റിയാദ്: സെപ്റ്റംബര് 25ന് തിയേറ്ററുകളിലെത്തുന്ന ഇന്വെസ്റ്റിഗേറ്റീവ് ക്രൈം ത്രില്ലര് ചിത്രം 'ആരം' സിനിമയുടെ സൗദി അറേബ്യയിലെ പ്രമോഷന് പ്രവര്ത്തനങ്ങള്ക്ക് റിയാദില് തുടക്കമായി. ഇതിന്റെ ഭാഗമായി സംഘടിപ്പിച്ച പ്രസ് മീറ്റില് ചിത്രത്തിലെ താരങ്ങളും അണിയറ പ്രവര്ത്തകരും സിനിമയുടെ വിശേഷങ്ങള് മാധ്യമങ്ങളുമായി പങ്കുവെച്ചു.
പ്രമുഖ ചലച്ചിത്ര താരങ്ങളായ സിദ്ദീഖ്, സൈജു കുറുപ്പ്, അസ്കര് അലി, ഷഹീന് സിദ്ദീഖ് എന്നിവര്ക്കൊപ്പം ചിത്രത്തിന്റെ നിര്മ്മാതാവും അഭിനേതാവുമായ പ്രവാസി വ്യവസായി, ഗുഡ് ഹോപ്പിന്റെ ഡോ. ജുനൈസ് ബാബുവും പ്രസ് മീറ്റില് പങ്കെടുത്തു.
ഇന്വെസ്റ്റിഗേഷന് പശ്ചാത്തലത്തില് ഒരുക്കിയിരിക്കുന്ന ക്രൈം ത്രില്ലറാണ് 'ആരം'. ചിത്രത്തില് സൈജു കുറുപ്പ് പോലീസ് ഓഫീസറുടെ വേഷത്തിലാണ് എത്തുന്നത്. അന്വേഷണത്തിന്റെ വിവിധ ഘട്ടങ്ങളിലൂടെ ഉദ്വേഗം നിലനിര്ത്തി മുന്നോട്ടുപോകുന്ന കഥയാണ് സിനിമയുടേതെന്ന് താരങ്ങള് പറഞ്ഞു.
ചിത്രത്തിലെ കഥാപാത്രങ്ങളെക്കുറിച്ചും ചിത്രീകരണ അനുഭവങ്ങളെക്കുറിച്ചും സിനിമയുടെ പ്രമേയത്തെക്കുറിച്ചും താരങ്ങള് മാധ്യമങ്ങളുമായി സംസാരിച്ചു. വ്യത്യസ്തമായ കഥയും അവതരണരീതിയും 'ആരം' സിനിമയുടെ പ്രത്യേകതയാണെന്നും മികച്ച തിയേറ്റര് അനുഭവം പ്രേക്ഷകര്ക്ക് നല്കാന് ചിത്രത്തിന് കഴിയുമെന്നാണ് പ്രതീക്ഷയെന്നും അവര് പറഞ്ഞു.
സൗദി അറേബ്യയില് നിന്നാണ് ചിത്രത്തിന്റെ വിദേശ പ്രമോഷന് പ്രവര്ത്തനങ്ങള്ക്ക് തുടക്കം കുറിച്ചത്. പ്രവാസി സമൂഹത്തില് നിന്ന് ലഭിക്കുന്ന പിന്തുണ മലയാള സിനിമയ്ക്ക് വലിയ കരുത്താണെന്നും റിയാദിലെ മലയാളി സിനിമാപ്രേമികളില് നിന്ന് ലഭിച്ച സ്വീകരണം ഏറെ സന്തോഷം നല്കുന്നതായും അണിയറ പ്രവര്ത്തകര് പറഞ്ഞു. സെപ്റ്റംബര് 25ന് 'ആരം' തിയേറ്ററുകളിലെത്തും.
Related News
