വാഷിംഗ്ടണ്: ജോര്ദാനിലെ യു.എസ് സൈനിക താവളം ലക്ഷ്യമിട്ട് ഇറാന് ഇസ്ലാമിക് റെവല്യൂഷണറി ഗാര്ഡ് കോര്പ്സ് (ഐ.ആര്.ജി.സി) നിരവധി ബാലസ്റ്റിക് മിസൈലുകള് തൊടുത്തുവിട്ടതായി യു.എസ് സെന്ട്രല് കമാന്ഡ് (സെന്കോം) അറിയിച്ചു. യു.എസ് വ്യോമാക്രമണങ്ങളില് ചെറിയൊരു ഇടവേളയ്ക്ക് ശേഷം രാജ്യത്തെ അമേരിക്കന് സേനയ്ക്ക് നേരെ ഇറാന് നടത്തുന്ന ആദ്യ നേരിട്ടുള്ള ആക്രമണമാണിത്.
തൊടുത്തുവിട്ട എല്ലാ മിസൈലുകളും വിജയകരമായി തടഞ്ഞതായും ആളപായമോ നാശനഷ്ടങ്ങളോ റിപ്പോര്ട്ട് ചെയ്തിട്ടില്ലെന്നും സെന്കോം പ്രസ്താവനയില് വ്യക്തമാക്കി. വടക്കുകിഴക്കന് ജോര്ദാനിലെ അസ്റാഖിന് സമീപമുള്ള മുവഫാഖ് സാല്തി വ്യോമതാാവളത്തെയാണ് ഇറാന് ലക്ഷ്യമിട്ടതെന്നാണ് കരുതുന്നത്. യു.എസ് സൈന്യവും യുദ്ധവിമാനങ്ങളും നിലയുറപ്പിച്ചിട്ടുള്ള ഈ താവളത്തിന് നേരെ ഈ മാസം നേരത്തെയും ഇറാന് ആക്രമണമുണ്ടായിരുന്നു. ആ ആക്രമണങ്ങളില് അമേരിക്കന് സൈനികര് കൊല്ലപ്പെട്ടിരുന്നു.
പടിഞ്ഞാറന്-മധ്യ ഇറാന്റെ ഭാഗത്തുനിന്ന് മിസൈലുകള് തൊടുക്കുന്നതും, യു.എസിന്റെ പേട്രിയറ്റ് ബാറ്ററികളോ ജോര്ദാനിയന് പ്രതിരോധ സംവിധാനങ്ങളോ ചേര്ന്ന് അവ തകര്ക്കുന്നതിന്റെ ദൃശ്യങ്ങള് സമൂഹമാധ്യമങ്ങളില് പ്രചരിക്കുന്നുണ്ട്.
കഴിഞ്ഞ കുറച്ചു ദിവസങ്ങളായി ഇരു രാജ്യങ്ങളും തമ്മിലുള്ള സംഘര്ഷങ്ങള് ഉയര്ന്ന നിലയിലാണ്. ജൂലൈ മാസം മധ്യത്തില് ജോര്ദാനിലെ യു.എസ് കേന്ദ്രങ്ങള്ക്ക് നേരെ ഇറാന് നിരവധി തവണ ആക്രമണങ്ങള് നടത്തിയിരുന്നു. ഇതില് ചിലത് യു.എസിന് ആള്നാശവും വരുത്തിയിരുന്നു. ഇറാന്റെ പുതിയ ആക്രമണത്തിന് അമേരിക്ക തിരിച്ചടി നല്കുമോ എന്നത് സംബന്ധിച്ച് ഔദ്യോഗിക വിവരങ്ങള് ലഭ്യമായിട്ടില്ല. അതേസമയം, മിസൈലുകള് പൂര്ണ്ണമായി തടഞ്ഞു എന്ന വാദത്തെ ഐ.ആര്.ജി.സി അനുകൂല മാധ്യമങ്ങള് തള്ളിക്കളയുകയും ചിലയിടങ്ങളില് മിസൈലുകള് പതിച്ചിട്ടുണ്ടെന്ന് സൂചിപ്പിക്കുകയും ചെയ്തിട്ടുണ്ട്.
Related News
