ഗാസ സിറ്റി: ഇസ്രായേലുമായുള്ള യുദ്ധം അവസാനിപ്പിക്കുന്നതിനായി യു.എസ് പ്രസിഡന്റ് ഡൊണാള്ഡ് ട്രംപ് പ്രഖ്യാപിച്ച കരാര് അംഗീകരിച്ചതായി ഹമാസ് അറിയിച്ചു. ഫലസ്തീന് ഭരണസമിതിക്ക് ആയുധങ്ങള് കൈമാറുന്നതും ഗാസയില് നിന്ന് ഇസ്രായേല് സൈന്യം ഘട്ടംഘട്ടമായി പിന്മാറുന്നതും കരാറില് ഉള്പ്പെടുന്നുണ്ട്.
എന്നാല് പ്രഖ്യാപനത്തോട് ഇസ്രായേല് ഇതുവരെ ഔദ്യോഗികമായി പ്രതികരിച്ചിട്ടില്ല. ഗാസയുടെ സമ്പൂര്ണ്ണ നിരായുധീകരണമെന്ന ഇസ്രായേലിന്റെ ആവശ്യങ്ങള് പുതിയ നിര്ദ്ദിഷ്ട കരാര് തൃപ്തികരമായി അഭിസംബോധന ചെയ്യുന്നില്ലെന്ന് പ്രഖ്യാപനത്തിന് തൊട്ടുമുമ്പ് ഒരു ഇസ്രായേലി രാഷ്ട്രീയ വൃത്തം എ.എഫ്.പിയോട് വ്യക്തമാക്കിയിരുന്നു. വാഷിംഗ്ടണില് ഈ ആഴ്ച നടന്ന ഇസ്രായേല് പ്രധാനമന്ത്രി നെതന്യാഹുവും ട്രംപും തമ്മിലുള്ള കൂടിക്കാഴ്ചയില് ഗാസ വിഷയം ചര്ച്ചയില് വന്നില്ലെന്നും പ്രസ്തുത വൃത്തം കൂട്ടിച്ചേര്ത്തു.
ഒക്ടോബര് മുതല് നിലവിലുള്ള വെടിനിര്ത്തല് കരാര് നടപ്പിലാക്കുന്നതിലെ പ്രധാന തടസ്സങ്ങളിലൊന്നായിരുന്നു ഹമാസിന്റെ ആയുധങ്ങള്. ഹമാസിന്റെ 'സമ്പൂര്ണ്ണ നിരായുധീകരണത്തിനായുള്ള' കരാര് ട്രംപ് വ്യാഴാഴ്ച വൈകി പ്രഖ്യാപിച്ചിരുന്നു. ഗാസയില് പുതിയ ഫലസ്തീന് ഭരണകൂടം രൂപീകരിക്കുന്നതിനുള്ള നിര്ണായക ചുവടുവെപ്പായാണ് ട്രംപ് ഇതിനെ വിശേഷിപ്പിച്ചത്.
ട്രംപിന്റെ ബോര്ഡ് ഓഫ് പീസ് രൂപീകരിച്ച ഭരണസമിതി, ഹമാസിന്റെ ആയുധങ്ങള് സൂക്ഷിക്കുന്ന പ്രക്രിയയ്ക്ക് മേല്നോട്ടം വഹിക്കുമെന്ന് ഹമാസ് ഉദ്യോഗസ്ഥര് എ.എഫ്.പിയോട് പറഞ്ഞു. ഗാസയില് നിന്നുള്ള ഇസ്രായേലിന്റെ പിന്മാറ്റം ഉള്പ്പെടെയുള്ള കരാര് വ്യവസ്ഥകള് ഇസ്രായേല് പാലിക്കുന്നുണ്ടെന്ന് ഉറപ്പാക്കാന് മധ്യസ്ഥരും ബോര്ഡ് ഓഫ് പീസും തയാറാകുമെന്നും ഹമാസ് പ്രതീക്ഷ പ്രകടിപ്പിച്ചു.
Related News
