ദമ്മാം: കെ.എം.സി.സി ഈസ്റ്റേണ്‍ പ്രൊവിന്‍സ് കമ്മിറ്റി എജ്യുക്കേഷണല്‍ വിങ്ങിന്റെ ആഭിമുഖ്യത്തില്‍ അധ്യാപകദിനം ആഘോഷിച്ചു. ലോകത്തിലെ ഏറ്റവും മഹത്തരമായ ജോലികളിലൊന്നാണ് അധ്യാപനം. കേവലം പുസ്തകങ്ങള്‍ പഠിപ്പിക്കുന്നതിനപ്പുറം വ്യക്തിത്വം രൂപപ്പെടുത്തുന്നതിലും സ്വഭാവരൂപീകരണത്തിലും വിദ്യാര്‍ത്ഥികളില്‍ അന്തര്‍ലീനമായ കഴിവുകള്‍ കണ്ടെത്തി പരിപോഷിപ്പിക്കുന്നതിലുമെല്ലാം അധ്യാപകര്‍ നല്‍കുന്ന പങ്ക് നിസ്തുലമാണ്. സാങ്കേതികവിദ്യ എത്ര ദ്രുതഗതിയില്‍ മുന്നേറിയാലും അധ്യാപകരുടെ പ്രസക്തി സമൂഹത്തില്‍ എന്നും നിലനില്‍ക്കും.

ഇന്ത്യയുടെ പ്രഥമ ഉപരാഷ്ട്രപതിയും രണ്ടാമത്തെ രാഷ്ട്രപതിയുമായ ഡോക്ടര്‍ സര്‍വേപ്പള്ളി രാധാകൃഷ്ണന്റെ ജന്മദിനമായ സെപ്റ്റംബര്‍ 5-നാണ് അധ്യാപകദിനമായി ആഘോഷിക്കുന്നത്. പ്രമുഖ അക്കാദമിഷ്യനും തത്ത്വചിന്തകനും രാഷ്ട്രതന്ത്രജ്ഞനുമായിരുന്ന ഡോ. രാധാകൃഷ്ണന്‍ 1952 മുതല്‍ 1962 വരെ ഇന്ത്യയുടെ ഉപരാഷ്ട്രപതിയായും 1962 മുതല്‍ 1967 വരെ രാഷ്ട്രപതിയായും സേവനമനുഷ്ഠിച്ചു. 1949 മുതല്‍ 1952 വരെ സോവിയറ്റ് യൂണിയനിലേക്കുള്ള ഇന്ത്യയുടെ അംബാസഡറായും അദ്ദേഹം പ്രവര്‍ത്തിച്ചിട്ടുണ്ട്. കൂടാതെ 1931 മുതല്‍ 1936 വരെ ആന്ധ്ര സര്‍വകലാശാലയുടെയും 1939 മുതല്‍ 1948 വരെ ബനാറസ് ഹിന്ദു സര്‍വകലാശാലയുടെയും വൈസ് ചാന്‍സലറായും സേവനമനുഷ്ഠിച്ചു. താരതമ്യ മതപഠനത്തിലും തത്ത്വശാസ്ത്രത്തിലും ഇരുപതാം നൂറ്റാണ്ടിലെ ഏറ്റവും സ്വാധീനമുള്ള പണ്ഡിതന്മാരില്‍ ഒരാളായി അദ്ദേഹം കണക്കാക്കപ്പെടുന്നു.

ബര്‍ക്ക ബ്രില്യന്റ് ഇന്റര്‍നാഷണല്‍ സ്‌കൂള്‍ പ്രിന്‍സിപ്പല്‍ സല്‍മ ഷറഫുദ്ദീന്‍ അധ്യാപകദിന സന്ദേശം നല്‍കിയ ചടങ്ങ് കെ.എം.സി.സി നാഷണല്‍ കമ്മിറ്റി സെക്രട്ടറി ആലിക്കുട്ടി ഒളവട്ടൂര്‍ ഉദ്ഘാടനം ചെയ്തു. ഈസ്റ്റേണ്‍ പ്രൊവിന്‍സ് ആക്ടിങ് ജനറല്‍ സെക്രട്ടറി ഒ.പി. ഹബീബ്, കെ.എം.സി.സി ദമ്മാം സെന്‍ട്രല്‍ കമ്മിറ്റി ജനറല്‍ സെക്രട്ടറി മുജീബ് കൊളത്തൂര്‍ എന്നിവര്‍ ആശംസകള്‍ നേര്‍ന്നു. ഈസ്റ്റേണ്‍ പ്രൊവിന്‍സ് വൈസ് പ്രസിഡന്റ് ഖാദര്‍ മാസ്റ്റര്‍ വാണിയമ്പലം സ്വാഗതം പറഞ്ഞു. അബ്ദുല്‍ മജീദ് കൊടുവള്ളി ഡിബേറ്റിന് നേതൃത്വം നല്‍കി.