റിയാദ്: ബാബ് അല്‍-മന്ദബ് കടലിടുക്കിലൂടെ കടന്നുപോകുന്ന വാണിജ്യ കപ്പലുകളുടെ സുരക്ഷ ഉറപ്പാക്കുന്നതിനായി സംരക്ഷണ നടപടികള്‍ ആരംഭിച്ചതായി യെമനിലെ സഖ്യസേനയുടെ ഔദ്യോഗിക വക്താവ് മേജര്‍ ജനറല്‍ തുര്‍ക്കി അല്‍-മാലികി സ്ഥിരീകരിച്ചു. സമുദ്ര ഗതാഗതത്തിന് നേരെ ഹൂതികള്‍ ഉയര്‍ത്തുന്ന ഏത് തരത്തിലുള്ള ഭീഷണികളെയും പൂര്‍ണ്ണ കരുത്തോടും കടുപ്പത്തോടും കൂടി നേരിടുമെന്നും സഖ്യസേനയുടെ സംയുക്ത സേനാ കമാന്‍ഡ് മുന്നറിയിപ്പ് നല്‍കി.

അന്താരാഷ്ട്ര നിയമങ്ങള്‍ക്കും 1982-ലെ ഐക്യരാഷ്ട്രസഭയുടെ സമുദ്രനിയമ കണ്‍വെന്‍ഷനും അനുസൃതമായി, സമുദ്ര ഗതാഗതം സംരക്ഷിക്കുന്നതിനായി കര്‍ശനവും നിര്‍ണ്ണായകവുമായ പ്രവര്‍ത്തന നടപടികളാണ് സംയുക്ത സേന സ്വീകരിച്ചു വരുന്നതെന്ന് അല്‍-മാലികി വിശദീകരിച്ചു.

യെമനിലെ തുറമുഖങ്ങളും വിമാനത്താവളങ്ങളും അടച്ചുപൂട്ടിയിരിക്കുകയാണെന്ന പ്രചാരണം വ്യാജമാണെന്ന് അദ്ദേഹം വ്യക്തമാക്കി. യെമന്‍ സര്‍ക്കാരിനും അയല്‍രാജ്യങ്ങള്‍ക്കും എതിരെ ഹൂതികള്‍ നടത്തുന്ന തെറ്റായ പ്രചാരണങ്ങളുടെയും സംഘര്‍ഷം വളര്‍ത്താനുള്ള ശ്രമങ്ങളുടെയും ഭാഗമാണിതെന്നും, ഉപരോധം ഏര്‍പ്പെടുത്തിയിട്ടുണ്ടെന്ന വാദം ജനങ്ങളെ തെറ്റിദ്ധരിപ്പിക്കുന്നതാണെന്നും അദ്ദേഹം ചൂണ്ടിക്കാട്ടി.

ഇതിന്റെ തെളിവായി, 2026-ന്റെ ആദ്യ പകുതിയില്‍ ഭക്ഷണ സാധനങ്ങള്‍, മറ്റ് ചരക്കുകള്‍, ഇന്ധനം, നിര്‍മ്മാണ സാമഗ്രികള്‍ എന്നിവയുമായി 300-ലധികം വാണിജ്യ കപ്പലുകളാണ് ഹുദൈദ, സലീഫ്, റാസ് ഇസ്സ എന്നീ തുറമുഖങ്ങളില്‍ പ്രവേശിച്ചതെന്ന് അദ്ദേഹം വ്യക്തമാക്കി.

സന്‍ആ അന്താരാഷ്ട്ര വിമാനത്താവളം അടച്ചുപൂട്ടുന്നതിനും യെമന്‍ എയര്‍വേയ്സിന്റെ വിമാനങ്ങള്‍ നശിപ്പിക്കുന്നതിനും ഇടയാക്കിയത് ഹൂതി മിലിഷ്യകളുടെ നടപടികളാണെന്ന് അദ്ദേഹം കൂട്ടിച്ചേര്‍ത്തു. വിമാനത്താവളത്തില്‍ നിന്നുള്ള സര്‍വീസുകള്‍ പുനരാരംഭിക്കാന്‍ ലക്ഷ്യമിട്ടുള്ള ഉദ്യമങ്ങളെ ഹൂതികള്‍ നിരസിക്കുകയാണുണ്ടായത്.

കടന്നുപോകുന്ന കപ്പലുകള്‍ക്ക് നേരെ ഹൂതികള്‍ നടത്തുന്ന ഭീഷണികള്‍ അന്താരാഷ്ട്ര നിയമങ്ങളുടെ വ്യക്തമായ ലംഘനമാണെന്നും ഇത് സമുദ്രക്കൊള്ളയുടെ പരിധിയിലാണ് വരുന്നതെന്നും മേജര്‍ ജനറല്‍ തുര്‍ക്കി അല്‍-മാലികി സന്ദേശത്തില്‍ വ്യക്തമാക്കി.