ഉനൈസ: സൗദി അറേബ്യയിലെ ഈന്തപ്പന കൃഷി മേഖലയെ ശക്തിപ്പെടുത്തുന്നതിന്റെ ഭാഗമായി ഖസീം അഗ്രികള്ച്ചറല് ട്രെയിനിങ് സെന്ററും പരിസ്ഥിതി, ജല, കൃഷി മന്ത്രാലയവും ടെക്നിക്കല് ആന്റ് വൊക്കേഷണല് ട്രെയിനിങ് കോര്പ്പറേഷനും സംയുക്തമായി യുവാക്കള്ക്ക് ഈന്തപ്പഴ ശേഖരണ (ഡേറ്റ് ഹാര്വെസ്റ്റിംഗ്) പരിശീലനം നല്കുന്നതിന്റെ രണ്ടാം ഘട്ടം പൂര്ത്തിയായി.
മികച്ച കാര്ഷിക രീതികള് അവലംബിച്ച് ഈന്തപ്പന മേഖലയില് പ്രവര്ത്തിക്കാന് തദ്ദേശീയരായ യുവജനങ്ങളെ പ്രാപ്തരാക്കുകയാണ് ഈ പദ്ധതിയുടെ ലക്ഷ്യം. മികച്ച വിളവെടുപ്പ് ഉറപ്പാക്കാനും വിപണിയിലെ മത്സരക്ഷമത വര്ദ്ധിപ്പിക്കുന്നതിനുമുള്ള സീസണല് കഴിവുകള് സൗദി യുവാക്കള്ക്ക് ഇതിലൂടെ നല്കുന്നു.
തൊഴില് ദേശവത്കരണത്തെയും പ്രാദേശിക നിക്ഷേപ അവസരങ്ങളെയും പിന്തുണയ്ക്കുന്ന ഈ പരിപാടിയിലേക്ക് ബുറൈദയില് നിന്നും സമീപ ഗവര്ണറേറ്റുകളില് നിന്നുമായി ഇരുനൂറിലധികം പേര് പങ്കെടുത്തു. ഇതില് എഴുപതിലധികം പേര് ഇതിനകം പരിശീലനത്തിന്റെ രണ്ടാം ഘട്ടം വിജയകരമായി പൂര്ത്തിയാക്കി.
Related News
