റിയാദ്: സമാധാനപരമായ ആവശ്യങ്ങള്ക്കായി ആണവോര്ജം ഉപയോഗിക്കുന്നതുമായി ബന്ധപ്പെട്ട് സൗദി അറേബ്യയും അമേരിക്കയും സഹകരണ കരാറില് ഒപ്പുവെച്ചതായി സൗദി ഊര്ജ്ജ മന്ത്രാലയം അറിയിച്ചു. സൗദി അറേബ്യ തങ്ങളുടെ ശക്തമായ തന്ത്രപരമായ പങ്കാളിയാണെന്നും റിയാദുമായി ആണവ കരാറില് ഏര്പ്പെടുന്നത് തികച്ചും സ്വാഭാവികമാണെന്നും യു.എസ്. സ്റ്റേറ്റ് സെക്രട്ടറി മാര്ക്കോ റൂബിയോ മലിനയില് പറഞ്ഞു. സൗദിയുമായുള്ള ഈ സഹകരണ കരാര് പൂര്ണ്ണമായും സമാധാനപരവും സിവിലിയനുമായ ആണവ പദ്ധതിക്ക് മാത്രമുള്ളതായിരിക്കുമെന്നും അദ്ദേഹം പറഞ്ഞു.
'ലോകത്തിലെ ഏത് രാജ്യവുമായി സിവിലിയന് ആണവോര്ജ കരാറില് ഏര്പ്പെടുമ്പോഴും, അതൊരു ആയുദ്ധ നിര്മ്മാണ പരിപാടിയായി മാറ്റാന് കഴിയില്ലെന്ന് ഉറപ്പാക്കാനുള്ള കര്ശനമായ സുരക്ഷാ മുന്കരുതലുകള് അതില് ഉണ്ടായിരിക്കും,' മനിലയില് നടന്ന തെക്കുകിഴക്കന് ഏഷ്യന് ഉച്ചകോടിയുടെ വേളയില് മാധ്യമപ്രവര്ത്തകരോട് സംസാരിക്കവെ റൂബിയോ വ്യക്തമാക്കി. 'സൗദി അറേബ്യ സമാധാനപരമായ ഒരു സിവിലിയന് ആണവ പദ്ധതിയാണ് ലക്ഷ്യമിടുന്നത്,' എന്ന് വ്യക്തമാക്കിയ അദ്ദേഹം, യുണൈറ്റഡ് അറബ് എമിറേറ്റുമായും സമാനമായ ഒരു കരാര് നിലവിലുണ്ടെന്നും ചൂണ്ടിക്കാട്ടി.
മറ്റൊരു രാജ്യവുമായി ആണവ സഹകരണത്തില് ഏര്പ്പെടാന് വാഷിംഗ്ടണിന് ആവശ്യമായ '123 കരാര്' (123 Agreement) എന്നറിയപ്പെടുന്ന ഈ ഉടമ്പടി, സൗദി ഊര്ജ്ജ മന്ത്രി അബ്ദുല് അസീസ് ബിന് സല്മാനും യു.എസ്. ഊര്ജ്ജ സെക്രട്ടറി ക്രിസ് റൈറ്റും ചേര്ന്നാണ് ഔദ്യോഗികമായി ഒപ്പുവെച്ചത്. ട്രംപ് ഭരണകൂടം 'ഉഭയകക്ഷി സുരക്ഷാ കരാര്' എന്ന് വിശേഷിപ്പിച്ച മറ്റൊരു കരാറിലും ഇതോടൊപ്പം ഒപ്പുവെച്ചിട്ടുണ്ട്.
യു.എസും സൗദി അറേബ്യയും തമ്മിലുള്ള ചരിത്രപരമായ തന്ത്രപരമായ പങ്കാളിത്തത്തിന്റെ തുടര്ച്ചയാണിതെന്ന് സൗദി ഊര്ജ്ജ മന്ത്രാലയം പ്രസ്താവനയില് വ്യക്തമാക്കി. കഴിഞ്ഞ നവംബറില് കിരീടാവകാശി മുഹമ്മദ് ബിന് സല്മാന് യു.എസ്. സന്ദര്ശിച്ച വേളയില്, സമാധാനപരമായ ആവശ്യങ്ങള്ക്കായുള്ള ആണവോര്ജ സഹകരണത്തെക്കുറിച്ചുള്ള ഉഭയകക്ഷി ചര്ച്ചകള് വിജയകരമായി പൂര്ത്തിയായതായി പ്രഖ്യാപിച്ചിരുന്നു.
ഊര്ജ്ജം, നൂതന സാങ്കേതികവിദ്യകള് എന്നീ മേഖലകളില് ഇരു രാജ്യങ്ങളും തമ്മിലുള്ള സഹകരണം ഈ കരാര് കൂടുതല് ശക്തിപ്പെടുത്തുമെന്ന് മന്ത്രാലയം കൂട്ടിച്ചേര്ത്തു. അറിവുകളും വൈദഗ്ധ്യവും സാങ്കേതികവിദ്യകളും പരസ്പരം കൈമാറാന് ഇത് വഴിയൊരുക്കും. കൂടാതെ, ആണവ സുരക്ഷ, ആണവ സുരക്ഷിതത്വം, പ്രൊലിഫറേഷന് വിരുദ്ധ (പ്രസരണ പ്രതിരോധ) മാനദണ്ഡങ്ങള് എന്നിവയില് ഉയര്ന്ന അന്താരാഷ്ട്ര നിലവാരം ഉറപ്പാക്കാനുള്ള ശ്രമങ്ങള്ക്കും ഇത് ലക്ഷ്യമിടുന്നു.
'യു.എസ്.-സൗദി വാണിജ്യ ബന്ധങ്ങള് ശക്തിപ്പെടുത്തുന്നതിനും, നാട്ടില് സമൃദ്ധിയും സഖ്യകക്ഷികള്ക്ക് സുരക്ഷയും ഉറപ്പാക്കുന്നതിനും ഇരു രാജ്യങ്ങളും തമ്മിലുള്ള പങ്കാളിത്തം ഈ കരാറുകള് പ്രതിഫലിപ്പിക്കുന്നു,' എന്ന് ഊര്ജ്ജ സെക്രട്ടറി ക്രിസ് റൈറ്റ് പ്രസ്താവനയില് പറഞ്ഞു.
.jpg)
Related News
