ഡല്ഹി: പശ്ചിമേഷ്യയില് നിലനില്ക്കുന്ന സംഘര്ഷങ്ങളില് ആശങ്ക രേഖപ്പെടുത്തിക്കൊണ്ടും മേഖലയില് സമാധാനം പുനഃസ്ഥാപിക്കണമെന്ന് ആവശ്യപ്പെട്ടുകൊണ്ടും ബ്രിക്സ് കൂട്ടായ്മയിലെ അംഗരാജ്യങ്ങള് സംയുക്ത പ്രഖ്യാപനം അംഗീകരിച്ചു. ഉച്ചകോടി ഇന്ന് സമാപിക്കും.
പശ്ചിമേഷ്യയിലും ഉക്രെയ്നിലും തുടരുന്ന സംഘര്ഷങ്ങളെ തുടര്ന്ന് ഊര്ജ്ജ, കപ്പല് ഗതാഗത മേഖലകളില് പ്രതിസന്ധി രൂക്ഷമാകുകയും തീരുവ വര്ദ്ധനവ് അംഗരാജ്യങ്ങളെ സാമ്പത്തികമായി ബാധിക്കുകയും ചെയ്ത അന്തരീക്ഷത്തിലാണ് 11 അംഗങ്ങളുള്ള ബ്രിക്സ് കൂട്ടായ്മയുടെ അധ്യക്ഷസ്ഥാനം ന്യൂഡല്ഹിക്ക് ലഭിച്ചത്.
സംയുക്ത പ്രഖ്യാപനത്തിലെ മുഖ്യ ചര്ച്ചകള്
പശ്ചിമേഷ്യന് സാഹചര്യമായിരുന്നു സംയുക്ത പ്രഖ്യാപനത്തിലെ മുഖ്യ ചര്ച്ചാവിഷയം. മേഖലയില് വര്ദ്ധിച്ചുവരുന്ന സംഘര്ഷങ്ങളില് ആശങ്ക രേഖപ്പെടുത്തിയ ഉച്ചകോടി, എല്ലാ കക്ഷികളോടും പരമാവധി സംയമനം പാലിക്കാന് ആവശ്യപ്പെട്ടു. സാധാരണക്കാരുടെ അടിസ്ഥാന സൗകര്യങ്ങള്ക്കും, പ്രത്യേകിച്ച് ആണവ നിലയങ്ങള്ക്കും നേരെ നടക്കുന്ന ആക്രമണങ്ങള്ക്കെതിരെയും മുന്നറിയിപ്പ് നല്കി.
ഫലസ്തീന് വിഷയവും ലോകനേതാക്കള് ചര്ച്ച ചെയ്തു. ഫലസ്തീനികളെ ബലമായി കുടിയൊഴിപ്പിക്കുന്നതിനെയും അധിനിവേശ പ്രദേശങ്ങളിലെ ഭൂമിശാസ്ത്രപരവും ജനസംഖ്യാപരവുമായ മാറ്റങ്ങളെയും ശക്തമായി എതിര്ക്കുന്ന നിലപാട് ഉച്ചകോടി ആവര്ത്തിച്ചു.
ഗാസയിലെ ഇസ്രായേല് ആക്രമണങ്ങള് അവസാനിപ്പിക്കണമെന്നും, ഐക്യരാഷ്ട്രസഭയുടെ ഫലസ്തീന് അഭയാര്ത്ഥി ഏജന്സിക്ക് പിന്തുണ നല്കണമെന്നും, ഫലസ്തീന് പൂര്ണ്ണ ഐക്യരാഷ്ട്രസഭാ അംഗത്വം നല്കണമെന്നും ബ്രിക്സ് ആവശ്യപ്പെട്ടു.
സാമ്പത്തിക, സാങ്കേതിക സഹകരണത്തെക്കുറിച്ചുള്ള ചര്ച്ചകളും ഫലപ്രദമായിരുന്നു. പാശ്ചാത്യേതര അതിര്ത്തി കടന്നുള്ള പണമടയ്ക്കല് സംവിധാനങ്ങളുടെ വ്യാപനം, നിര്മിത ബുദ്ധി (അക) മേഖലയിലെ സഹകരണം, ഏകപക്ഷീയമായ ഉപരോധങ്ങള്ക്കും തീരുവകള്ക്കുമെതിരെയുള്ള നിലപാടുകള് എന്നിവയും സംയുക്ത പ്രഖ്യാപനത്തില് ഉള്പ്പെടുത്തിയിട്ടുണ്ട്.
ലോകനേതാക്കളുടെ പ്രതികരണങ്ങളും കൂടിക്കാഴ്ചകളും
ഏഴ് വര്ഷത്തിന് ശേഷമുള്ള തന്റെ ആദ്യ ഇന്ത്യന് സന്ദര്ശനത്തിനായി ശനിയാഴ്ച ഡല്ഹിയിലെത്തിയ ചൈനീസ് പ്രസിഡന്റ്, പശ്ചിമേഷ്യയിലെയും ഗള്ഫ് മേഖലയിലെയും യുദ്ധം ലോകത്തിന് ഒരു തരത്തിലും ഗുണം ചെയ്യില്ലെന്നും വലിയ നാശനഷ്ടങ്ങളാണ് ഉണ്ടാക്കുന്നതെന്നും പ്രസ്താവിച്ചു.
റഷ്യന് പ്രസിഡന്റ് പുടിനുമായി കൂടിക്കാഴ്ച നടത്തി ഇരുരാജ്യങ്ങളും ഉഭയകക്ഷി ബന്ധം ശക്തമാക്കാന് ധാരണയായി. ഇറാന് പ്രസിഡന്റ് പെസെഷ്കിയാനുമായുള്ള ചര്ച്ചയില് ഹോര്മുസ് കടലിടുക്കിലെ നാവിക സ്വാതന്ത്ര്യവും കപ്പല് ജീവനക്കാരുടെ സുരക്ഷയും പ്രധാന വിഷയമായി ഉയര്ത്തിക്കാട്ടി.
സൗത്ത് ആഫ്രിക്കന് പ്രസിഡന്റ് സിറില് റാമഫോസ, ഈജിപ്ഷ്യന് പ്രസിഡന്റ് അബ്ദുല് ഫത്താഹ് അല് സിസി, എത്യോപ്യന് പ്രധാനമന്ത്രി അബി അഹമ്മദ്, ഇന്തോനേഷ്യന് പ്രസിഡന്റ് പ്രബോവോ സുബിയാന്തോ, യു.എ.ഇ പ്രതിനിധിയായി അബുദാബി കിരീടാവകാശി ഷെയ്ഖ് ഖാലിദ്, ബ്രസീല് വിദേശകാര്യ മന്ത്രി മൗറോ വിയേര എന്നിവരും ഉച്ചകോടിയില് പങ്കെടുത്തു. ഈജിപ്ഷ്യന് പ്രസിഡന്റ് അന്താരാഷ്ട്ര കപ്പല് ഗതാഗതത്തിന്റെ സ്ഥിരത ഉറപ്പാക്കേണ്ടതിന്റെ ആവശ്യകത ഊന്നിപ്പറഞ്ഞു.
ഇവര്ക്ക് പുറമെ യു.എന് സെക്രട്ടറി ജനറല് അന്റോണിയോ ഗുട്ടെറസ്, ലോകാരോഗ്യ സംഘടന (ണഒഛ), ലോക വ്യാപാര സംഘടന (ണഠഛ) എന്നിവയുടെ തലവന്മാരും ഉച്ചകോടിയില് സന്നിഹിതരായിരുന്നു.
.jpg)
