ന്യൂദല്‍ഹി: അമേരിക്കയിലേക്ക് സന്ദര്‍ശക വിസയ്ക്ക് അപേക്ഷിക്കുന്ന ഇന്ത്യക്കാര്‍ക്ക് അഭിമുഖത്തിനായി ഒരു വര്‍ഷം വരെ കാത്തിരിക്കേണ്ട സാഹചര്യം. യു.എസ് സ്‌റ്റേറ്റ് ഡിപ്പാര്‍ട്ട്‌മെന്റിന്റെ ഏറ്റവും പുതിയ കണക്കനുസരിച്ച്, ഇന്ത്യയിലെ അഞ്ച് യുഎസ് കോണ്‍സുലര്‍ കേന്ദ്രങ്ങളില്‍ ഹൈദരാബാദിലാണ് ബി1, ബി2 വിസയ്ക്കുള്ള അപ്പോയിന്റ്‌മെന്റിന് ഏറ്റവും കൂടുതല്‍ കാത്തിരിപ്പ് വേണ്ടി വരുന്നത്, 12 മാസം.
മുംബൈയില്‍ 11.5 മാസവും ന്യൂദല്‍ഹിയില്‍ 10 മാസവുമാണ് അപ്പോയിന്റ്‌മെന്റിനുള്ള കാത്തിരിപ്പ്. ചെന്നൈയില്‍ 7.5 മാസവും കൊല്‍ക്കത്തയില്‍ 6.5 മാസവുമാണ് കാത്തിരിക്കേണ്ടത്.
ബി1, ബി2 വിഭാഗത്തില്‍ ബിസിനസ്, വിനോദസഞ്ചാരം, കുടുംബസന്ദര്‍ശനം തുടങ്ങിയ ആവശ്യങ്ങള്‍ക്കുള്ള നോണ്‍ഇമിഗ്രന്റ് വിസകളാണ് ഉള്‍പ്പെടുന്നത്. അതിനാല്‍ അമേരിക്കയിലേക്ക് വിനോദയാത്രയോ ബന്ധുക്കളെ സന്ദര്‍ശിക്കാനോ പദ്ധതിയിടുന്ന ഇന്ത്യക്കാര്‍ക്ക് നീണ്ട കാത്തിരിപ്പ് വേണ്ടി വരും.
എഫ്, എം, ജെ വിഭാഗങ്ങളിലുള്ള വിദ്യാര്‍ഥി, എക്‌സ്‌ചേഞ്ച് വിസകള്‍ക്ക് സ്ഥിതി താരതമ്യേന മെച്ചമാണ്. ചെന്നൈയില്‍ 15 ദിവസത്തില്‍ താഴെ അപ്പോയ്ന്‍മെന്റ് ലഭ്യമാണ്. ഹൈദരാബാദില്‍ 1.5 മാസവും ന്യൂദല്‍ഹിയിലും കൊല്‍ക്കത്തയിലും രണ്ടുമാസവും മുംബൈയില്‍ 2.5 മാസവുമാണ് കാത്തിരിപ്പ്.
തൊഴില്‍ വിഭാഗം വിസകളില്‍ ഹൈദരാബാദിലാണ് ഏറ്റവും കൂടുതല്‍ കാത്തിരിപ്പ്, 5.5 മാസം. ന്യൂദല്‍ഹിയില്‍ മൂന്ന് മാസവും ചെന്നൈ, മുംബൈ എന്നിവിടങ്ങളില്‍ 1.5 മാസവും കൊല്‍ക്കത്തയില്‍ ഒരു മാസവുമാണ് കാത്തിരിക്കേണ്ടി വരുന്നത്.