സന്‍ആ- ഹുത്തി മിലിഷ്യ തായിസ് നഗരത്തിലും സമീപ ഗ്രാമങ്ങളിലും ഏര്‍പ്പെടുത്തിയിരിക്കുന്ന ക്രൂരമായ ഉപരോധം അവസാനിപ്പിക്കാനും വന്‍ ദുരന്തം ഒഴിവാക്കാനും അടിയന്തര നടപടികള്‍ സ്വീകരിക്കണമെന്ന് യമന്‍ സര്‍ക്കാര്‍ ഐക്യരാഷ്ട്രസഭയോടും യു.എന്‍ രക്ഷാസമിതിയോടും ആവശ്യപ്പെട്ടു.
യമന്‍ വിദേശകാര്യ-പ്രവാസി കാര്യ മന്ത്രി ഡോ. അഫ്രാഹ് അല്‍-സുബ യു.എന്‍ സെക്രട്ടറി ജനറല്‍, രക്ഷാസമിതി പ്രസിഡന്റ്, മനുഷ്യാവകാശ ഹൈക്കമ്മീഷണര്‍, റെഡ് ക്രോസ് അന്താരാഷ്ട്ര കമ്മിറ്റി പ്രസിഡന്റ്, യു.എന്‍ മാനുഷിക കാര്യ അണ്ടര്‍ സെക്രട്ടറി എന്നിവര്‍ക്ക് അയച്ച കത്തിലാണ് തായിസ് ഗവര്‍ണറേറ്റിലെ ഗുരുതരമായ സ്ഥിതിഗതികളെക്കുറിച്ച് മുന്നറിയിപ്പ് നല്‍കിയത്. ഹൂത്തികളുടെ ഉപരോധവും സൈനിക നീക്കങ്ങളും ശക്തമായതോടെ നഗരത്തില്‍ വസിക്കുന്നവരും അല്‍-ഷമൈതൈന്‍, അല്‍-മവാസിത്, ജബല്‍ ഹബാഷി തുടങ്ങിയ പ്രദേശങ്ങളില്‍ നിന്ന് ആട്ടിയോടിക്കപ്പെട്ട അഭയാര്‍ത്ഥികളും ഉള്‍പ്പെടെ 40 ലക്ഷത്തിലധികം ആളുകളെ ബാധിക്കുന്ന വലിയൊരു മാനുഷിക ദുരന്തമാണ് ഉയര്‍ന്നുവരുന്നതെന്ന് കത്തില്‍ ചൂണ്ടിക്കാട്ടുന്നു.
തടസ്സമില്ലാതെ ഭക്ഷണവും ഇന്ധനവും കുടിവെള്ളവും ജനങ്ങളിലേക്ക് എത്തിക്കുന്നതിനായി തായിസിലേക്കുള്ള എല്ലാ വഴികളും ഉടനടി തുറക്കാനും ഉപരോധം പിന്‍വലിക്കാനും അന്താരാഷ്ട്ര സമൂഹം ഇടപെടണം. മനുഷ്യാവകാശ ലംഘനങ്ങള്‍ രേഖപ്പെടുത്താനും കുറ്റക്കാരെ നിയമത്തിന് മുന്നില്‍ കൊണ്ടുവരാനും നിരീക്ഷണ സംവിധാനങ്ങള്‍ ശക്തമാക്കണമെന്നും സര്‍ക്കാര്‍ ആവശ്യപ്പെട്ടു. ജനങ്ങളുടെ പ്രാഥമിക ആവശ്യങ്ങള്‍ തടയുന്നതിനെയും മാനുഷിക ആവശ്യങ്ങളെ സമ്മര്‍ദ്ദതന്ത്രമായി ഉപയോഗിക്കുന്നതിനെയും അന്താരാഷ്ട്ര സമൂഹം ശക്തമായി എതിര്‍ക്കണമെന്ന് വിദേശകാര്യ മന്ത്രി വ്യക്തമാക്കി.
പ്രതിസന്ധി പരിഹരിക്കുന്നതിനായി യു.എന്‍ ഏജന്‍സികളുമായും മറ്റ് അന്താരാഷ്ട്ര സംഘടനകളുമായും സഹകരിച്ചു പ്രവര്‍ത്തിക്കാന്‍ യമന്‍ സര്‍ക്കാര്‍ തയ്യാറാണ്. വെറുമൊരു ആശങ്ക പ്രകടിപ്പിക്കുന്നതില്‍ ഉപരിയായി, തായിസ് നഗരത്തിലെ നിവാസികളുടെ ജീവനും അന്തസ്സും സംരക്ഷിക്കാന്‍ ശക്തവും പ്രായോഗികവുമായ നടപടികളാണ് ആവശ്യമെന്ന് വിദേശകാര്യ മന്ത്രി കൂട്ടിച്ചേര്‍ത്തു.
ആയുധ നിര്‍മ്മാണത്തിന് ഹൂത്തികള്‍ ചൈനീസ് സാങ്കേതികവിദ്യ ഉപയോഗിക്കുന്നതിനെക്കുറിച്ച് ചൈനീസ് അധികൃതരുമായി ചര്‍ച്ച നടത്തിയതായും, ഈ വിഷയത്തില്‍ വിശദമായ അന്വേഷണം നടത്തുമെന്ന് ബെയ്ജിംഗ് ഉറപ്പുനല്‍കിയതായും യമന്‍ വിദേശകാര്യ മന്ത്രി വ്യക്തമാക്കി.
.jpg)
Related News
