നെടുമ്പാശേരി: ഒക്ടോബര്‍ 25 മുതല്‍ കൊച്ചിയില്‍ നിന്ന് ബാങ്കോക്കിലേക്ക് നേരിട്ടുള്ള പുതിയ വിമാന സര്‍വീസ് ആരംഭിക്കാന്‍ എയര്‍ ഇന്ത്യ എക്‌സ്പ്രസ് തീരുമാനിച്ചു. കൂടാതെ, വിമാനത്തിലെ കാബിന്‍ ക്രൂ അംഗങ്ങള്‍ക്കായി ഇന്ത്യന്‍ സാംസ്‌കാരിക പാരമ്പര്യം വിളിച്ചോതുന്ന പുതിയ യൂണിഫോമും കമ്പനി അവതരിപ്പിച്ചു.

്‌കൊച്ചി ബാങ്കോക്ക് കൊച്ചി റൂട്ടില്‍ ആഴ്ചയില്‍ നാലു ദിവസങ്ങളിലാണ് എയര്‍ ഇന്ത്യ എക്‌സ്പ്രസ് സര്‍വീസ് നടത്തുക. ഞായര്‍, ചൊവ്വ, വ്യാഴം, ശനി ദിവസങ്ങളിലായിരിക്കും സര്‍വീസുകള്‍. കൊച്ചിയില്‍ നിന്ന് രാത്രി 10:15-ന് പുറപ്പെടുന്ന വിമാനം പുലര്‍ച്ചെ 3:55-ന് ബാങ്കോക്കിലെത്തും. ബാങ്കോക്കില്‍ നിന്ന് പുലര്‍ച്ചെ 4:55-ന് പുറപ്പെട്ട് രാവിലെ 7:40-ന് കൊച്ചിയില്‍ തിരിച്ചെത്തും. ബോയിങ് 737 വിമാനങ്ങളാണ് ഈ സര്‍വീസിനായി ഉപയോഗിക്കുന്നത്. നിലവില്‍ എയര്‍ ഏഷ്യ, തായ് ലയണ്‍ എയര്‍ എന്നീ കമ്പനികളും കൊച്ചി ബാങ്കോക്ക് റൂട്ടില്‍ സര്‍വീസ് നടത്തുന്നുണ്ട്.

ദേശീയ പാരമ്പര്യം തൊട്ടറിയുന്ന യൂണിഫോം

എയര്‍ ഇന്ത്യ എക്‌സ്പ്രസിന്റെ 'ടെയ്ല്‍സ് ഓഫ് ഇന്ത്യ' ക്യാംപെയ്‌നിന്റെ ഭാഗമായാണ് കാബിന്‍ ക്രൂവിന് പുതിയ വസ്ത്രധാരണം ഏര്‍പ്പെടുത്തിയത്. ഇന്ത്യയിലെ തനത് വസ്ത്ര നിര്‍മാണ പാരമ്പര്യത്തെയും കരകൗശല വിദ്യകളെയും കോര്‍ത്തിണക്കിയാണ് ഇവ രൂപകല്‍പ്പന ചെയ്തിരിക്കുന്നത്. സ്ഥാപനത്തിലെ തന്നെ ഡിസൈനറായ പൂജ കൃഷ്ണനാണ് പുതിയ യൂണിഫോം ഡിസൈന്‍ ചെയ്തത്. തമിഴ്നാട്ടിലെ കാഞ്ചീവരം, ഹിമാചല്‍ പ്രദേശിലെ പട്ടു, ഗുജറാത്തിലെ പടോല, അസമിലെ ഗമോസ, മധ്യപ്രദേശിലെ ബാഗ് തുടങ്ങിയ പരമ്പരാഗത ഡിസൈന്‍ ഘടകങ്ങള്‍ ഇതില്‍ ഉള്‍പ്പെടുത്തിയിട്ടുണ്ട്. വസ്ത്ര നിര്‍മാണത്തിനായി ബനാന ക്രേപ്പ് തുണിയാണ് ഉപയോഗിച്ചിരിക്കുന്നത്.