കോഴിക്കോട് -സൗദി കെ.എം.സി.സി. നാഷണല് കമ്മിറ്റി നല്കുന്ന ഹാഷിം എഞ്ചിനീയര് കര്മ്മ പുരസ്കാരത്തിന് മുസ്ലിം ലീഗ് നേതാവും മുന് മന്ത്രിയുമായ ഡോ. എം.കെ. മുനീര് അര്ഹനായി. സാമൂഹിക-സാംസ്കാരിക പുരോഗതിക്കും മതേതര മൂല്യങ്ങളും മതസൗഹാര്ദ്ദവും ഉയര്ത്തിപ്പിടിക്കുന്നതിനും നല്കിയ മികച്ച സംഭാവനകള് പരിഗണിച്ചാണ് പുരസ്കാരം. ഒരു ലക്ഷം രൂപയും പ്രശസ്തിപത്രവും ഫലകവുമടങ്ങുന്ന അവാര്ഡ് നിര്ണ്ണയിച്ചത് ഇ.ടി. മുഹമ്മദ് ബഷീര് എം.പി., എം.സി. മായിന്ഹാജി, കെ.പി. മുഹമ്മദ്കുട്ടി, സി.പി. സൈതലവി, ടി.ടി. ഇസ്മായില് എന്നിവരടങ്ങിയ ജൂറിയാണ്.
സൗദി കെ.എം.സി.സിയുടെ സ്ഥാപക നേതാക്കളിലൊരാളും മുന് ട്രഷററുമായ സി. ഹാഷിം എഞ്ചിനീയറുടെ സ്മരണാര്ത്ഥമാണ് ഈ പുരസ്കാരം ഏര്പ്പെടുത്തിയിട്ടുള്ളത്. മുന്വര്ഷങ്ങളില് എം.ഐ. തങ്ങള്, എം.സി. വടകര, പ്രൊഫ. കെ.എം. ഖാദര് മൊയ്തീന് തുടങ്ങിയ പ്രമുഖര്ക്കാണ് അവാര്ഡ് ലഭിച്ചത്.
നാല് പതിറ്റാണ്ടിലേറെയായി രാഷ്ട്രീയ-സാമൂഹിക-സാംസ്കാരിക രംഗത്ത് സജീവമായ ഡോ. എം.കെ. മുനീറിന് ഈ വര്ഷത്തെ പുരസ്കാരം നല്കാന് സാധിച്ചതില് ഏറെ സന്തോഷമുണ്ടെന്ന് കെ.എം.സി.സി. ഭാരവാഹികള് വാര്ത്താസമ്മേളനത്തില് അറിയിച്ചു. മുന് കേരള മുഖ്യമന്ത്രി സി.എച്ച്. മുഹമ്മദ് കോയയുടെ മകനായ ഡോ. എം.കെ. മുനീര്, എം.ബി.ബി.എസ്. ബിരുദധാരിയും വിവിധ മണ്ഡലങ്ങളില്നിന്ന് ആറ് തവണ നിയമസഭാംഗവും മുന് പൊതുമരാമത്ത്-സാമൂഹ്യക്ഷേമ മന്ത്രിയുമാണ്. രാഷ്ട്രീയത്തിന് പുറമെ ഇന്ത്യാവിഷന് വാര്ത്താ ചാനലിന്റെ സ്ഥാപക ചെയര്മാന്, ചന്ദ്രിക ദിനപത്രത്തിന്റെ ഡയറക്ടര്, എഴുത്തുകാരന്, ഗായകന് എന്നീ നിലകളിലും അദ്ദേഹം വ്യക്തിമുദ്ര പതിപ്പിച്ചിട്ടുണ്ട്.
Related News
