ന്യൂഡല്‍ഹി: പ്രതിപക്ഷ നേതാക്കളും 'കോക്രോച്ച്' യുവജന പ്രസ്ഥാനത്തിന്റെ വക്താക്കളും ഉള്‍പ്പെടെ ആയിരക്കണക്കിന് പ്രക്ഷോഭകരെ പൊലീസ് കസ്റ്റഡിയിലെടുത്തതിന് തൊട്ടടുത്ത ദിവസവും രാജ്യതലസ്ഥാനത്ത് സമരം ശക്തമായി തുടരുന്നു. അറസ്റ്റിലായ പ്രതിഷേധക്കാരെയും വിദ്യാര്‍ത്ഥി നേതാക്കളെയും തടങ്കലില്‍ വെച്ചത് 'നിയമവിരുദ്ധമാണെന്ന്' സുപ്രീം കോടതി നിരീക്ഷിച്ചതിനെ തുടര്‍ന്ന് ഞായറാഴ്ച ഭൂരിഭാഗം പേരെയും മോചിപ്പിച്ചിരുന്നു.

കസ്റ്റഡിയില്‍ നിന്ന് പുറത്തിറങ്ങിയ കോക്രോച്ച് ജന്ത പാര്‍ട്ടി നേതാവ് അഭിജീത് ദിപ്‌കെ, പ്രധാനമന്ത്രി നരേന്ദ്ര മോദിക്കെതിരെ രൂക്ഷവിമര്‍ശനവുമായി രംഗത്തെത്തി. 'ഇന്ത്യ കണ്ട ഏറ്റവും വലിയ ഭീരുവും ഭീഷണിപ്പെടുത്തുന്നയാളുമാണ് പ്രധാനമന്ത്രി' എന്ന് അദ്ദേഹം എക്‌സില്‍ (ത) കുറിച്ചു.

എന്താണ് പ്രതിഷേധങ്ങള്‍ക്ക് കാരണം?
കേന്ദ്ര തിരഞ്ഞെടുപ്പ് കമ്മീഷണര്‍ ഗ്യാനേഷ് കുമാറിന്റെ രാജിയാവശ്യപ്പെട്ടാണ് വന്‍ യുവജന പ്രക്ഷോഭങ്ങള്‍ അരങ്ങേറുന്നത്. ഭരണകക്ഷിയായ ബി.ജെ.പിക്ക് അനുകൂലമായി വോട്ടര്‍ പട്ടികയില്‍ വ്യാപക അട്ടിമറി നടത്തിയെന്നാണ് പ്രക്ഷോഭകരുടെ പ്രധാന ആരോപണം. ന്യൂനപക്ഷ വിഭാഗങ്ങളുടേത് ഉള്‍പ്പെടെ ദശലക്ഷക്കണക്കിന് വോട്ടര്‍മാരെ പട്ടികയില്‍ നിന്ന് ഒഴിവാക്കിയതായി ഇവര്‍ ആരോപിക്കുന്നു.

തിരഞ്ഞെടുപ്പ് കമ്മീഷണറുടെ തീരുമാനങ്ങളില്‍ മറ്റ് രണ്ട് കമ്മീഷണര്‍മാര്‍ എതിര്‍പ്പ് പ്രകടിപ്പിച്ചിരുന്നുവെന്ന മാധ്യമ റിപ്പോര്‍ട്ടുകള്‍ പുറത്തുവന്നതോടെയാണ് പ്രതിഷേധം കൂടുതല്‍ കനത്തത്.

തലസ്ഥാനം ഉപരോധത്തില്‍; ഭയന്നുവിറച്ച് ഭരണകൂടം
ശനിയാഴ്ചത്തെ പ്രതിഷേധം തടയുന്നതിനായി ഡല്‍ഹി നഗരത്തെ പൂര്‍ണ്ണമായും പോലീസ് വളഞ്ഞിരുന്നു. മുപ്പതിനായിരത്തിലധികം പൊലീസിനെയും അര്‍ദ്ധസൈനിക വിഭാഗങ്ങളെയും നഗരത്തില്‍ വിന്യസിച്ചു. മെട്രോ സര്‍വീസുകള്‍ നിര്‍ത്തലാക്കുകയും പ്രധാന റോഡുകളില്‍ സിമന്റ് ബാരിക്കേഡുകള്‍ ഉയര്‍ത്തി ഗതാഗതം തടസ്സപ്പെടുത്തുകയും ചെയ്തു. സമരക്കാരുടെ ഏകോപനം തടയാന്‍ നഗരത്തിലെ പലയിടങ്ങളിലും മൊബൈല്‍ ഇന്റര്‍നെറ്റ് സേവനങ്ങള്‍ റദ്ദാക്കി.

