റിയാദ്: സൗദി അറേബ്യയില്‍ നേരിട്ടുള്ള സൂര്യപ്രകാശത്തിന് കീഴിലുള്ള തൊഴില്‍ നിരോധന കാലാവസ്ഥ സമാപിച്ചതായി മാനവ വിഭവശേഷി സാമൂഹിക വികസന മന്ത്രാലയം അറിയിച്ചു. നാഷണല്‍ കൗണ്‍സില്‍ ഫോര്‍ ഒക്യുപേഷണല്‍ സേഫ്റ്റി ആന്‍ഡ് ഹെല്‍ത്തുമായി സഹകരിച്ചാണ് 2026-ലെ നിരോധനം അവസാനിപ്പിച്ചതായി പ്രഖ്യാപിച്ചത്.

സ്വകാര്യ മേഖലയിലെ സ്ഥാപനങ്ങള്‍ക്കായി ജൂണ്‍ 15 മുതല്‍ സെപ്റ്റംബര്‍ 15 വരെ ഉച്ചകഴിഞ്ഞ് 12 മണി മുതല്‍ 3 മണി വരെയുള്ള സമയത്തായിരുന്നു ഈ നിരോധനം ബാധകമാക്കിയിരുന്നത്.

തൊഴിലാളികളുടെ ആരോഗ്യവും സുരക്ഷയും സംരക്ഷിക്കുന്നതിനും കടുത്ത ചൂടും സൂര്യപ്രകാശവും മൂലമുണ്ടാകുന്ന അപകടസാധ്യതകള്‍ കുറയ്ക്കുന്നതിനുമുള്ള തുടര്‍ച്ചയായ ശ്രമങ്ങളുടെ ഭാഗമായാണ് ഈ നടപടി. സുരക്ഷിതമായ തൊഴില്‍ അന്തരീക്ഷം വളര്‍ത്തിയെടുക്കാനും വിവിധ മേഖലകളില്‍ തൊഴില്‍ സുരക്ഷാ മാര്‍ഗ്ഗങ്ങള്‍ ശക്തിപ്പെടുത്താനും ഈ നിയമം സഹായിച്ചിട്ടുണ്ട്.

നിരോധന കാലയളവില്‍ രാജ്യത്തുടനീളം മന്ത്രാലയം 29,945 പരിശോധനകളാണ് നടത്തിയത്. ഇതില്‍ 95 ശതമാനം സ്ഥാപനങ്ങളും നിയമം കൃത്യമായി പാലിച്ചതായി കണ്ടെത്തി. ആകെ 1,771 ലംഘനങ്ങള്‍ രേഖപ്പെടുത്തിയപ്പോള്‍, തീരുമാനത്തിന്റെ നടത്തിപ്പുമായി ബന്ധപ്പെട്ട് ലഭിച്ച 41 പരാതികളും അധികൃതര്‍ പരിഹരിച്ചു.

തൊഴില്‍ സുരക്ഷാ മുന്‍കരുതലുകള്‍ പാലിക്കേണ്ടതിന്റെയും സുരക്ഷിതമായ ജോലിസ്ഥലം ഉറപ്പാക്കേണ്ടതിന്റെയും പ്രാധാന്യത്തെക്കുറിച്ച് സ്ഥാപനങ്ങള്‍ക്കിടയില്‍ അവബോധം വര്‍ദ്ധിച്ചുവരുന്നതാണ് ഈ കണക്കുകള്‍ വ്യക്തമാക്കുന്നത്.