വാഷിംഗ്ടണ്‍: അമേരിക്കയുടെ യുഎസ്എസ് അബ്രഹാം ലിങ്കണ്‍ കാരിയര്‍ സ്‌ട്രൈക്ക് ഗ്രൂപ്പില്‍ സേവനമനുഷ്ഠിച്ചിരുന്ന എട്ട് നാവികര്‍ നീണ്ട വിന്യാസത്തിനിടയില്‍ ആത്മഹത്യയ്ക്ക് ശ്രമിച്ചതായി ആക്ടിംഗ് യുഎസ് നേവി സെക്രട്ടറി ഹംഗ് കാവോ വെളിപ്പെടുത്തി. ഇറാനെതിരെയുള്ള പോരാട്ടങ്ങള്‍ ഉള്‍പ്പെട്ട നീണ്ട വിന്യാസ കാലയളവിലാണ് ഈ സംഭവങ്ങള്‍. സെനറ്ററുടെ ചോദ്യത്തിന് മറുപടിയായാണ് കാവോ ഈ വിവരങ്ങള്‍ വെളിപ്പെടുത്തിയത്.

ഈ വിന്യാസത്തിനിടയില്‍ ജീവനക്കാര്‍ ആരും ആത്മഹത്യ ചെയ്തിട്ടില്ലെന്ന് അദ്ദേഹം വ്യക്തമാക്കി. എങ്കിലും, കപ്പല്‍ പടയിലെ വിവിധ കപ്പലുകളിലായി എട്ട് പേര്‍ ആത്മഹത്യയ്ക്ക് ശ്രമിച്ചിട്ടുണ്ട്. ഇറാനെതിരെ തീവ്രമായ യുദ്ധനടപടികള്‍ നടന്നതിനാല്‍ ആറുമാസത്തിലധികം കപ്പലിന് തുറമുഖത്ത് അടുക്കാന്‍ കഴിഞ്ഞിരുന്നില്ല. ഇത് ജീവനക്കാരുടെ മാനസികാരോഗ്യത്തെയും മനോവീര്യത്തെയും സാരമായി ബാധിച്ചു. സാധാരണ വിന്യാസങ്ങളില്‍ ഒന്നോ രണ്ടോ ആത്മഹത്യാ ശ്രമങ്ങള്‍ നടക്കുമ്പോള്‍, ഇത്രയധികം എണ്ണം ഉണ്ടാകുന്നത് അസാധാരണമാണെന്ന് സൈനിക വൃത്തങ്ങള്‍ പ്രതികരിച്ചു.

കപ്പലില്‍ മാനസികാരോഗ്യ വിദഗ്ധരെ ഉള്‍പ്പെടുത്തിയിരുന്നതായി കാവോയുടെ കത്തില്‍ പറയുന്നു. സമീപ മാസങ്ങളില്‍ രണ്ട് നാവികര്‍ കപ്പലില്‍ നിന്ന് കടലിലേക്ക് ചാടിയിരുന്നെങ്കിലും ഇവരെ രക്ഷപ്പെടുത്തിയിരുന്നു. സൈനികരുടെ ക്ഷേമം അവഗണിച്ച നിലവിലെ ഭരണകൂടത്തിന്റെ നടപടിയെ സെനറ്റര്‍ കിര്‍സ്റ്റന്‍ ഗില്ലിബ്രാന്‍ഡ് രൂക്ഷമായി വിമര്‍ശിച്ചു.