ഇസ്ലാമാബാദ്: സഖ്യരാജ്യങ്ങളായ സൗദി അറേബ്യ, തുര്ക്കി, പാകിസ്ഥാന് എന്നിവയിലൊന്നിന് നേരെ ഉണ്ടാകുന്ന ഏതൊരു ആക്രമണവും മൂന്ന് രാജ്യങ്ങള്ക്കും എതിരെയുള്ള അധിനിവേശമായി കണക്കാക്കുമെന്ന് പാകിസ്ഥാന് പ്രതിരോധ മന്ത്രി ഖവാജ ആസിഫ്. അടുത്തിടെ സൗദി അറേബ്യയ്ക്ക് നേരെ യെമനിലെ ഹൂത്തി വിമതര് നടത്തിയ മിസൈല്-ഡ്രോണ് ആക്രമണങ്ങളുടെ പശ്ചാത്തലത്തില്, നവീകൃത 'മക്ക പ്രതിരോധ സഖ്യ'ത്തിലെ സംയുക്ത പ്രതിരോധ വ്യവസ്ഥകള് പ്രാബല്യത്തില് വരുത്താന് മടിക്കില്ലെന്ന് അദ്ദേഹം മുന്നറിയിപ്പ് നല്കി. ചൊവ്വാഴ്ച സൗദി അറേബ്യയിലെ പ്രധാന നഗരങ്ങളെയും ഊര്ജ്ജ കേന്ദ്രങ്ങളെയും ലക്ഷ്യമിട്ട് ഹൂത്തികള് നടത്തിയ ശക്തമായ ആക്രമണങ്ങളില് 73 സാധാരണക്കാര്ക്ക് പരിക്കേറ്റിരുന്നു. ഇതിന് പിന്നാലെയാണ് പാകിസ്ഥാന്റെ പ്രതികരണം വന്നത്.
കഴിഞ്ഞ മാസമാണ് പാകിസ്ഥാന്, സൗദി അറേബ്യ, തുര്ക്കി എന്നീ രാജ്യങ്ങള് ചേര്ന്ന് മക്കയില് വെച്ച് ചരിത്രപരമായ ഈ പ്രതിരോധ കരാറില് ഒപ്പുവെച്ചത്. കരാറിലെ വ്യവസ്ഥകള് പാലിക്കാന് പാകിസ്ഥാന് ബാധ്യസ്ഥരാണെന്നും അത് പൂര്ണ്ണമായും നടപ്പിലാക്കുമെന്നും ഖവാജ ആസിഫ് വ്യക്തമാക്കി.
ഈ കരാര് പൂര്ണ്ണമായും പ്രതിരോധ അധിഷ്ഠിതമാണെന്നും, ഒരു രാജ്യത്തെയും തനിയെ അങ്ങോട്ട് ആക്രമിക്കാന് വ്യവസ്ഥ ചെയ്യുന്നില്ലെന്നും മന്ത്രി വ്യക്തമാക്കി. യെമനിലെ ആഭ്യന്തര സംഘര്ഷം സൗദി അറേബ്യന് മണ്ണിലേക്ക് വ്യാപിപ്പിക്കാന് ശ്രമിച്ചാല് സഖ്യസേനയുടെ സംയുക്ത തിരിച്ചടി ഉണ്ടാകും. സൈനിക നടപടിയേക്കാള് ഉപരിയായി മൂന്ന് രാജ്യങ്ങളുടെയും സംയുക്ത ശേഷി ഒരു പ്രതിരോധ കവചമായി പ്രവര്ത്തിക്കാനാണ് സഖ്യം ലക്ഷ്യമിടുന്നത്.
യെമനില് അടുത്തിടെ സൗദി അറേബ്യ നടത്തിയ വ്യോമാക്രമണങ്ങള്ക്കുള്ള തിരിച്ചടിയാണ് തങ്ങളുടെ നടപടിയെന്നാണ് ഹൂത്തി വിമതരുടെ അവകാശവാദം. എന്നാല്, മേഖലയില് നയതന്ത്രതലത്തില് സമാധാനം പുനഃസ്ഥാപിക്കാന് സാധിക്കുമെന്ന പ്രതീക്ഷയും പാകിസ്ഥാന് പങ്കുവെച്ചു.
Related News
