ടെല്‍ അവീവ്: ബോംബ് ഭീഷണിയെ തുടര്‍ന്ന് ഇസ്രായേലിലെ ടെല്‍ അവീവില്‍നിന്ന് ഓസ്ട്രിയന്‍ തലസ്ഥാനമായ വിയന്നയിലേക്ക് പുറപ്പെട്ട വിമാനം ബള്‍ഗേറിയയുടെ തലസ്ഥാനമായ സോഫിയയില്‍ അടിയന്തരമായി ഇറക്കി. വിമാനത്തിലുണ്ടായിരുന്ന 51 യാത്രക്കാരെയും ആറ് ജീവനക്കാരെയും സുരക്ഷിതമായി ഒഴിപ്പിച്ചു. ആര്‍ക്കും പരിക്കേറ്റതായി റിപ്പോര്‍ട്ടില്ല.
വിമാനത്തിലെ ജീവനക്കാര്‍ ബോംബ് ഭീഷണിയുമായി ബന്ധപ്പെട്ട മുന്നറിയിപ്പ് നല്‍കിയതിനെത്തുടര്‍ന്നാണ് വഴിതിരിച്ചുവിട്ടതെന്ന് ബള്‍ഗേറിയന്‍ ഗതാഗത മന്ത്രാലയം അറിയിച്ചു. റൊമാനിയന്‍ അതിര്‍ത്തിക്ക് സമീപത്തുവെച്ചാണ് ജീവനക്കാര്‍ മുന്നറിയിപ്പ് നല്‍കിയത്. തുടര്‍ന്ന് സോഫിയയില്‍ അടിയന്തരമായി ഇറങ്ങാന്‍ തീരുമാനിക്കുകയായിരുന്നു.
ഓസ്ട്രിയന്‍ എയര്‍ലൈന്‍സിന്റെ എ.320 വിഭാഗത്തില്‍പ്പെട്ട വിമാനം മിഗ്29 യുദ്ധവിമാനത്തിന്റെ അകമ്പടിയോടെയാണ് സോഫിയയിലെ വാസില്‍ ലെവ്‌സ്‌കി വിമാനത്താവളത്തില്‍ ഇറങ്ങിയത്. പ്രാദേശിക സമയം രാത്രി 9.25ഓടെയാണ് വിമാനം സോഫിയയിലെത്തിയതെന്നാണ് ഫ്‌ലൈറ്റ് ട്രാക്കിങ് വിവരങ്ങള്‍ സൂചിപ്പിക്കുന്നത്. ടെല്‍ അവീവില്‍നിന്ന് വൈകീട്ട് 6.40ന് പുറപ്പെടാനായിരുന്നു നിശ്ചയിച്ചിരുന്നത്.
വിമാനം നിലത്തിറങ്ങിയശേഷം യാത്രക്കാരെ ഒഴിപ്പിച്ചു. തുടര്‍ന്ന് സുരക്ഷാ ഉദ്യോഗസ്ഥര്‍ വിമാനത്തില്‍ വിശദമായ പരിശോധന നടത്തി. സംഭവത്തില്‍ അന്വേഷണം ആരംഭിച്ചതായും റിപ്പോര്‍ട്ടുകളുണ്ട്.
വിമാനത്തിന് ബോംബ് ഭീഷണി ലഭിച്ചതായി ബള്‍ഗേറിയന്‍, ഇസ്രായേല്‍ മാധ്യമങ്ങള്‍ റിപ്പോര്‍ട്ട് ചെയ്തു. ഓസ്ട്രിയന്‍ എയര്‍ലൈന്‍സ് സംഭവം് സ്ഥിരീകരിച്ചെങ്കിലും ഭീഷണിയുടെ ഉറവിടത്തെക്കുറിച്ചോ പരിശോധനയില്‍ കണ്ടെത്തിയ കാര്യങ്ങളെക്കുറിച്ചോ കൂടുതല്‍ വിശദാംശങ്ങള്‍ പുറത്തുവിട്ടിട്ടില്ല.