ജിദ്ദ: സൗദി അറേബ്യ കണ്ട ഏറ്റവും വലിയ ബിരിയാണി പാചകപ്പോരാട്ടമായ 'ദം ദം ബിരിയാണി'യുടെ ജിദ്ദ സെമി ഫൈനല് ഇന്ന് (വെള്ളിയാഴ്ച) ആവേശകരമായി അരങ്ങേറും. ഗള്ഫ് മാധ്യമവും മീഫ്രണ്ടും സംയുക്തമായി ഒരുക്കുന്ന ഈ മഹാമാമാങ്കത്തില് നാവില് കൊതിയൂറുന്ന രുചിപ്പോരിനൊപ്പം ഹൃദയം കീഴടക്കുന്ന സംഗീതവിരുന്നും കാണികളെ കാത്തിരിക്കുന്നുണ്ട്. ജിദ്ദയിലെ പ്രദര്ശന നഗരി ഇതുവരെ കാണാത്ത വലിയ ആഘോഷത്തിനാണ് സാക്ഷ്യം വഹിക്കുന്നത്. ജിദ്ദ മര്വയിലെ ലുലു മാളില് വൈകീട്ട് 6.30-ഓടെ പരിപാടികള്ക്ക് തുടക്കമാകും. പ്രവേശനം സൗജന്യമാണ്.
മത്സരാര്ത്ഥികള് തയാറാക്കിയ വിവിധ തരം ബിരിയാണികള് പ്രദര്ശന നഗരിയില് നിരക്കുന്നതോടെ പരിപാടികള്ക്ക് തുടക്കമാകും. തുടര്ന്ന് പ്രഗത്ഭരായ വിധികര്ത്താക്കള് വേദിയിലെത്തി ഔദ്യോഗിക വിധിനിര്ണയം ആരംഭിക്കും. ബിരിയാണിക്കൊപ്പം സംഗീത മധുരം വിളമ്പാന് പ്രമുഖ ഗായകരായ കണ്ണൂര് ശരീഫും ക്രിസ്റ്റകലയും ജിദ്ദയിലെത്തിച്ചേര്ന്നു. വിമാനത്താവളത്തില് സംഘാടകര് ഇരുവര്ക്കും ഊഷ്മളമായ വരവേല്പ് നല്കി. പ്രാദേശിക കലാകാരന്മാരുടെ ഒപ്പനയും മുട്ടിപ്പാട്ടും ഉള്പ്പെടുന്ന സ്വാഗത നൃത്തത്തോടെയാണ് സാംസ്കാരിക പരിപാടികള് ആരംഭിക്കുന്നത്. തുടര്ന്ന് നടക്കുന്ന ഔദ്യോഗിക ഉദ്ഘാടന ചടങ്ങില് വിശിഷ്ടാതിഥികളും പ്രായോജകരും പങ്കെടുക്കും.
ഇതിനു പിന്നാലെയാണ് കണ്ണൂര് ശരീഫ്, ക്രിസ്?റ്റകല എന്നിവര് നയിക്കുന്ന വമ്പന് സംഗീതവിരുന്ന് അരങ്ങുണര്ത്തുന്നത്. ഇതിനിടയില് വിധിനിര്ണയ വേദിയില് നിന്നുള്ള ആവേശകരമായ തത്സമയ വിശേഷങ്ങള് അവതാരകര് കാണികളിലേക്ക് എത്തിക്കും. ജിദ്ദ സെമി ഫൈനലിലെ വിജയികളെയും റിയാദില് നടക്കുന്ന ഗ്രാന്ഡ് ഫിനാലെയിലേക്ക് യോഗ്യത നേടുന്നവരെയും വേദിയില് വെച്ച് ഔദ്യോഗികമായി പ്രഖ്യാപിക്കുന്നതോടെ പരിപാടികള്ക്ക് കൊടിയിറങ്ങും.
.jpg)
