് ശ്രദ്ധയില്പ്പെട്ടയുടന് തന്നെ സാങ്കേതിക വിദഗ്ധരുടെ സംഘം സ്ഥലത്തെത്തി അറ്റകുറ്റപ്പണികള് ആരംഭിച്ചിട്ടുണ്ടെന്നും കൂളിംഗ് സംവിധാനങ്ങള് എത്രയും വേഗം സാധാരണ നിലയിലാക്കാന് ശ്രമിക്കുകയാണെന്നും അധികൃതര് അറിയിച്ചു. അപ്രതീക്ഷിത തകരാര് മൂലം രോഗികള്ക്കും സന്ദര്ശകര്ക്കും ഉണ്ടായ ബുദ്ധിമുട്ടുകളില് മെഡിക്കല്, ഓപ്പറേഷന് വിഭാഗങ്ങള് ഖേദം പ്രകടിപ്പിക്കുകയും, സ്ഥിതിഗതികള് ഉള്ക്കൊണ്ട് സഹകരിക്കുന്ന എല്ലാവര്ക്കും നന്ദി അറിയിക്കുകയും ചെയ്തു.
.jpg)
Related News
