റിയാദ്: വരും സീസണിലെ സൗദി റോഷന് ലീഗ് പോരാട്ടങ്ങള്ക്കായി ടീം ശക്തമാക്കുന്നതിന്റെ ഭാഗമായി 30-കാരനായ ബോസ്നിയന് ഗോള്കീപ്പര് നിക്കോള വാസിലിയെ അല്-ദിരിയ ക്ലബ് സ്വന്തമാക്കി. ഈ സീസണില് ക്ലബ്ബ് കൊണ്ടുവരുന്ന ആദ്യ വിദേശ താരം എന്ന പ്രത്യേകതയോടെയാണ് വാസിലി ക്ലബ്ബിലെത്തുന്നത്.
തങ്ങളുടെ ഔദ്യോഗിക എക്സ് പേജിലൂടെ ക്ലബ്ബ് താരത്തിന്റെ വരവ് ഔദ്യോഗികമായി അറിയിച്ചു. 'ബാല്ക്കണിന്റെ ഹൃദയഭാഗത്ത് നിന്ന്... വാസിലി, രാജാക്കന്മാരുടെ വീടിന്റെ മതില്'എന്ന അടിക്കുറിപ്പോടെയാണ് താരം ക്ലബ്ബിലേക്ക് എത്തുന്ന വിവരം അല്-ദിരിയ പങ്കുവെച്ചത്.
ബോസ്നിയന് ക്ലബ്ബായ സിരിന്സ്കി മോസ്റ്റാറില് പ്രൊഫഷണല് കരിയര് ആരംഭിച്ച വാസിലി, ജര്മ്മന് ക്ലബ്ബായ ന്യൂറെംബര്ഗ് കക, ഉക്രേനിയന് ക്ലബ്ബായ സോര്യ ലുഹാന്സ്ക് എന്നിവര്ക്കായും ഗ്ലൗസണിഞ്ഞിട്ടുണ്ട്. 2021ല് ജര്മ്മന് ക്ലബ്ബായ സെന്റ് പോളിയില് ചേര്ന്ന താരം 160-ലധികം മത്സരങ്ങളില് ടീമിന്റെ ഒന്നാം നമ്പര് ഗോള്കീപ്പറായി തിളങ്ങുകയും, ടീമിനെ ബുണ്ടസ്ലിഗയിലേക്ക് ഉയര്ത്തുന്നതില് നിര്ണായക പങ്ക് വഹിക്കുകയും ചെയ്തു.
ബോസ്നിയ ആന്ഡ് ഹെര്സെഗോവിനയുടെ ടീമുകളിലൂടെ വളര്ന്ന വാസിലി 2021-ലാണ് സീനിയര് ടീമില് അരങ്ങേറിയത്. 2026 ലോകകപ്പില് ബോസ്നിയക്കായി നാല് മത്സരങ്ങളിലും അദ്ദേഹം ഗോള്വല കാത്തു.
സൗദി ലീഗിലെ മറ്റ് വന്കിട ക്ലബ്ബുകളോട് പോരാടാന് അല്-ദിരിയ നടത്തുന്ന ഏറ്റവും പ്രധാനപ്പെട്ട നീക്കമായി നിക്കോള വാസിലിയുടെ ട്രാന്സ്ഫര് വിലയിരുത്തപ്പെടുന്നു.
Related News
