തെഹ്റാന്: ഒരു മാസത്തോളം താരതമ്യേന ശാന്തമായിരുന്ന ഗള്ഫ് മേഖല വീണ്ടും അശാന്തമാവുന്നു. ഇറാനുമായി ബന്ധപ്പെട്ട മൂന്ന് എണ്ണക്കപ്പലുകള് അമേരിക്കന് സൈന്യം ആക്രമിച്ച് തകര്ത്തതിന് പിന്നാലെ, ഹോര്മുസ് കടലിടുക്കിലൂടെ സഞ്ചരിച്ചിരുന്ന അമേരിക്കയുമായി ബന്ധപ്പെട്ട മൂന്ന് കപ്പലുകളെയും മൂന്ന് എണ്ണക്കപ്പലുകളെയും ലക്ഷ്യമിട്ട് ആക്രമണം നടത്തിയതായി ഇറാന്റെ ഇസ്ലാമിക് റെവല്യൂഷണറി ഗാര്ഡ് അവകാശപ്പെട്ടു.
ഖാരിജ് ദ്വീപിന് സമീപം ഉള്പ്പെടെ ഇറാന്റെ രണ്ട് എണ്ണക്കപ്പലുകള് പ്രവര്ത്തനരഹിതമാക്കിയെന്നും ഗള്ഫ് ഓഫ് ഒമാനിലുണ്ടായിരുന്ന മറ്റൊരു കപ്പല് പൂര്ണമായും നശിപ്പിച്ചതായും അമേരിക്കന് സൈന്യം അറിയിച്ചു. ഇറാന്റെ പ്രാദേശിക സായുധസംഘങ്ങള്ക്ക് സാമ്പത്തിക സഹായം നല്കുന്ന എണ്ണക്കപ്പലുകളെയാണ് ലക്ഷ്യമിട്ടതെന്നാണ് അമേരിക്കയുടെ വിശദീകരണം.
അമേരിക്കന് നടപടിക്ക് മറുപടിയായാണ് ഹോര്മുസ് കടലിടുക്കിലൂടെ 'അനുമതിയില്ലാത്ത മാര്ഗത്തിലൂടെ' സഞ്ചരിച്ച മൂന്ന് അമേരിക്കന് ബന്ധമുള്ള കപ്പലുകളെയും മൂന്ന് എണ്ണക്കപ്പലുകളെയും ആക്രമിച്ചതെന്ന് ഇറാന്റെ ഔദ്യോഗിക മാധ്യമങ്ങള് റിപ്പോര്ട്ട് ചെയ്തത്.
വിമാനവാഹിനിക്കപ്പലിനെയും ഗൈഡഡ് മിസൈല് ഡിസ്ട്രോയറിനെയും ലക്ഷ്യമിട്ട് ഇറാന് ആക്രമണം നടത്തിയെന്നും എന്നാല് എല്ലാ ആക്രമണങ്ങളും വിജയകരമായി പ്രതിരോധിച്ചെന്നും സെന്ട്രല് കമാന്ഡ് അറിയിച്ചു. അമേരിക്കന് സൈനികര്ക്കോ കപ്പലുകള്ക്കോ നാശനഷ്ടമുണ്ടായിട്ടില്ലെന്നും അവര് വ്യക്തമാക്കി.
അമേരിക്കന് കപ്പലുകള്ക്ക് നേരെ വെടിയുതിര്ക്കുകയാണെങ്കില് ഇറാന്റെ എണ്ണക്കപ്പലുകള് മുക്കുമെന്ന് അമേരിക്കന് പ്രതിരോധ സെക്രട്ടറി പീറ്റ് ഹെഗ്സെത്ത് മുന്നറിയിപ്പ് നല്കി. ഇറാനുമായി നടത്തുന്നത് യുദ്ധമല്ല എന്ന് അമേരിക്കന് ഭരണകൂടം വരുത്തിത്തീര്ക്കാന് ശ്രമിക്കുന്നതിനിടെയാണ് സംഘര്ഷം വ്യാപിക്കുന്നത്.
ഇറാന്റെ എണ്ണക്കയറ്റുമതിയുടെ ഏകദേശം 90 ശതമാനവും നടക്കുന്ന ഖാരിജ് ദ്വീപിന് സമീപമുള്ള ആക്രമണം സാമ്പത്തികമായും തന്ത്രപ്രധാനമായും വലിയ പ്രത്യാഘാതങ്ങള്ക്ക് ഇടയാക്കുമെന്നാണ് വിലയിരുത്തല്. ലോകത്തിലെ പ്രധാന എണ്ണഗതാഗത പാതയായ ഹോര്മുസ് കടലിടുക്കില് വീണ്ടും സംഘര്ഷം ശക്തമായതോടെ അന്താരാഷ്ട്ര എണ്ണവിപണിയിലും ആഗോള ചരക്കുകപ്പല് ഗതാഗതത്തിലും ആശങ്ക വര്ധിച്ചിട്ടുണ്ട്.
ഒരു മാസത്തോളം താരതമ്യേന ശാന്തമായിരുന്ന സാഹചര്യത്തിന് പിന്നാലെ കഴിഞ്ഞ ആഴ്ച മുതല് വീണ്ടും രൂക്ഷമായ അമേരിക്കഇറാന് ഏറ്റുമുട്ടല് ഗള്ഫ് മേഖലയിലെ സുരക്ഷാ സാഹചര്യം കൂടുതല് സങ്കീര്ണമാക്കുകയാണ്. നയതന്ത്രപരമായ പരിഹാരത്തിന് ഇതുവരെ വ്യക്തമായ പുരോഗതി ഉണ്ടായിട്ടില്ല.
Related News
