റിയാദ്- അല് ഖര്ജ്, യാമ്പു ഗവര്ണറേറ്റുകളില് നിലനിന്നിരുന്ന അപകടസാധ്യതകള് ഒഴിഞ്ഞതായും ഇവിടങ്ങളിലെ സാഹചര്യങ്ങള് പൂര്ണ്ണമായും സാധാരണ നിലയിലായതായും ജനറല് ഡയറക്ടറേറ്റ് ഓഫ് സിവില് ഡിഫന്സ് അറിയിച്ചു. അടിയന്തര സാഹചര്യങ്ങള്ക്കായുള്ള ദേശീയ മുന്കൂര് മുന്നറിയിപ്പ് പ്ലാറ്റ്ഫോം വഴി നേരത്തെ നല്കിയ ജാഗ്രതാ നിര്ദ്ദേശത്തിന് പിന്നാലെയാണ് നിലവില് സ്ഥിതിഗതികള് ശാന്തമായതായി ഔദ്യോഗിക സ്ഥിരീകരണം വന്നിരിക്കുന്നത്.
സാധ്യമായ അപകടത്തെക്കുറിച്ച് മുന്നറിയിപ്പ് നല്കുന്നതിനായി സിവില് ഡിഫന്സ് നേരത്തെ അല് ഖര്ജ് ഗവര്ണറേറ്റില് പ്രത്യേക അലര്ട്ട് പുറപ്പെടുവിച്ചിരുന്നു. സുരക്ഷാ മാര്ഗ്ഗനിര്ദ്ദേശങ്ങള് പാലിക്കാനും ഔദ്യോഗിക നിര്ദ്ദേശങ്ങള് കര്ശനമായി പിന്തുടരാനും അധികൃതര് പൗരന്മാരോടും താമസക്കാരോടും ആവശ്യപ്പെട്ടിരുന്നു. കെട്ടിടങ്ങള്ക്കുള്ളിലെ സുരക്ഷിതമായ സ്ഥലങ്ങളില് തുടരുക, ജനലുകളില് നിന്നും തുറസ്സായ സ്ഥലങ്ങളില് നിന്നും മാറിനില്ക്കുക, ഒത്തുചേരലുകളും ചിത്രങ്ങള് പകര്ത്തുന്നതും ഒഴിവാക്കുക എന്നിവ ഇതില് ഉള്പ്പെടുന്നു. വാഹനം ഓടിക്കുന്നതിനിടയിലാണ് മുന്നറിയിപ്പ് ലഭിക്കുന്നതെങ്കില് റോഡിന്റെ വശങ്ങളില് സുരക്ഷിതമായി വാഹനം നിര്ത്തിയിടണമെന്നും നിര്ദ്ദേശമുണ്ടായിരുന്നു.
ഏതെങ്കിലും തരത്തിലുള്ള അപകടങ്ങള് ശ്രദ്ധയില്പ്പെട്ടാല് ഉടന് തന്നെ അടിയന്തര നമ്പറുകളില് ബന്ധപ്പെടേണ്ടതിന്റെ പ്രാധാന്യവും സിവില് ഡിഫന്സ് ഊന്നിപ്പറഞ്ഞു. മക്ക, മദീന, റിയാദ്, കിഴക്കന് പ്രവിശ്യ എന്നീ പ്രദേശങ്ങളിലുള്ളവര്ക്ക് 911 എന്ന നമ്പറിലും, രാജ്യത്തെ മറ്റ് പ്രദേശങ്ങളിലുള്ളവര്ക്ക് 998 എന്ന നമ്പറിലും സിവില് ഡിഫന്സുമായി ബന്ധപ്പെടാവുന്നതാണ്.
.jpg)
Related News