വിമാനമാര്‍ഗം ഡല്‍ഹിയിലെത്തിയ സി.ജെ.പി സ്ഥാപകന്‍ അഭിജീത് ദിപ്‌കെ, സൗരവ് ദാസ്, അശുതോഷ് റാങ്ക എന്നിവരെ വിമാനത്തിനുള്ളില്‍ കയറിയാണ് പൊലീസ് കസ്റ്റഡിയിലെടുത്തത്. പ്രമുഖ യൂട്യൂബര്‍ ധ്രുവ് രാഠി, ഐസ ദേശീയ പ്രസിഡന്റ് നേഹ ബോറ എന്നിവരെയും പൊലീസ് തടങ്കലിലാക്കി. ഇതിനുപുറമെ മമത ബാനര്‍ജി, അരവിന്ദ് കെജ്രിവാള്‍, പിണറായി വിജയന്‍ തുടങ്ങിയ പ്രമുഖ പ്രതിപക്ഷ നേതാക്കളെയും തടഞ്ഞുവെച്ചതായി ദൃശ്യമാധ്യമങ്ങള്‍ റിപ്പോര്‍ട്ട് ചെയ്തു.

മാധ്യമ സ്വാതന്ത്ര്യത്തിന്മേലുള്ള കടന്നുകയറ്റം
സമരം കവര്‍ ചെയ്യാനെത്തിയ ഒട്ടേറെ മാധ്യമപ്രവര്‍ത്തകരെയും പൊലീസ് കസ്റ്റഡിയിലെടുത്തു. ന്യൂസ് ലൗണ്ടറി ഉള്‍പ്പെടെയുള്ള മാധ്യമങ്ങളുടെ ഉപകരണങ്ങള്‍ പൊലീസ് പിടിച്ചെടുത്തതായി പരാതിയുണ്ട്. സംഭവത്തില്‍ യു.എന്‍ മനുഷ്യാവകാശ വിഭാഗവും ആംനസ്റ്റി ഇന്റര്‍നാഷണലും കടുത്ത ആശങ്ക രേഖപ്പെടുത്തി. എന്നാല്‍ ഇത് രാജ്യത്തിന്റെ ആഭ്യന്തര കാര്യങ്ങളിലുള്ള കടന്നുകയറ്റമാണെന്ന് ഐക്യരാഷ്ട്രസഭയിലെ ഇന്ത്യന്‍ പ്രതിനിധി മറുപടി നല്‍കി.

തങ്ങളെ അടിച്ചമര്‍ത്താന്‍ നോക്കേണ്ടതില്ലെന്നും സമരം കൂടുതല്‍ ശക്തിയോടെ തുടരുമെന്നും യുവജന നേതാക്കള്‍ പ്രഖ്യാപിച്ചു. ഐസ പ്രസിഡന്റ് നേഹ ബോറ ഞായറാഴ്ച ഉച്ചയ്ക്ക് ആര്‍.കെ. ആശ്രമില്‍ വീണ്ടും സമരം ആരംഭിച്ചെങ്കിലും പൊലീസ് ഉടന്‍ തന്നെ അവരെ വീണ്ടും കസ്റ്റഡിയിലെടുത്തു.

ഇതിനിടെ പ്രക്ഷോഭകര്‍ക്ക് പൂര്‍ണ്ണ പിന്തുണയുമായി കോണ്‍ഗ്രസ് നേതൃത്വം നല്‍കുന്ന ഇന്ത്യ മുന്നണിയും രംഗത്തെത്തിയിട്ടുണ്ട്. വരും ദിവസങ്ങളില്‍ സമരം രാജ്യത്തുടനീളം വ്യാപിപ്പിക്കാനാണ് പ്രക്ഷോഭകരുടെ തീരുമാനം.