ന്യൂഡല്‍ഹി- ഇന്ത്യയില്‍ അടുത്ത വര്‍ഷം മുതല്‍ 10 രൂപ, 20 രൂപ മൂല്യങ്ങളിലുള്ള പോളിമര്‍ (പ്ലാസ്റ്റിക്) കറന്‍സി നോട്ടുകള്‍ വിപണിയിലിറങ്ങിയേക്കും. പദ്ധതിയുടെ ആദ്യഘട്ടമെന്ന നിലയില്‍ പരീക്ഷണാടിസ്ഥാനത്തില്‍ വിതരണത്തിനായുള്ള തയ്യാറെടുപ്പുകളുമായി റിസര്‍വ് ബാങ്ക് ഓഫ് ഇന്ത്യ മുന്നോട്ട് പോവുകയാണ്. ഇതിനായി ആഗോള തലത്തിലുള്ള നിര്‍മ്മാതാക്കളില്‍ നിന്ന് ആര്‍ബിഐ താല്പര്യപത്രം ക്ഷണിച്ചു.

10, 20 രൂപ നോട്ടുകളിലാണ് ആര്‍ബിഐ ആദ്യം പരീക്ഷണ പദ്ധതി നടപ്പിലാക്കുക. ഫീല്‍ഡ് ട്രയലുകളുടെ വിജയത്തെ ആശ്രയിച്ചായിരിക്കും ഈ നോട്ടുകള്‍ വ്യാപകമായി പുറത്തിറക്കുന്ന കാര്യത്തില്‍ തീരുമാനമെടുക്കുക. പരീക്ഷണം വിജയകരമായാല്‍ 2027 മുതല്‍ പൂര്‍ണ്ണ തോതില്‍ പ്ലാസ്റ്റിക് നോട്ടുകള്‍ രാജ്യത്ത് അവതരിപ്പിച്ചേക്കും.

പദ്ധതിയുടെ ഭാഗമായി, ആര്‍ബിഐയുടെ കറന്‍സി പ്രിന്റിംഗ് അനുബന്ധ സ്ഥാപനമായ ഭാരതീയ റിസര്‍വ് ബാങ്ക് നോട്ട് മുദ്രണ്‍ പ്രൈവറ്റ് ലിമിറ്റഡ്, ആഗോള തലത്തില്‍ താല്പര്യപത്രം പുറപ്പെടുവിച്ചിട്ടുണ്ട്. സുരക്ഷാ സവിശേഷതകള്‍ ഉള്‍ക്കൊള്ളിച്ച ഒപാസിഫൈഡ് പോളിമര്‍ സബ്സ്ട്രേറ്റ് ഷീറ്റുകള്‍ വിതരണം ചെയ്യാന്‍ ശേഷിയുള്ള ആഗോള നിര്‍മ്മാതാക്കളെയാണ് ഇതിലൂടെ ക്ഷണിച്ചിരിക്കുന്നത്.

ബയാക്‌സിലി ഓറിയന്റഡ് പോളിപ്രൊഫൈലിന്‍ അധിഷ്ഠിതമായ 68,000 റീം പോളിമര്‍ സബ്സ്ട്രേറ്റ് ആണ് പ്രാഥമികമായി ആര്‍ബിഐ ആവശ്യപ്പെട്ടിരിക്കുന്നത്. രണ്ട് മൂല്യങ്ങളിലുള്ള നോട്ടുകള്‍ക്കുമായി 34,000 റീമുകള്‍ വീതമാണ് നീക്കിവെച്ചിരിക്കുന്നത്. ഒരു റീമില്‍ 500 ഷീറ്റുകള്‍ അടങ്ങിയിരിക്കും.